وفاقی حکومت کی سرکاری ملازمین کے اہلِ خانہ کے لیے اہم ہدایت

اسلام آباد(بولونیوز) وفاقی حکومت نے سپریم کورٹ آف پاکستان کے فیصلے کی روشنی میں ایک اہم ہدایت جاری کر دی ہے، جس کے تحت 18 اکتوبر 2024 سے قبل وفات پا جانے والے وفاقی سرکاری ملازمین کے ایک بیٹے یا بیٹی کو ملازمت دینے کی اجازت دی گئی ہے۔

سرکاری ذرائع کے مطابق یہ ہدایت سپریم کورٹ کے فیصلے پر عملدرآمد کے طور پر جاری کی گئی ہے، جس کا مقصد فوت شدہ ملازمین کے اہلِ خانہ کو معاشی تحفظ فراہم کرنا ہے۔ فیصلے کے تحت متعلقہ اداروں کو پابند کیا گیا ہے کہ وہ مقررہ تاریخ سے قبل وفات پانے والے ملازمین کے بچوں کے کیسز کو قواعد و ضوابط کے مطابق نمٹائیں۔

ذرائع کا کہنا ہے کہ ملازمت کی فراہمی کا عمل مروجہ سروس رولز اور متعلقہ محکموں کی سفارشات کے تحت مکمل کیا جائے گا، جبکہ اہل امیدواروں کی جانچ پڑتال کے بعد تقرری عمل میں لائی جائے گی۔وفاقی حکومت کی اس ہدایت کو سرکاری ملازمین کے اہلِ خانہ کے لیے اہم ریلیف قرار دیا جا رہا ہے۔