Category: انٹرنیشنل نیوز

لندن(بولونیوز)آئی سی سی ویمنز ٹی ٹوئنٹی ورلڈ کپ کے فائنل میں آسٹریلیا ویمنز کرکٹ ٹیم نے شاندار کارکردگی کا مظاہرہ کرتے ہوئے انگلینڈ ویمنز کرکٹ ٹیم کو شکست دے کر ریکارڈ ساتویں بار ویمنز ٹی ٹوئنٹی چیمپئن بننے کا اعزاز حاصل کر لیا۔

فائنل میچ تاریخی میدان لارڈز میں کھیلا گیا، جہاں انگلینڈ نے پہلے بیٹنگ کرتے ہوئے 4 وکٹوں کے نقصان پر 150 رنز بنائے۔ انگلینڈ کی کپتان نیٹ برنٹ 58 رنز بنا کر ناٹ آؤٹ رہیں، جبکہ فریاک یمپ نے 28 گیندوں پر جارحانہ 44 رنز اسکور کیے۔

آسٹریلیا کی جانب سے ہیملٹن، گارتھ، سوفی مولینی اور سدرلینڈ نے ایک ایک وکٹ حاصل کی۔ہدف کے تعاقب میں آسٹریلوی ٹیم نے عمدہ بیٹنگ کا مظاہرہ کرتے ہوئے 151 رنز کا ہدف صرف 3 وکٹوں کے نقصان پر حاصل کر لیا اور ٹائٹل اپنے نام کر لیا۔

واضح رہے کہ دونوں ٹیمیں رواں ورلڈ کپ میں ناقابلِ شکست رہیں۔ آسٹریلیا ریکارڈ آٹھویں بار فائنل میں پہنچی تھی، جبکہ انگلینڈ اس سے قبل ایک بار ویمنز ٹی ٹوئنٹی ورلڈ کپ کا ٹائٹل جیت چکا ہے۔

بینکاک(بولونیوز)تھائی پاک بزنس فورم کے زیرِ اہتمام بینکاک کے ایک نجی ہوٹل میں رخسانہ افضال کے اعزاز میں پروقار الوداعی تقریب منعقد ہوئی۔ تقریب کا آغاز پاکستان اور تھائی لینڈ کے قومی ترانوں سے ہوا۔

تقریب میں تھائی پاک بزنس فورم کے چیئرمین افتخار علی، صدر شاہین یوسف اعوان، سینئر نائب صدر ملک ارشد حیات، جنرل سیکریٹری سہیل کوثر، ایگزیکٹو کمیٹی کے ارکان سمیت تجارتی و سفارتی رہنماؤں کی بڑی تعداد نے شرکت کی۔ مہمانوں میں کینیا کی سفیر لوسی نجیری کیروتھو، سی ای او مائی ٹرپ بینکاک ایکارات موکیم، سابق تھائی سینیٹر سریوات اور تھائی پاکستان فرینڈشپ ایسوسی ایشن کے صدر سومکت لالا بھی شامل تھے۔

صدر شاہین یوسف اعوان نے رخسانہ افضال کی خدمات کو سراہتے ہوئے کہا کہ ان کی کاوشوں سے پاکستان اور تھائی لینڈ کے درمیان دوستی، شراکت داری اور تعاون کو فروغ ملا، خصوصاً تھائی لینڈ میں مقیم پاکستانی برادری کی فلاح و بہبود کے لیے ان کا کردار قابلِ تحسین ہے۔

اپنے خطاب میں رخسانہ افضال نے کہا کہ مختصر دورِ ماموریت کے دوران انہوں نے پاکستانی اور تھائی کاروباری برادریوں کو قریب لانے کی بھرپور کوشش کی، جس کے مثبت نتائج سامنے آئے۔ انہوں نے کہا کہ تھائی لینڈ سے وہ قیمتی تجربات اور یادیں سمیٹ کر جا رہی ہیں، اور پاکستان کے لیے تین شعبے قابلِ تقلید ہیں: سیاحت کی ترقی، حلال سینٹر کی کامیابی اور “ورلڈز کچن” کے طور پر عالمی معیار کے کھانے۔

