وزیراعلیٰ سندھ کی ترقیاتی منصوبوں کی منظوری،16 منصوبوں پر تیز رفتاری کی ہدایت
کراچی(بولونیوز)وزیراعلیٰ سندھ مراد علی شاہ کی زیرصدارت ترقیاتی پورٹ فولیو 2025-26 کے جائزہ اجلاس میں محکمہ صحت کے 16 نمایاں منصوبوں کو موجودہ مالی سال میں عوام کے لیے کھولنے کی منظوری دی گئی۔
اجلاس میں وزیر صحت ڈاکٹر عذرا فضل پیچوہو نے بریفنگ دیتے ہوئے بتایا کہ سالانہ ترقیاتی پروگرام میں 178 منصوبے شامل ہیں، جن میں 140 جاری اور 38 نئے منصوبوں کے لیے 45.37 ارب روپے مختص کیے گئے ہیں۔
وزیراعلیٰ سندھ نے محکمہ صحت کو ہدایت کی کہ تمام ترقیاتی منصوبوں پر کام تیز کیا جائے اور انہیں مقررہ مدت میں مکمل کیا جائے۔ انہوں نے زور دے کر کہا کہ “اہم صحت منصوبے زندگی بچانے والی سہولیات ہیں، تاخیر ناقابل قبول ہے۔”
اجلاس میں لاڑکانہ کے 600 بستروں کے نئے اسپتال کی منظوری، پانچ بڑے اسپتالوں میں ماڈیولر آپریٹنگ تھیٹرز کے منصوبوں اور مختلف ضلعوں میں ہسپتالوں کی اپ گریڈیشن کی پیشرفت کا بھی جائزہ لیا گیا۔
