لندن میں فلسطین کے حق میں آواز اٹھانے پر ماحولیاتی کارکن گریٹا تھنبرگ گرفتار
لندن(بولونیوز) ماحولیاتی تحفظ کے لیے عالمی سطح پر معروف کارکن گریٹا تھنبرگ کو لندن میں فلسطین کے حق میں احتجاج کے دوران گرفتار کر لیا گیا۔ گریٹا تھنبرگ نے احتجاج میں ایک پلے کارڈ اٹھایا ہوا تھا جس پر لکھا تھا کہ وہ فلسطین کے حق میں کام کرنے والے قیدیوں کے ساتھ کھڑی ہیں اور نسل کشی کے خلاف آواز بلند کر رہی ہیں۔
برطانوی پولیس نے انہیں دہشت گردی سے متعلق سخت قوانین کے تحت حراست میں لیا، جس پر انسانی حقوق کے حلقوں میں شدید تشویش کا اظہار کیا جا رہا ہے۔ مبصرین کے مطابق اظہارِ رائے کی آزادی کے دعویدار برطانیہ میں محض ایک پلے کارڈ اٹھانے پر گرفتاری نے کئی سوالات کھڑے کر دیے ہیں۔
واقعے کے بعد سماجی رابطوں کی ویب سائٹس پر تھنبرگ کے حق میں آوازیں بلند ہونا شروع ہو گئی ہیں، جبکہ برطانوی حکام نے اب تک معاملے پر باضابطہ بیان جاری نہیں کیا۔