رخسانہ افضال نے تھائی سیاحوں کو پاکستان آنے کی دعوت دیتے ہوئے کہا کہ پاکستان مذہبی سیاحت کے ساتھ ساتھ ایڈونچر ٹورازم اور ثقافتی سیاحت کے لیے بھی بہترین منزل ہے، جہاں پہاڑ، دریا، جھیلیں، باغات، جنگلات، برفباری والے علاقے، لذیذ کھانے اور وسیع صحرا سیاحوں کو اپنی جانب متوجہ کرتے ہیں۔

تقریب کے اختتام پر صدر شاہین یوسف اعوان اور جنرل سیکریٹری سہیل کوثر کی جانب سے رخسانہ افضال کو گلدستہ پیش کیا گیا، جبکہ شرکاء نے ان کی سفارتی خدمات کو خراجِ تحسین پیش کرتے ہوئے آئندہ ذمہ داریوں کے لیے نیک خواہشات کا اظہار کیا۔

نیویارک(بولونیوز)فیفا فٹبال ورلڈ کپ 2026 کے پری کوارٹر فائنل میچ میں ناروے نے شاندار کارکردگی کا مظاہرہ کرتے ہوئے 5 بار کی عالمی چیمپئن برازیل کو 1-2 سے شکست دے کر ایونٹ سے باہر کر دیا اور کوارٹر فائنل کے لیے کوالیفائی کر لیا۔

میچ نیو جرسی میں کھیلا گیا، جہاں ناروے نے ابتدا سے ہی جارحانہ کھیل پیش کیا۔ ناروے کی جانب سے دونوں گول اسٹار فارورڈ ایرلنگ ہالینڈ نے اسکور کیے۔ انہوں نے پہلا گول 79ویں منٹ میں کیا جبکہ دوسرا فیصلہ کن گول 90ویں منٹ میں داغ کر اپنی ٹیم کی فتح یقینی بنا دی۔

برازیل کی جانب سے واحد گول میچ کے اختتامی لمحات میں اسٹار فٹبالر نیمار جونیئر نے پنالٹی کک پر اسکور کیا، تاہم یہ گول ٹیم کو شکست سے نہ بچا سکا۔

اس فتح کے ساتھ ناروے نے کوارٹر فائنل میں جگہ بنا لی، جبکہ برازیل کا ورلڈ کپ 2026 کا سفر پری کوارٹر فائنل مرحلے پر ہی اختتام پذیر ہو گیا۔

دوسری جانب فیفا ورلڈ کپ 2026 کے پری کوارٹر فائنل میں ناروے کے ہاتھوں شکست کے بعد ایونٹ سے باہر ہونے والی برازیل کو ایک اور بڑا دھچکا اس وقت لگا جب ٹیم کے اسٹار فٹبالر نیمار جونیئر نے فٹبال سے ریٹائرمنٹ کا اعلان کر دیا۔

ناروے کے خلاف شکست کے بعد برازیلین صحافیوں سے گفتگو کرتے ہوئے نیمار نے کہا،“میں نے پوری کوشش کی، یہ سب یہاں اسی اسٹیڈیم میں شروع ہوا تھا اور میں نے یہیں اس کا اختتام کیا۔ اب یہ سب ختم ہو چکا ہے۔”

نیمار کے اس اعلان نے فٹبال شائقین کو حیران کر دیا ہے، کیونکہ وہ طویل عرصے سے برازیل کی قومی ٹیم کی پہچان سمجھے جاتے رہے ہیں۔ ان کے کیریئر میں ورلڈ کپ، کوپا امریکا اور کلب فٹبال میں متعدد یادگار کامیابیاں شامل ہیں۔

پری کوارٹر فائنل میں برازیل کی شکست اور نیمار کی ریٹائرمنٹ نے فیفا ورلڈ کپ 2026 کو مزید یادگار بنا دیا ہے، جبکہ دنیا بھر کے فٹبال مداح ایک عہد کے اختتام پر اپنے جذبات کا اظہار کر رہے ہیں۔

کینیا(بولونیوز)ارشد شریف کے قتل کیس میں ایک اور اہم پیش رفت سامنے آ گئی ہے، جہاں Supreme Court of Kenya نے دائر کی گئی اپیل مسترد کر دی ہے۔

عدالتِ عظمیٰ نے اپنے فیصلے میں کہا ہے کہ وہ واقعے میں ملوث اہلکاروں کے خلاف براہِ راست کارروائی کا حکم جاری کرنے کی مجاز نہیں۔ فیصلے میں یہ بھی کہا گیا کہ دستیاب شواہد کی بنیاد پر یہ ثابت نہیں ہوتا کہ ارشد شریف کو قتل سے قبل تشدد کا نشانہ بنایا گیا تھا۔

