اسلام آباد(بولونیوز)چیئرمین جوائنٹ چیفس آف اسٹاف کمیٹی (CJCSC) جنرل ساحر شمشاد مرزا کی الوداعی تقریب میں تینوں مسلح افواج کے دستوں نے گارڈ آف آنر پیش کیا۔
تقریب سے خطاب کرتے ہوئے جنرل ساحر شمشاد مرزا نے افواجِ پاکستان کی قربانیوں کو خراجِ تحسین پیش کرتے ہوئے شہداء اور ان کے اہل خانہ کو سلام پیش کیا۔ انہوں نے ملکی دفاع کے لیے افواج کی خدمات کی تعریف کی اور اللہ تعالیٰ کا شکر ادا کیا۔
یہ تقریب فوجی روایات کے مطابق خصوصی احترام کے ساتھ ادا کی گئی۔
اسلام آباد(بولونیوز)سبزی منڈی کے قریب نامعلوم حملہ آور نے چاقو سے حملہ کر کے اے ایس آئی اکبر خان کو شہید کر دیا۔
پولیس کے مطابق واقعہ اس وقت پیش آیا جب اے ایس آئی اکبر خان پیدل چل رہے تھے کہ نامعلوم شخص نے اچانک چاقو سے حملہ کر دیا۔ زخمی پولیس اہلکار کو فوری طور پر اسپتال منتقل کیا گیا جہاں انہوں نے دم توڑ دیا۔
پولیس ذرائع کے مطابق شہید اہلکار سپریم کورٹ میں ڈیوٹی انجام دیتے تھے۔ حملہ آور کے فرار کے بعد پولیس نے تحقیقات کا آغاز کر دیا ہے اور ملزم کی گرفتاری کے لیے کارروائی جاری ہے۔
پشاور(بولونیوز)بورڈ تاج آباد میں مولانا عزت اللہ کے قتل کا مقدمہ تھانہ سی ٹی ڈی میں دہشتگردی سمیت اہم دفعات کے تحت درج کر لیا گیا ہے۔
پولیس رپورٹ کے مطابق مولانا عزت اللہ اپنے مدرسہ جامعہ عصریہ سے گھر جا رہے تھے کہ نامعلوم موٹر سائیکل سواروں نے ان کی گاڑی پر فائرنگ کر کے انہیں قتل کر دیا۔
رپورٹ میں یہ بھی درج ہے کہ مولانا کو کالعدم تنظیم داعش کی جانب سے پہلے ہی باقاعدہ قتل کی دھمکیاں موصول ہو رہی تھیں۔ مزید تفتیش جاری ہے۔
کوئٹہ(بولونیوز)قمبرانی روڈ پر ایک ہی دن میں دوسرے دھماکے نے بدامنی پیدا کردی، جس میں کرائم سین کی ایک گاڑی کو نشانہ بنایا گیا۔
پولیس کے مطابق یہ دھماکا پہلے دھماکے کی جانچ کے لیے جا رہی کرائم سین کی ٹیم کی گاڑی پر ہوا۔ موٹر سائیکل میں نصب دھماکہ خیز مواد کو ریموٹ کنٹرول کے ذریعے اڑایا گیا۔
خوش قسمتی سے اس دھماکے میں بھی کوئی جانی نقصان نہیں ہوا۔ پولیس نے ملزمان کی تلاش اور گرفتاری کے لیے کارروائی تیز کردی ہے اور دونوں واقعات کی تفتیش جاری ہے۔
کوئٹہ(بولونیوز)قمبرانی روڈ پر سیکورٹی فورسز کی گاڑی پر نامعلوم موٹر سائیکل سواروں نے دستی بم سے حملہ کر دیا۔
پولیس کے مطابق حملہ آور موٹر سائیکل سوار گاڑی پر دستی بم پھینک کر فرار ہو گئے۔ دھماکے سے گاڑی کو جزوی نقصان پہنچا تاہم خوش قسمتی سے کوئی جانی نقصان نہیں ہوا۔
واقعے کے بعد مقامی انتظامیہ نے بی ڈی ٹیم کو طلب کر لیا ہے جو دھماکے کے مقام پر موجودہ ہے۔ پولیس نے ملزمان کی گرفتاری کے لیے کارروائی شروع کر دی ہے اور مزید تفتیش جاری ہے۔
اسلام آباد(بولونیوز) ایف آئی اے امیگریشن نے اسلام آباد انٹرنیشنل ایئرپورٹ پر جعلی اسٹمپ لگے پاسپورٹس کے ساتھ ملائیشیا جانے کی کوشش کرنے والے دو مسافروں کو آف لوڈ کر دیا۔
ایف آئی اے حکام کے مطابق پشاور اور بونیر کے رہائشی امین خان اور حبیب اللہ بین الاقوامی پرواز کے ذریعے ملائیشیا جا رہے تھے، جن کے پاسپورٹس پر روانگی اور ملائیشیا آمد کی جعلی اسٹمپ لگی ہوئی تھیں۔
آپریشن کے دوران امیگریشن اہلکاروں نے جعل سازی کی کوشش کو بے نقاب کیا اور دونوں مسافروں کو پرواز سے اتار دیا۔ انہیں مزید قانونی کارروائی کے لیے اینٹی ہیومن ٹریفکنگ سرکل اسلام آباد کے حوالے کر دیا گیا ہے۔
