کراچی (بولونیوز) قطری شاہی خاندان کے رکن شیخ احمد بن ثانی کی وزیراعلیٰ سندھ سے ملاقات میں سندھ کے پانی اور زرعی شعبوں میں بھاری سرمایہ کاری پر اتفاق کیا گیا۔ قطری وفد کے سندھ کے دورے کے دوران دونوں طرف سرمایہ کاری میں نمایاں اضافے کے مواقع پر تبادلہ خیال ہوا۔
راولپنڈی (بولونیوز) پی ٹی آئی نے عوام سے اپیل کی ہے کہ وہ 25 نومبر کو اڈیالہ جیل کے باہر عمران خان کی فیملی کے ساتھ یکجہتی کا اظہار کریں۔ پارٹی رہنما عالیہ حمزہ نے کہا کہ عمران خان سے ملاقات ان کی فیملی کا آئینی، قانونی اور انسانی حق ہے۔
اسلام آباد (بولونیوز) الیکشن کمیشن آف پاکستان نے ضمنی انتخابات میں دھاندلی کے پی ٹی آئی رہنما اسد قیصر کے بیان کا نوٹس لے لیا ہے۔ ای سی پی نے پیمرا سے اس بیان کا ٹرانسکرپٹ طلب کر لیا ہے اور ٹرانسکرپٹ کی جانچ کے بعد قانونی کارروائی کرے گا۔
گلگت بلتستان (بولونیوز) اسمبلی آج رات 12 بجے تحلیل ہو رہی ہے۔ وزیراعظم شہباز شریف کو نگران وزیراعلیٰ کے لیے مصطفیٰ مدنی راوٹ، محمد علی قائد اور راجہ نظیم کے ناموں پر مشتمل سمری ارسال کی گئی ہے۔ وزیراعظم کی جانب سے نگران وزیراعلیٰ کے نام کا اعلان آج ہی متوقع ہے۔
کراچی (بولونیوز) پولیس نے شہریوں کو 5 دسمبر تک گاڑیوں کی نمبر پلیٹس درست کرانے کی مہلت دی ہے۔ احکامات کے مطابق جعلی یا چھیڑچھاڑ والی نمبر پلیٹس پر گرفتاری اور گاڑی ضبط کی جائے گی۔ یہ کارروائی سڑکوں پر قوانین کی خلاف ورزی روکنے کے لیے کی جا رہی ہے۔
لاہور (بولونیوز) ضمنی انتخابات کے نتائج کے مطابق مسلم لیگ ن نے 6 اضافی نشستیں جیت کر قومی اسمبلی میں اپنی کل نشستیں 132 کر لی ہیں۔ اس کامیابی کے بعد حکمران جماعت کو سادہ اکثریت کے لیے پیپلز پارٹی پر انحصار ختم ہو گیا ہے اور وہ دیگر اتحادیوں کے ساتھ آزادانہ طور پر قانون سازی کر سکے گی۔
کراچی (بولونیوز) ایک معروف بلڈر نے ایف آئی اے کراچی کے افسران پر دو کروڑ روپے رشوت کی مانگ اور ہراساں کرنے کے سنگین الزامات عائد کیے ہیں۔ بلڈر کے مطابق ایف آئی اے افسران نے دفتر چھاپہ مارا لیکن کچھ برآمد نہ کر سکے، اور حوالہ/ہنڈی کا بہانہ بنا کر مقدمہ بنانے کی دھمکی دی۔ معاملہ ڈی جی ایف آئی اے کے نوٹس میں لایا گیا ہے۔
لیہ (بولونیوز) ڈیرہ غازی خان سے قیدی لے جانے والی پریزن وین بریک نہ لگنے کے باعث سندیلہ چوک کے قریب ٹریکٹر ٹرالی سے ٹکرا گئی، جس میں ڈرائیور محمد طارق شدید زخمی ہوکر ہسپتال منتقل ہوئے۔
حادثے کے پس منظر میں ایم ٹی برانچ میں گاڑیوں کی مرمت کے نام پر کروڑوں روپے کے فیک بلز اور بدعنوانی کے الزامات سامنے آئے ہیں۔ شہریوں نے وزیراعلیٰ پنجاب اور آئی جی پنجاب سے فوری آڈٹ کا مطالبہ کیا ہے۔
ماسکو (بولونیوز) روس کے شہر خانتی مانسی میں ایک فیکٹری ملازم ولادی میر ریچاگوو کے اکاؤنٹ میں سافٹ ویئر کی خرابی سے پورے اسٹاف کی تنخواہ (7 ملین روبل) منتقل ہو گئی، جسے واپس کرنے سے انہوں نے انکار کر دیا۔
فیکٹری کی جانب سے عدالت میں مقدمہ دائر کیا گیا، جہاں ملزم کو رقم واپس کرنے کا حکم دیا گیا، لیکن انہوں نے اس فیصلے کو سپریم کورٹ میں چیلنج کر دیا۔ اب تک یہ قانونی جنگ جاری ہے اور ملازم کے بینک اکاؤنٹس منجمد ہیں۔
اسلام آباد (بولونیوز) آئل اینڈ گیس ریگولیٹری اتھارٹی (اوگرا) نے رواں مالی سال کے لیے گیس کی قیمتوں میں کمی کی منظوری دے دی ہے۔ سوئی نادرن کے لیے اوسط قیمت میں 3 فیصد اور سوئی سدرن کے لیے 8 فیصد کمی تجویز کی گئی ہے۔
فی الحال یہ تجویز وفاقی حکومت کی منظوری کے لیے بھیجی گئی ہے۔ منظوری کے بعد صارفین کو یہ فائدہ منتقل ہوگا۔ سوئی نادرن کے لیے قیمت 1804 روپے 8 پیسے اور سوئی سدرن کے لیے 1549 روپے 41 پیسے فی ایم ایم بی ٹی یو ہوگی۔