امریکی صدر کی ایران کے خلاف مزید سخت فوجی کارروائی کی وارننگ
واشنگٹن(بولونیوز)امریکی صدر ڈونلڈ ٹرمپ نے ایران کے خلاف مزید سخت فوجی کارروائی کی وارننگ دیتے ہوئے کہا ہے کہ امریکی فوج نے جنگ بندی معاہدے کی خلاف ورزی پر ایران کو نشانہ بنایا ہے۔
سوشل میڈیا پر جاری اپنے پیغام میں امریکی صدر نے دعویٰ کیا کہ امریکی افواج نے ایرانی میزائل اور ڈرون اسٹوریج کے مقامات کے ساتھ ساتھ ریڈار سائٹس پر حملے کیے ہیں۔ ان کا کہنا تھا کہ یہ کارروائیاں جنگ بندی معاہدے کی خلاف ورزی کے جواب میں کی گئیں۔
ڈونلڈ ٹرمپ نے مزید کہا کہ ’’ایسا وقت بھی آ سکتا ہے کہ ہم مزید تحمل کا مظاہرہ کرنے کے قابل نہ رہیں اور ہمیں فوجی طریقے سے اس کام کو مکمل کرنے پر مجبور ہونا پڑے گا، جو ہم نے کامیابی سے شروع کیا تھا۔‘‘
امریکی صدر نے سخت لہجے میں خبردار کرتے ہوئے کہا کہ اگر ایسی صورتحال پیدا ہوئی تو اسلامی جمہوریہ ایران کا وجود ختم ہو جائے گا۔ ان بیانات کے بعد خطے میں کشیدگی میں مزید اضافے کے خدشات ظاہر کیے جا رہے ہیں۔
