112 چالان والی موٹرسائیکل پکڑی گئی، جرمانہ 2 لاکھ سے تجاوز
لاہور(بولونیوز)لاہور میں لاہور ٹریفک پولیس نے کارروائی کرتے ہوئے ایسی موٹرسائیکل کو تحویل میں لے لیا جس کے خلاف مجموعی طور پر 112 ٹریفک چالان درج تھے۔
ٹریفک پولیس کے مطابق شہری نے 55 مرتبہ بغیر ہیلمٹ موٹرسائیکل چلائی، 20 بار ٹریفک سگنل توڑے، 28 مرتبہ لین لائن کی خلاف ورزی کی جبکہ 8 مرتبہ اوورسپیڈنگ میں ملوث پایا گیا۔
بار بار ٹریفک قوانین کی خلاف ورزی کے باعث موٹرسائیکل پر واجب الادا جرمانوں کی مجموعی رقم 2 لاکھ 7 ہزار 800 روپے تک جا پہنچی، جس پر موٹرسائیکل ضبط کر کے قانونی کارروائی شروع کر دی گئی۔
ٹریفک پولیس نے شہریوں سے اپیل کی ہے کہ اپنی اور دوسروں کی جانوں کے تحفظ کے لیے ٹریفک قوانین پر عمل کریں۔