عدالت نے واضح کیا کہ اگر کسی قسم کی فوجداری کارروائی مقصود ہے تو اس کے لیے متعلقہ قانونی فورمز سے رجوع کیا جائے۔ سپریم کورٹ کے مطابق یہ معاملہ اس کے دائرہ اختیار سے باہر ہے۔

یاد رہے کہ ارشد شریف کو کینیا میں فائرنگ کے واقعے میں قتل کیا گیا تھا، جس پر نہ صرف پاکستان بلکہ عالمی سطح پر بھی شدید ردِعمل سامنے آیا تھا۔ فیصلے کے بعد مقتول کے اہلِ خانہ اور صحافتی حلقوں کی جانب سے ایک بار پھر انصاف کی فراہمی پر سوالات اٹھنے لگے ہیں۔

غزہ(بولونیوز)اسرائیلی جارحیت کے ایک ہزار دن مکمل ہو گئے، جہاں نسل کشی کے نتیجے میں انسانی المیہ مزید سنگین صورت اختیار کر چکا ہے۔

مقامی وزارتِ صحت کے مطابق اب تک تقریباً 73 ہزار فلسطینی شہید ہو چکے ہیں، جبکہ ایک لاکھ 73 ہزار سے زائد افراد زخمی ہوئے ہیں۔ زخمیوں میں 42 ہزار سے زیادہ ایسے افراد شامل ہیں جنہیں شدید نوعیت کے زخموں کے باعث فوری اور خصوصی طبی علاج کی اشد ضرورت ہے۔

وزارتِ صحت کا کہنا ہے کہ جنگ کے دوران اکتوبر 2023 سے قبل فعال طبی نظام بری طرح متاثر ہوا ہے، جہاں 94 فیصد طبی مراکز کسی نہ کسی درجے میں تباہ یا غیر فعال ہو چکے ہیں۔ اس صورتحال کے باعث ہزاروں مریضوں کے لیے علاج کی واحد امید بیرونِ ملک منتقلی رہ گئی ہے۔

تاہم وزارتِ صحت کے مطابق اسرائیل اب بھی 17 ہزار مریضوں اور زخمیوں کو، جنہیں بیرونِ ملک علاج کے لیے باقاعدہ طبی ریفرل جاری ہو چکا ہے، سفر کی اجازت نہیں دے رہا۔ اس تاخیر کے باعث مریضوں کی حالت روز بروز بگڑ رہی ہے اور اموات میں خطرناک حد تک اضافہ ہو رہا ہے۔

طبی حکام نے عالمی برادری سے فوری مداخلت اور انسانی بنیادوں پر مریضوں کو علاج کی اجازت دلوانے کا مطالبہ کرتے ہوئے خبردار کیا ہے کہ اگر صورتحال یہی رہی تو اموات کی تعداد میں مزید اضافہ ناگزیر ہو جائے گا۔

استنبول(بولونیوز)وزیراعظم محمد شہباز شریف نے استنبول میں ترکیہ کے سرکردہ کاروباری گروپوں اور صنعتی تنظیموں کے اعلیٰ عہدیداران سے اہم ملاقاتیں کیں، جن میں پاکستان میں سرمایہ کاری کے مواقع اور دوطرفہ اقتصادی تعاون پر تفصیلی تبادلۂ خیال کیا گیا۔

وزیراعظم سے چالک ہولڈنگ کے چیئرمین احمد چالک، البیرک گروپ کے بورڈ آف ڈائریکٹرز کے چیئرمین احمد البیرک اور یونین آف دی چیمبرز اینڈ کموڈیٹی ایکسچینجز آف ترکیہ کے صدر رفعت حصارسیکیعلو نے الگ الگ ملاقاتیں کیں۔

ان ملاقاتوں میں وزیراعظم نے پاکستان اور ترکیہ کے درمیان گہرے برادرانہ تعلقات کو اجاگر کرتے ہوئے کہا کہ دونوں ممالک کے مضبوط سیاسی اور تاریخی رشتوں کو ایک جامع اقتصادی اور سرمایہ کاری شراکت داری میں تبدیل کرنے کی ضرورت ہے۔ انہوں نے توانائی، انفرااسٹرکچر، صنعت، زراعت اور ٹیکنالوجی سمیت معیشت کے کلیدی شعبوں میں ترک سرمایہ کاری کا خیرمقدم کیا۔

