’ٹرمپ سے تعلقات ٹھیک ہیں، ترکی کو ایف 35 طیارے نہیں لینے دیں گے
اسرائیل(بولونیوز) وزیراعظم بینجمن نیتن یاہو نے امریکا کے سابق صدر ڈونلڈ ٹرمپ کے ساتھ تعلقات کو ٹھیک اور مضبوط قرار دیتے ہوئے ترکی کو نشانہ بنایا ہے۔
ایک انٹرویو میں نیتن یاہو نے کہا کہ امریکا اور اسرائیل کے درمیان اختلافات ہو سکتے ہیں، تاہم دونوں ممالک ’’ماڈل اتحادی‘‘ ہیں۔ ان کا کہنا تھا کہ صدر کے ساتھ میرے تعلقات درست ہیں اور ہمارے پاس اپنے اختلافات کو اتحادیوں کی طرح باہمی احترام کے ساتھ حل کرنے کا طریقہ موجود ہے۔
اسرائیلی وزیراعظم نے تصدیق کی کہ وہ جلد ہی امریکا کا دوبارہ دورہ کریں گے، تاہم اس دورے کی حتمی تاریخ تاحال طے نہیں کی گئی۔
ممکنہ دورۂ امریکا کے ایجنڈے سے متعلق سوال پر نیتن یاہو نے ترکی کو تنقید کا نشانہ بناتے ہوئے کہا کہ وہ انقرہ کو ایف-35 لڑاکا طیاروں کی فراہمی کے خلاف لابنگ کریں گے۔ ان کا کہنا تھا کہ وہ نہیں سمجھتے کہ ترکی کو ایف-35 طیارے یا ان کے انجن دیے جانے چاہئیں، کیونکہ اس سے مشرقِ وسطیٰ میں طاقت کا توازن بگڑ سکتا ہے، جو نہ صرف اسرائیلی فضائی برتری بلکہ خطے میں امریکا کے مفادات کے لیے بھی اہم ہے۔
واضح رہے کہ ترکی، جو امریکا کا نیٹو اتحادی ہے، غزہ پر اسرائیل کی کارروائیوں کا کھل کر ناقد رہا ہے۔ ادھر ٹرمپ رواں ہفتے کے اختتام پر نیٹو سربراہی اجلاس کے لیے انقرہ کا دورہ کرنے والے ہیں۔
