Category: پاکستان

لاہور(بولونیوز)لاہور شہر کے مختلف علاقوں میں تیز ہواؤں کے ساتھ موسلادھار بارش ہوئی ہے، محکمہ موسمیات کا کہنا ہے کہ شہر کا درجہ حرارت 28 ڈگری سینٹی گریڈ ریکارڈ کیا گیا ہے۔

محکمہ موسمیات کے مطابق 20 کلو میٹر فی گھنٹہ کی رفتار سے ہوائیں چل رہی ہیں، اور آئندہ 24 گھنٹوں کے دوران مزید بارش کا امکان ہے۔

کمشنر نعمان یوسف نے واسا، ایم سی ایل، ایل ڈی اے کی ٹیموں کو فیلڈ میں رہنے کا حکم جاری کیا ہے، اور کہا ہے کہ تمام اسسٹنٹ کمشنرز اپنی تحصیلوں میں نکاسی آب کی خود نگرانی کریں، مرکزی شاہراہوں، انڈر پاسز کو کلیئر رکھا جائے، سی بی ڈی، روڈا ٹیمیں الرٹ رہیں۔

کمشنر لاہور نے ہدایت کی ہے کہ بجلی بندش والے علاقوں میں ڈسپوزل اسٹیشنز کو فوری جنریٹرز پر چلایا جائے، اور اسٹیشنز کے پمپس کو آپریشنل رکھا جائے، جب کہ واسا ٹاؤن ڈائریکٹرز مانیٹرنگ کریں۔

ادھر ترجمان موٹر وے پولیس نے کہا ہے کہ موٹر وے ایم-2 پر کوٹ مومن سے ٹھوکر نیاز بیگ تک متعدد مقامات پر بارش ہوئی ہے، لاہور سیالکوٹ موٹر وے پر مین ٹول پلازہ سے سمبڑیال تک بارش کا سلسلہ جاری ہے۔

ترجمان کے مطابق موٹر وے ایم-3 پر فیض پور سے ننکانہ تک موسم ابر آلود ہے، بارش کے باعث سڑکیں پھسلن کا شکار ہیں اس لیے ڈرائیور انتہائی احتیاط سے سفر کریں، رفتار کم رکھیں اور اگلی گاڑی سے محفوظ فاصلہ برقرار رکھیں، بارش کے دوران غیر ضروری اوور ٹیکنگ، تیز رفتاری اور اچانک بریک سے گریز کریں۔

ترجمان نے کہا ہیڈ لائٹس، وائپرز درست حالت میں رکھیں، لین ڈسپلن اور سیٹ بیلٹ استعمال کریں، اور کسی بھی ہنگامی صورت حال میں موٹر وے پولیس ہیلپ لائن 130 پر فوری رابطہ کریں۔

لاہور(بولونیوز)سُتھرا پنجاب کے بے لگام ٹرک نے ایک موٹر سائیکل کو روند کر ایک اور گھر کا چراغ گُل کر دیا۔لاہور کے علاقے کوٹ لکھپت میں تیز رفتاری کا مظاہرہ کرنے والے ستھرا پنجاب کے بے لگام ٹرک نے موٹر سائیکل سوار کو روند ڈالا، جس سے ڈیڑھ سال کی معصوم بچی جاں بحق جب کہ اس کے والدین شدید زخمی ہو گئے۔

حادثے کے بعد مشتعل ہجوم نے ڈرائیور کو پکڑ کر شدید تشدد کا نشانہ بنایا۔ ٹریفک انسپکٹر کوٹ لکھپت نے موقع پر پہنچ کر ٹرک ڈرائیور کو مشتعل شہریوں سے بچا کر اپنی تحویل میں لیا۔

ٹریفک پولیس نے ڈرائیور، ٹرک اور موٹر سائیکل کو مزید قانونی کارروائی کے لیے متعلقہ تھانے کے حوالے کر دیا۔ لاہور ٹریفک پولیس نے ستھرا پنجاب کے ڈرائیورز کی تربیت کے لیے پہلے ہی متعلقہ حکام کو خط لکھا تھا۔