وزیراعظم نے سرمایہ کاروں کو یقین دہانی کرائی کہ پاکستان کاروبار دوست اصلاحات، سرمایہ کاری کے تحفظ اور سہولت کاری کے لیے پرعزم ہے، جبکہ ترک کاروباری رہنماؤں نے پاکستان میں طویل المدتی سرمایہ کاری میں دلچسپی کا اظہار کیا۔

دمشق(بولونیوز) دمشق میں سابق شامی حکومت کے ایک بدنام فوجی افسر کی گرفتاری عمل میں آ گئی ہے، جو مخالفین اور عام شہریوں کو قتل کرنے کے بعد لاشوں پر پاؤں رکھ کر ویڈیوز بنانے اور انہیں سوشل میڈیا پر اپلوڈ کرنے کے لیے بدنام تھا۔

ذرائع کے مطابق شام میں مبینہ طور پر چھ لاکھ مسلمانوں کے قتلِ عام میں ملوث سابقہ حکومت کے ظالم افسران کو ایک ایک کر کے گرفتار کیا جا رہا ہے۔ حالیہ گرفتاری سہیل الحسن کی ہے، جو سابق صدر بشارت الاسد کی حکومت کے دوران ایک بااثر فوجی افسر رہا اور سینکڑوں قتلِ عام میں ملوث ہونے کے الزامات کا سامنا ہے۔

ذرائع کا کہنا ہے کہ سہیل الحسن اپنے جرائم کی ویڈیوز خود بنواتا تھا، جن میں مقتولین کی لاشوں پر پاؤں رکھ کر طاقت اور ظلم کا مظاہرہ کیا جاتا، اور بعد ازاں یہ ویڈیوز سوشل میڈیا پر اپلوڈ کی جاتی تھیں تاکہ خوف و ہراس پھیلایا جا سکے۔

گرفتاری کے بعد حکام نے سہیل الحسن کو اس کے جرائم کی ویڈیوز دکھائیں، جس پر اس نے ندامت اور شرمندگی کا اظہار کرتے ہوئے اعتراض بھی کیا اور اپنے جرائم پر توبہ کرتے ہوئے معافی کی اپیل کی۔ تاہم قتل کیے گئے افراد کے لواحقین نے کسی قسم کی رعایت مسترد کرتے ہوئے انصاف اور سخت ترین سزاؤں کا مطالبہ کیا ہے۔

واشنگٹن(بولونیوز)امریکی صدر ڈونلڈ ٹرمپ نے کہا ہے کہ انسانی ہمدردی کی بنیاد پر ایران کو رسومات کی ادائیگی کے لیے ایک ہفتے کی مہلت دی ہے۔

ریاست ڈکوٹا میں امریکا کی 250 ویں سالگرہ کی مناسبت سے منعقدہ ایک تقریب سے خطاب کرتے ہوئے انہوں نے ایران اور امریکا کے حالیہ تعلقات اور مذاکراتی عمل پر اہم گفتگو کی۔

اپنے خطاب میں ٹرمپ نے امریکی طاقت اور فوجی برتری کا ذکر کرتے ہوئے دعویٰ کیا کہ امریکا نے وینزویلا کو 1 دن میں شکست دی اور ایران کو بھی سخت نقصان پہنچایا جس کے بعد ایران اب مذاکرات کا خواہاں ہے۔

امریکی صدر ڈونلڈ ٹرمپ نے کہا کہ امریکا نے انسانی ہمدردی کی بنیاد پر ایران کو سپریم لیڈر آیت اللہ علی خامنہ ای کی آخری رسومات اور سوگ کی ادائیگی کے لیے ایک ہفتے کی مہلت دی ہے، جس کے بعد مذاکرات کا سلسلہ دوبارہ وہیں سے شروع کیا جائے گا جہاں سے روکا گیا تھا۔

امریکی صدر کا مزید کہنا تھا کہ ایرانی قیادت اس وقت امریکا کے ساتھ کسی بھی قسم کا سمجھوتہ کرنے کے لیے ہر ممکن کوشش کر رہی ہے اور وہ نئی ڈیل کے لیے سخت بے چین ہیں۔