ایف آئی اے کے ترجمان نے بتایا کہ امیگریشن کی نگرانی کو مزید مؤثر بنایا جا رہا ہے اور جعل سازی کی کوششوں کے خلاف سخت کارروائی جاری ہے۔
کراچی(بولونیوز)ساوتھ زون پولیس نے چائینہ پورٹ کلفٹن سے خاتون کی مسخ شدہ لاش ملنے کے واقعے کا مرکزی ملزم گرفتار کر لیا ہے۔
گزشتہ ہفتے کلفٹن چائینہ پورٹ کے قوات سے شہناز نامی خاتون کی نیم برہنہ اور مسخ شدہ لاش ملی تھی۔ بوٹ بیسن پولیس نے ٹیکنیکل ٹریسنگ کی مدد سے ملزم محمد احتشام کو گرفتار کیا۔
ڈی آئی جی ساؤتھ اسد رضا کے مطابق ملزم نے اعتراف کیا ہے کہ وہ مقتولہ کو پہلے سے جانتا تھا اور رقم کے تنازعے پر اسے قتل کر دیا۔ ملزم نے لاش کا چہرہ پتھر سے مسخ کرنے اور انگلیاں جلانے کا اعتراف بھی کیا ہے۔
پولیس نے ملزم سے مقتولہ کا موبائل فون بھی برآمد کیا ہے۔ ملزم کے سابقہ مجرمانہ ریکارڈ کی جانچ پڑتال جاری ہے۔
کراچی(بولونیوز)سندھ حکومت نے صوبے بھر کے نجی تعلیمی اداروں کے لیے یونیفارم پالیسی میں اہم نرمی کا اعلان کرتے ہوئے طلباء کو سردیوں میں اپنی پسند کے گرم کپڑے پہننے کی اجازت دے دی ہے۔
ڈائریکٹوریٹ آف انسپیکشن اینڈ رجسٹریشن آف پرائیویٹ انسٹیٹیوشنز کے جاری کردہ سرکلر کے مطابق، طلباء کو اب سردیوں میں کسی بھی رنگ اور ڈیزائن کے سویٹر، بلیزر، کوٹ، جیکٹس، ٹوپیاں، موزے اور جوتے پہننے کی اجازت ہوگی۔
ایڈیشنل ڈائریکٹر رجسٹریشن رفیعہ جاوید کے دستخط شدہ سرکلر میں کہا گیا ہے کہ اس نرمی کا بنیادی مقصد طلباء کی صحت، آرام اور فلاح و بہبود کو یقینی بنانا ہے۔ تمام اسکول انتظامیہ کو ہدایت کی گئی ہے کہ وہ اس پالیسی کو “پوری نیک نیتی” کے ساتھ نافذ کریں۔
یہ فیصلہ والدین اور طلباء کے لیے ایک بڑی راحت کا باعث ہے، جس سے نہ صرف طلباء کو سردی سے تحفظ ملے گا بلکہ والدین پر مہنگے مخصوص یونیفارم کا بوجھ بھی کم ہوگا۔
کراچی(بولونیوز)سندھ واٹر کارپوریشن کے ڈپٹی مینیجنگ ڈائریکٹر اور آر آر جی کے عہدیدار سید عمران اقبال زیدی حرکتِ قلب بند ہونے سے انتقال کرگئے۔
ترجمان کے مطابق مرحوم کی نمازِ جنازہ اور تدفین کے اوقات کا اعلان بعد ازاں کیا جائے گا۔
ادارے کے سی ای او احمد علی صدیقی اور سی او او انجینئر اسداللہ خان نے مرحوم کے انتقال پر گہرے رنج و غم کا اظہار کیا۔ ان کا کہنا تھا کہ “یہ ادارے کے لیے ناقابلِ تلافی نقصان ہے۔ مرحوم باصلاحیت، محنتی اور دیانتدار افسر تھے جنہوں نے ادارے کے لیے غیر معمولی خدمات انجام دیں۔”
واٹر کارپوریشن کے حکام نے بتایا کہ اس دکھ کی گھڑی میں تمام افسران و ملازمین مرحوم کے اہلِ خانہ کے ساتھ ہیں۔ مرحوم کی پیشہ ورانہ مہارت، خوش اخلاقی اور خدمت کا جذبہ ہمیشہ یاد رکھا جائے گا۔
کراچی(بولونیوز)وزیراعلیٰ سندھ سید مراد علی شاہ نے فلسطینیوں کے ساتھ یکجہتی کے عالمی دن پر اپنے پیغام میں اسرائیلی جارحیت کی شدید مذمت کرتے ہوئے بین الاقوامی برادری سے فوری اقدامات کا مطالبہ کیا۔
ترجمان وزیراعلیٰ کے حوالے سے جاری بیان میں کہا گیا کہ “غاصب اسرائیلی ریاست انسانیت کے خلاف جرائم کا ارتکاب کر رہی ہے، جس میں ہزاروں بچے اور خواتین شہید ہو چکی ہیں۔” انہوں نے زور دیا کہ “اقوام متحدہ کو فلسطینیوں کی نسل کشی روکنے کے لیے فوری اقدامات کرنے چاہئیں۔”
وزیراعلیٰ سندھ نے واضح کیا کہ پاکستان ایک آزاد فلسطینی ریاست کے حق میں ہے جس کا دارالحکومت بیت المقدس ہو۔ انہوں نے کہا کہ سندھ کے عوام فلسطین میں امن اور آزادی کے حصول کے لیے دعاگو ہیں۔