مٹی کے تیل کی قیمت میں بڑا اضافہ، عوام شدید برہم
اسلام آباد(بولونیوز) حکومت نے مٹی کے تیل کی قیمت میں 4 روپے 9 پیسے فی لیٹر اضافہ کر دیا ہے، جس کے بعد مٹی کے تیل کی نئی قیمت 231 روپے 14 پیسے فی لیٹر مقرر کر دی گئی ہے۔
قیمتوں میں اضافے کے بعد عوامی حلقوں میں شدید ردِعمل دیکھنے میں آ رہا ہے۔ شہریوں کا کہنا ہے کہ ایک طرف معمولی کمی کی بات کی جاتی ہے جبکہ دوسری جانب چار گنا سے زائد اضافہ کر کے مہنگائی کا بوجھ عوام پر ڈال دیا جاتا ہے۔ سوشل میڈیا پر بھی اس فیصلے پر سخت تنقید کی جا رہی ہے۔
عوامی تبصروں میں کہا جا رہا ہے کہ مہنگائی سے پہلے ہی پریشان غریب طبقے کے لیے مٹی کے تیل کی قیمت میں اضافہ مزید مشکلات پیدا کرے گا، کیونکہ یہ ایندھن دیہی اور کم آمدنی والے علاقوں میں روزمرہ استعمال میں آتا ہے۔
واضح رہے کہ حالیہ دنوں میں حکومت کی جانب سے توانائی مصنوعات کی قیمتوں میں ردوبدل جاری ہے، جس پر عوام کی بڑی تعداد تحفظات کا اظہار کر رہی ہے۔