لاہور(بولونیوز)اتوار کو ہفتہ وار تعطیل پر گاڑی یا موٹر سائیکل پر نکلنے والے ہوشیار ہو جائیں کیونکہ انہیں بڑی سزا کا سامنا کرنا پڑ سکتا ہے۔اتوار کو ہفتہ وار تعطیل پر لوگوں کی بڑی تعداد گھومنے پھرنے دوستوں کے ساتھ نکلتی ہے۔ تاہم آج کم عمر، بغیر لائسنس گاڑی یا موتر سائیکل چلانے والے اور تین افراد کی سواری والے کسی بھی عمر کے موٹر سائیکل سوار کے خلاف سخت کارروائی ہوگی۔

اس حوالے سے سی ٹی او عبدالرحیم شیرازی کا کہنا ہے کہ چالان کے ساتھ کم عمر ڈرائیور کی گاڑی، موٹر سائیکل بھی بند کر دی جائے گی اور صرف جووینائل پرمٹ دکھانے پر ہی چھوڑی جائے گی۔

سی ٹی او لاہور کا کہنا تھا کہ چھٹی کے روز بچے گھر سے موٹر سائیکل، گاڑی اور رکشا لے کر سڑکوں پر آ جاتے ہیں، اس لیے آج یہ کارروائی کی جائے گی۔انہوں نے یہ بھی بتایا کہ محفوظ سفر کے پیش نظر موٹر سائیکل پر 3 افراد کے سوار ہونے کے خلاف بھی کارروائی ہوگی۔

لاہور(بولونیوز)مفت بجلی ختم ہونے پر پہلی بار اپنا بل دیکھ کر سرکاری افسر کے ہوش اڑ گئے اور غریب عوام کی بے بسی کا احساس ہو گیا۔لیسکو میں گریڈ 18 سے 20 تک کے ملازمین کے لیے مفت بجلی کی سہولت ختم کر دی اور اب انہیں عام شہریوں کی طرح بجلی کے بل فراہم کیے جا رہے ہیں۔

تاہم پہلی بار بجلی کے بھاری بل ملنے پر کئی دہائیوں سے آرام سے رہنے والے افسران نے سر پکڑ لیا اور انہیں عوام کی بے بسی کا احساس ہو گیا ہے، جس کا وہ برملا اظہار کر رہے ہیں۔

ذرائع نے بتایا ہے کہ لیسکو کے ایک ایس ڈی او کو مفت بجلی ختم ہونے پر جب پہلے مہینے کا بجلی کا بل ملا تو وہ بل کی رقم دیکھ کر سر پکڑ کر بیٹھ گئے اور دو دن کی چھٹی پر چلے گئے۔مذکورہ ایس ڈی او کا گھر 10 مرلے کا ہے اور ان کا بل 72 ہزار روپے کا آیا ہے۔

اتنا زیادہ بل دیکھ کر ایس ڈی او کا کہنا ہے کہ 28 سالہ سروس میں کبھی بھی بجلی کا بل نہیں دیا۔ آج بل دیکھ کر احساس ہوا کہ بجلی واقعی مہنگی ہے۔ عوام جو بل دیتے ہوں گے، ان کا کیا حال ہوتا ہوگا۔

کراچی(بولونیوز) ولیکا اسپتال میں ڈاکٹروں کی مجرمانہ غفلت نے کئی خاندانوں پر قیامت ڈھا دی مزید دو معصوم بچیاں ایچ آئی وی کا شکار ہو گئیں۔

ولیکا اسپتال میں غافل ڈاکٹروں نے پاکستان کے مستقبل سے کھیلتے ہوئے درجنوں نونہالان وطن کو موذی مرض ایچ آئی وی کا شکار کر دیا، جس کے باعث کئی خاندانوں کی دنیا اجڑ گئی ہے۔

