ضلعی عدلیہ کے ملازمین کے الاؤنسز میں اضافہ نہ کرنے پر توہینِ عدالت کی درخواست دائر
کراچی(بولونیوز)ضلعی عدلیہ کے ملازمین کے الاؤنسز میں اضافہ نہ کرنے کے معاملے پر عدالتی حکم پر عمل درآمد نہ ہونے کے خلاف توہینِ عدالت کی درخواست دائر کر دی گئی ہے۔ درخواست میں مؤقف اختیار کیا گیا ہے کہ عدالت نے قبل ازیں ضلعی عدلیہ کے ملازمین کے الاؤنسز کو ہائی کورٹ ملازمین کے مساوی کرنے کا حکم دیا تھا، تاہم احکامات کے باوجود متعلقہ محکموں نے کوئی اضافہ نہیں کیا۔
درخواست گزار کے مطابق ضلعی عدلیہ کے ملازمین کو تاحال ہائی کورٹ ملازمین کے برابر جوڈیشل الاؤنس اور یوٹیلیٹی الاؤنس نہیں دیا جا رہا، جو کہ ایک ہی صوبے کے ملازمین میں امتیاز برتنے کے مترادف ہے اور قانون کے منافی ہے۔
عدالت نے توہینِ عدالت کی درخواست کی سماعت 2 دسمبر کو مقرر کر دی ہے، جبکہ فریقین کو نوٹسز جاری کیے جا چکے ہیں۔
درخواست میں مؤقف اختیار کیا گیا ہے کہ عدالتی احکامات کے باوجود الاؤنسز میں اضافہ نہ کرنا واضح طور پر توہینِ عدالت کے زمرے میں آتا ہے، اس لیے ذمہ داران کے خلاف کارروائی کی جائے۔
