کاواساکی کی 20 سال بعد بڑی واپسی، نئی ٹو اسٹروک بائیک متعارف
ٹوکیو(بولونیوز)جاپانی موٹر سائیکل ساز کمپنی Kawasaki نے 20 سال بعد بڑی انجن والی ٹو اسٹروک موٹر سائیکل مارکیٹ میں دوبارہ متعارف کرا دی ہے۔ کمپنی کی جانب سے نئی آف روڈ موٹر سائیکل Kawasaki KX327X باضابطہ طور پر لانچ کر دی گئی ہے، جسے 300 سیریز ٹو اسٹروک بائیکس کی شاندار واپسی قرار دیا جا رہا ہے۔
یہ نیا ماڈل موٹوکراس کے لیے تیار کیے گئے KX327 کے ساتھ متعارفا کرایا گیا ہے اور خاص طور پر کراس کنٹری، اینڈورو اور جنگلی و پہاڑی ٹریکس پر موٹر سائیکل چلانے کے شوقین افراد کو مدِنظر رکھتے ہوئے ڈیزائن کیا گیا ہے۔
بائیک کی سب سے نمایاں خصوصیت اس کا 327 سی سی مائع سے ٹھنڈا ہونے والا ٹو اسٹروک انجن ہے، جو جدید فیول انجیکشن سسٹم سے لیس ہے۔ ماہرین کے مطابق یہ انجن طاقت، بہتر فیول مینجمنٹ اور آف روڈ کارکردگی کے لحاظ سے ایک نمایاں اضافہ ثابت ہو سکتا ہے۔
موٹر سائیکل شائقین کا کہنا ہے کہ کاواساکی کی یہ واپسی ٹو اسٹروک بائیکس کے مداحوں کے لیے ایک بڑی خوشخبری ہے اور یہ ماڈل آف روڈ ریسنگ کی دنیا میں ایک نیا مقابلہ پیدا کر سکتا ہے۔