رپورٹ کے مطابق مزید دو معصوم بچیاں ایچ آئی وی کا شکار ہو گئی ہیں۔ ان میں ایک بچی وہ بھی شامل ہے، جس کے دو بھائی پہلے ہی اس مرض میں مبتلا ہو چکے ہیں۔

ضیا کالونی کے رہائشی اس خاندان پر قیامت ٹوٹ پڑی ہے۔ متاثرہ والد کا کہنا ہے کہ ان کے تین بچے ہیں اور تینوں ہی موذی مرض ایچ آئی وی کا شکار ہو گئے ہیں۔

غمزدہ والد نے بتایا کہ گزشتہ ماہ ان کے 12 سالہ اور 3 سالہ بیٹوں میں ایچ آئی وی کی تصدیق ہوئی تھی۔ ہماری بیٹی چیسٹ انفیکشن کے باعث اسپتال میں زیر علاج تھی۔

انہوں نے مزید بتایا کہ جب اس کی طبیعت نہ سنبھلی تو ٹیسٹ کرایا اور جب اس کی رپورٹ آئی تو ہم پر جیسے آسمان ٹوٹ پڑا کیونکہ ہماری تیسری اولاد میں بھی ایچ آئی وی کی تصدیق ہو گئی۔

اس کے علاوہ میٹرول کی رہائشی تین سالہ بچی میں بھی ایچ آئی وی کی تصدیق ہوئی ہے۔مذکورہ بچی کے والدین کا کہنا ہے کہ ہماری بیٹی کا بھی ولیکا اسپتال میں علاج ہوا تھا، طبیعت بگڑنے پر جب اس کا ٹیسٹ کرایا تو ایچ آئی وی پازیٹو آیا۔

والدین نے حکام بالا سے مطالبہ کیا ہے کہ ہمارے بچوں کی زندگیوں سے کھیلنے والے ذمہ داروں کے خلاف سخت کارروائی کر کے انہیں نشانہ عبرت بنایا جائے، تاکہ مستقبل میں کوئی اور بچہ اس موذی مرض کا شکار نہ ہو۔

اسلام آباد(بولونیوز)وفاقی حکومت نے روایتی (مینول) سرنجز پر مکمل پابندی عائد کرنے کا فیصلہ کر لیا ہے۔ذرائع کے مطابق ڈرگ ریگولیٹری اتھارٹی (ڈریپ) نے روایتی سرنجز پر پابندی کے لیے ورکنگ مکمل کر لی ہے، جس کے تحت ایک سے 10 سی سی حجم کی تمام روایتی سرنجز کی درآمد، تیاری، فروخت اور استعمال پر پابندی عائد ہوگی۔

ذرائع کا کہنا ہے کہ روایتی سرنجز پر ’’مکمل پابندی‘‘ کے لیے یکم جولائی کا جاری کردہ حکم نامہ منسوخ کیا جائے گا۔ یاد رہے کہ یکم جولائی کو 3 اور 10 سی سی کی روایتی سرنجز پر پابندی عائد کی گئی تھی۔

ذرائع کے مطابق روایتی سرنجز پر مکمل پابندی کے فیصلے سے قبل تمام متعلقہ فریقین سے مشاورت کی گئی، اور یہ فیصلہ طویل مشاورت کے بعد کیا گیا ہے، اگرچہ اس معاملے پر اسٹیک ہولڈرز کے درمیان مکمل اتفاق رائے موجود نہیں تھا۔

پشاور(بولونیوز)پشاور الیکٹرک سپلائی کمپنی (پیسکو) نے ملازمین کی ترقیوں کے عمل کو آڈٹ کلیئرنس سے مشروط کر دیا ہے۔ جاری کردہ نوٹیفکیشن کے مطابق لائن سپرنٹنڈنٹس گریڈ 1 اور 2 سمیت اہل ملازمین کو ترقی سے قبل “نو پینڈنگ آڈٹ پیرا سرٹیفکیٹ” حاصل کرنا لازمی ہوگا۔