واضح رہے کہ ایران کے شہید رہبرِ اعلیٰ آیت اللّٰہ علی خامنہ ای کی سرکاری آخری رسومات کا باقاعدہ آغاز تہران کی مصلیٰ مسجد اور اس سے ملحقہ شاہراہوں پر ہو گیا ہے۔

دارالحکومت تہران میں لاکھوں سوگواروں کی آمد کے پیشِ نظر عظیم نماز گاہ کمپلیکس کے دروازے کھول دیے گئے ہیں، جہاں لوگ شہید رہبرِ اعلیٰ کو آخری خراجِ عقیدت پیش کرنے کے لیے جمع ہو رہے ہیں۔

ماسکو(بولونیوز)روس نے یوکرین کے خلاف جنگ میں ایک اور اہم کامیابی کا دعویٰ کرتے ہوئے یوکرینی شہر کوستیان تینیوکا پر مکمل قبضہ کر لیا ہے۔

روسی صدر ولادیمیر پیوٹن نے اس پیشرفت پر گفتگو کرتے ہوئے کہا ہے کہ یہ کامیابی یوکرین کے پورے ڈونئیسک ریجن پر کنٹرول حاصل کرنے کی جانب پہلا لیکن انتہائی کلیدی قدم ہے۔

انہوں نے مستقبل کے اہم فیصلوں اور جنگی حکمت عملی کے لیے یوکرین پر روسی حملوں میں مزید شدت لانے کی ہدایت کی ہے۔ اس کے ساتھ ہی انہوں نے انٹیلیجنس حکام پر زور دیا ہے کہ وہ یوکرینی دستوں میں لڑنے والے غیر ملکی جنگجوؤں کی اصل تعداد کا فوری پتا لگائیں۔

صدر پیوٹن نے یوکرین کو سخت وارننگ دیتے ہوئے کہا کہ یوکرینی فوج روسی انفرااسٹرکچر پر جس قدر حملے کرے گی، روس اپنے سیکیورٹی زون کو اسی حساب سے مزید وسعت دیتا چلا جائے گا۔

انہوں نے یورپی امن فوج (پیس کیپنگ فورس) کو شدید تنقید کا نشانہ بناتے ہوئے کہا کہ اس فورس کا مقصد تنازع کا حل تلاش کرنا نہیں بلکہ روس کے خلاف فوجی کارروائیاں جاری رکھنا ہے۔

روسی صدر نے محاذ جنگ کے قریب قائم فوج کے ایک اہم سپورٹ پوائنٹ کا دورہ بھی کیا، جہاں فوجی کمانڈروں نے انہیں جنگ کی تازہ ترین صورتحال اور آپریشنز کے حوالے سے تفصیلی بریفنگ دی۔

تہران(بولونیوز)ایران کے نائب وزیر خارجہ کاظم غریب آبادی نے غیر ملکی فورسز کو آبنائے ہرمز میں کسی بھی قسم کی فوجی نقل و حرکت سے خبردار کردیا۔

ایران کے نائب وزیر خارجہ کاظم غریب آبادی نے سماجی رابطے کی ویب سائٹ ‘ایکس’ پر جاری کردہ اپنے ایک اہم بیان میں بیرونی طاقتوں کو سخت خبردار کیا ہے کہ آبنائے ہرمز کو بیرونی قوتوں کی عسکری نمائش کا میدان نہیں بننے دیا جائے گا۔

ایرانی نائب وزیر خارجہ نے کہا کہ ایران ایک ذمہ دار طاقت ہے، لیکن وہ آبنائے ہرمز میں کسی بھی قسم کی غیر معمولی اور مشکوک فوجی نقل و حرکت پر سخت نظر رکھے ہوئے ہے اور اس حوالے سے متعلقہ قوتوں کو خبردار کرتا ہے۔

انہوں نے واضح کیا کہ آبنائے ہرمز کا امن و استحکام صرف اور صرف اس کی حدود سے جڑے ساحلی ممالک کی ذمہ داری ہے اور کسی بھی بیرونی مداخلت کی یہاں کوئی گنجائش نہیں ہے۔

کاظم غریب آبادی نے سخت لہجے میں انتباہ جاری کرتے ہوئے کہا کہ جو عناصر یا بیرونی طاقتیں خطے میں کسی بھی قسم کا بحران پیدا کرنے کی کوشش کریں گی، وہ اپنی اس مہم جوئی اور اس کے نتیجے میں نکلنے والے بھیانک نتائج کی خود ذمہ دار ہوں گی-