فیلڈ مارشل جنرل عاصم منیر نے چیف آف ڈیفنس فورسز کا باقاعدہ چارج سنبھال لیا
اسلام آباد(بولونیوز) فیلڈ مارشل جنرل عاصم منیر نے ملک کے پہلے چیف آف ڈیفنس فورسز (CDF) کے طور پر باقاعدہ طور پر عہدے کا چارج سنبھال لیا ہے۔ اس سلسلے میں صدرِ پاکستان آصف علی زرداری نے وزیراعظم کی ایڈوائس پر تقرری کا باضابطہ نوٹیفکیشن جاری کر دیا۔
وزارتِ دفاع کے مطابق یہ تقرری 22ویں آئینی ترمیم ایکٹ 2025 کے تحت عمل میں آئی، جس کے بعد پاکستان آرمی ایکٹ 1952 میں بھی ضروری ترامیم کی گئیں۔ نئے قائم شدہ عہدے کے تحت جنرل عاصم منیر بیک وقت چیئرمین جوائنٹ چیفس آف اسٹاف کمیٹی (CJCSC) اور چیف آف ڈیفنس فورسز کی ذمہ داریاں ادا کریں گے۔
وزارتِ دفاع کے اعلامیے میں کہا گیا ہے کہ چیف آف ڈیفنس فورسز کا عہدہ تینوں مسلح افواج — آرمی، نیوی اور ایئر فورس — کی متحدہ کمان، اسٹریٹجک نگرانی اور قومی دفاعی پالیسی کی ہم آہنگی کو یقینی بنانے کے لیے تخلیق کیا گیا ہے۔ چیف آف ڈیفنس فورسز ملک کی اعلیٰ عسکری مشاورت فراہم کرنے والی مرکزی شخصیت ہوں گے۔
نوٹیفکیشن میں تمام وفاقی وزارتوں، ڈویژنز، عسکری و سول اداروں کو ہدایت کی گئی ہے کہ وہ چیف آف ڈیفنس فورسز کے ساتھ مکمل تعاون یقینی بنائیں تاکہ نئی دفاعی حکمت عملی کے مطابق انتظامی امور مؤثر انداز میں نمٹائے جا سکیں۔
وزیراعظم شہباز شریف اور صدرِ پاکستان آصف علی زرداری کے دستخطوں کے ساتھ جاری ہونے والے اس نوٹیفکیشن کے بعد جنرل عاصم منیر کی بطور چیف آف ڈیفنس فورسز تقرری فوری طور پر نافذ العمل ہو گئی ہے۔