نوٹیفکیشن کے مطابق جن ملازمین کے خلاف آڈٹ اعتراضات زیر التوا ہوں گے، انہیں اعتراضات ختم ہونے تک ترقی نہیں دی جائے گی۔ پیسکو حکام نے تمام ڈویژنل سربراہان کو ہدایت کی ہے کہ زیر التوا آڈٹ اعتراضات فوری طور پر نمٹائے جائیں۔

پیسکو کے مطابق پروموشن بورڈ کے انعقاد سے قبل تمام اہل ملازمین کی ڈویژنل آڈٹ کلیئرنس لازمی ہوگی، جبکہ متعلقہ دفاتر کو سات روز کے اندر آڈٹ کلیئرنس رپورٹ جمع کرانے کی ہدایت بھی جاری کر دی گئی ہے۔ نوٹیفکیشن میں واضح کیا گیا ہے کہ آڈٹ کلیئرنس میں تاخیر کی ذمہ داری متعلقہ فارمیشنز اور ڈویژنز پر عائد ہوگی۔

اسلام آباد(بولونیوز)سعودی عرب میں مقیم پاکستانیوں کے لیے خوشخبری ہے کہ ان کے لیے بڑی سہولت بحال کر دی گئی ہے۔سعودی عرب کے شہر مدینہ منورہ میں مقیم پاکستانیوں کے لیے خوشخبری ہے کہ خدمات کی معطلی کے بعد نادرا آفس نے آج سے اپنی خدمات کا سلسلہ دوبارہ شروع کر دیا ہے۔

مدینہ منورہ اور نواحی علاقوں میں مقیم پاکستانی شہری آج (اتوار) سے نادرا کی خدمات سے مستفید ہو سکیں گے۔نادرا کی مدینہ منورہ میں یہ خدمات سعودی حکومت کی ہدایات پر حج سیزن کے دوران معطل کی گئی تھیں۔

کرک(بولونیوز) سیکیورٹی ذرائع کے مطابق ضلع کرک میں انٹیلی جنس اطلاعات کی بنیاد پر کیے گئے انسدادِ دہشت گردی آپریشن کے دوران کالعدم تحریک طالبان پاکستان (ٹی ٹی پی) سے منسلک ظاہد گروپ کے چار مبینہ دہشت گرد ہلاک کر دیے گئے۔

ذرائع کے مطابق کارروائی وارفرنٹ آپریشنز کے تحت کی گئی، جس میں سیکیورٹی فورسز نے مبینہ دہشت گردوں کے ٹھکانے کو نشانہ بنایا۔ آپریشن کے بعد علاقے میں کلیئرنس اور سرچ کارروائیاں بھی جاری رہیں۔

حکام کا کہنا ہے کہ علاقے میں دہشت گرد عناصر کے خاتمے اور امن و امان کی بحالی کے لیے انٹیلی جنس بنیادوں پر کارروائیاں جاری رہیں گی۔ تاہم اس کارروائی کی تفصیلات اور دعوؤں کی آزاد ذرائع سے تاحال تصدیق نہیں ہو سکی ہے۔

اسلام آباد(بولونیوز) پٹرول اور ڈیزل کے بعد مٹی کے تیل کی قیمت میں بھی اضافہ کر دیا گیا ہے۔ آئل اینڈ گیس ریگولیٹری اتھارٹی (اوگرا) نے نئی قیمتوں کا نوٹیفکیشن جاری کر دیا۔

نوٹیفکیشن کے مطابق مٹی کے تیل کی قیمت میں 11 روپے 19 پیسے فی لیٹر اضافہ کیا گیا ہے، جس کے بعد اس کی نئی قیمت 242 روپے 33 پیسے فی لیٹر مقرر کر دی گئی ہے۔

نئی قیمتوں کا اطلاق فوری طور پر کر دیا گیا ہے۔ مٹی کے تیل کی قیمت میں اضافے سے بالخصوص ان علاقوں کے صارفین متاثر ہونے کا امکان ہے جہاں گھریلو ضروریات اور حرارتی مقاصد کے لیے مٹی کا تیل استعمال کیا جاتا ہے۔