کراچی(بولونیوز)گلستانِ جوہر میں پاکستان رینجرز کی چوکی پر دہشت گردوں کی بزدلانہ کارروائی کی ہیومن رائٹس پروٹیکشن اینڈ سوشل جسٹس کی جانب سے شدید الفاظ میں مذمت کی گئی ہے۔
ادارے کے ترجمان نے اپنے بیان میں کہا کہ ایسے مذموم اور شرمناک حملے نہ صرف قومی امن و استحکام پر حملہ ہیں بلکہ پوری پاکستانی قوم کے حوصلے کو کمزور کرنے کی ناکام کوشش بھی ہیں۔ انہوں نے واضح کیا کہ دہشت گردی کے بزدلانہ ہتھکنڈے قوم کے عزم و حوصلے کو متزلزل نہیں کر سکتے۔
بیان میں کہا گیا کہ ادارہ اپنے تمام سیکیورٹی اداروں، رینجرز، پاک فوج، پولیس اور دیگر قانون نافذ کرنے والے اداروں کے ساتھ شانہ بشانہ کھڑا ہے۔ دشمن کو یہ پیغام دیا گیا کہ پاکستانی قوم ایک زندہ، باہمت اور غیرت مند قوم ہے جو ہر سازش کو ناکام بنانے کی صلاحیت رکھتی ہے۔
ہیومن رائٹس پروٹیکشن اینڈ سوشل جسٹس نے شہداء اور غازیوں کی عظیم قربانیوں کو خراجِ عقیدت پیش کرتے ہوئے کہا کہ اللہ رب العزت نے ہمارے جوانوں کو جرات، بہادری اور استقامت عطا فرمائی ہے جس کے باعث وہ دشمن کے ہر ناپاک ارادے کو ناکام بنانے کی مکمل صلاحیت رکھتے ہیں۔ ادارے نے اس عزم کا اعادہ کیا کہ وطنِ عزیز کے امن، سلامتی اور استحکام کے لیے ہر ممکن کردار ادا کرتا رہے گا۔