Category: پاکستان

کراچی(بولونیوز)سندھ ہائی کورٹ میں ڈی جی سندھ بلڈنگ کنٹرول اتھارٹی (ایس بی سی اے) کی تقرری کے خلاف دائر درخواستوں کی سماعت ہوئی، جہاں سندھ حکومت نے اپنا جواب عدالت میں جمع کرا دیا۔ عدالت نے حکم دیا کہ جواب کی نقول وکیل درخواست گزار کو فراہم کی جائیں، جبکہ درخواست گزار کے وکیل کو ہدایت کی گئی کہ آئندہ سماعت تک جواب الجواب جمع کرائیں۔

سابق اور موجودہ ڈی جیز کے خلاف درخواستوں پر بحث

سماعت کے دوران سابق ڈی جی کے وکیل نے مؤقف اپنایا کہ درخواست صرف موجودہ ڈی جی سے متعلق قابل سماعت ہے، کیونکہ دیگر سابق ڈی جیز اب عہدے پر موجود نہیں، اس لیے ان کے خلاف درخواستیں خارج کی جائیں۔

تاہم درخواست گزار کے وکیل نے اس مؤقف کو چیلنج کرتے ہوئے کہا کہ سابق ڈی جی رشید سولنگی کے خلاف منی لانڈرنگ کی تحقیقات جاری ہیں اور ان کا نام پاسپورٹ کنٹرول لسٹ میں شامل ہے، لہٰذا ان کے خلاف درخواستیں بھی موثر ہیں۔

ایس بی سی اے کی تکنیکی نوعیت—’عمارتوں کا بیڑہ غرق ہوگیا‘

درخواست گزار کے وکیل نے عدالت کو بتایا کہ
’پورے شہر کا بیڑہ غرق ہوچکا ہے، کسی انجینئر کو ڈی جی ایس بی سی اے تعینات نہیں کیا جاتا۔‘
وکیل کے مطابق ایس بی سی اے ایک تکنیکی ادارہ ہے جس کا سربراہ سول انجینیئر، ٹاؤن پلانر یا آرکیٹیکٹ ہونا چاہیے، کیونکہ ادارہ تعمیراتی لائسنس، عمارتیں منہدم کرنے اور مخدوش قرار دینے جیسے اہم امور کی نگرانی کرتا ہے۔ انہوں نے مؤقف اپنایا کہ عام بیوروکریٹ یا کسی اور شعبے کے انجینیئر کو ڈی جی نہیں لگایا جا سکتا۔

عدالت کی آبزرویشن اور آئندہ تاریخ

جسٹس یوسف علی سعدی نے ریمارکس دیئے کہ فریقین کے جواب مکمل ہونے دیں، کیس سن کر فیصلہ کیا جائے گا۔

عدالت نے سماعت چھ ہفتوں کے لیے ملتوی کر دی۔

درخواست میں استدعا کی گئی ہے کہ ڈی جی ایس بی سی اے کی تقرری کا نوٹیفکیشن کالعدم قرار دیا جائے۔

کراچی(بولونیوز)سندھ ہائی کورٹ میں سی ٹی ڈی سینٹر سکھر کی تعمیر کے ٹھیکے میں مبینہ بے ضابطگیوں سے متعلق ٹھیکیدار بلال بھٹو کی درخواست پر سماعت ہوئی۔ عدالت نے ابتدائی دلائل سننے کے بعد آئی جی سندھ، سپرنٹنڈنٹ انجینئر اور دیگر فریقین کو نوٹس جاری کردیے۔

درخواست گزار کے وکیل حسنین چوہان ایڈووکیٹ نے عدالت کو بتایا کہ سی ٹی ڈی سینٹر سکھر کی تعمیر کا ایک ارب روپے کا ٹھیکہ تین حصوں میں تقسیم کیا گیا ہے۔ ان کے مطابق پولیس حکام نے نیب کی کارروائی سے بچنے کے لیے یہ تقسیم کی کیونکہ نیب آرڈیننس میں ترمیم کے بعد 50 کروڑ روپے سے کم کی کرپشن کی تحقیقات ممکن نہیں۔

وکیل کے مطابق پہلے مرحلے میں 48 کروڑ روپے کا ٹھیکہ دیا گیا، جس کا مقصد نیب کی حدود سے باہر رہنا ہے۔ انہوں نے مؤقف اپنایا کہ محکمہ پولیس ٹھیکے کے عمل میں بے ضابطگیاں کر رہا ہے جبکہ ای پیڈ سسٹم کے بجائے ٹھیکہ مینوئلی دیا گیا، جو قانون کے خلاف ہے۔

درخواست گزار نے عدالت سے استدعا کی کہ ٹھیکہ ای پیڈ سسٹم کے ذریعے دیا جائے، جبکہ او پی ایس پر تعینات سپرنٹنڈنٹ انجینئر کو عہدے سے ہٹایا جائے۔

عدالت نے فریقین سے جواب طلب کرتے ہوئے سماعت آئندہ تاریخ تک ملتوی کردی۔

کراچی(بولونیوز)سندھ ہائی کورٹ میں لائنز ایریا میں لگنے والے بچت بازار کے خلاف درخواست کی سماعت ہوئی۔ سماعت کے دوران درخواست گزار کے جونئیر وکیل نے مؤقف اختیار کیا کہ سینئر وکیل آج پیش نہیں ہوسکے، لہٰذا مہلت دی جائے۔

عدالت نے وکیل کی استدعا پر درخواست کی سماعت ملتوی کردی اور ساتھ ہی بچت بازار سے متعلق جاری حکمِ امتناع میں بھی توسیع کردی۔

درخواست گزار کی جانب سے مؤقف اپنایا گیا کہ ہر سال ٹھیکیدار باقاعدگی سے چالان جمع کراتا ہے، تاہم کچھ افراد نے بچت بازار لگانے سے روک دیا تھا۔
وکیل درخواست گزار نے کہا کہ لائنز ایریا میں قانونی طور پر بچت بازار لگایا جاتا ہے اور اس سلسلے میں ڈپٹی کمشنر سمیت متعلقہ حکام سے باقاعدہ اجازت لی گئی تھی۔

عدالت نے دیگر فریقین کو بھی آئندہ سماعت پر طلب کرلیا اور کیس کی سماعت چار ہفتوں کے لیے ملتوی کردی۔

کراچی(بولونیوز)سندھ ہائی کورٹ میں لاپتا شہری محمد بلال اور دیگر افراد کی بازیابی سے متعلق درخواستوں کی سماعت ہوئی۔ عدالت نے محکمہ داخلہ سندھ، آئی جی سندھ اور دیگر متعلقہ حکام کو نوٹسز جاری کردیے۔

عدالت نے تمام فریقین سے 18 دسمبر تک جواب طلب کرلیا۔

درخواست گزار کے وکیل نے عدالت کو بتایا کہ محمد بلال سپر ہائی وے کے قریب انٹرویو کے لیے گئے تھے تاہم اس کے بعد ان کے فون بند ہوگئے اور وہ گھر واپس نہیں آئے۔

جسٹس یوسف علی سعید نے استفسار کیا کہ کیا بلال کی گمشدگی کا مقدمہ درج کرایا گیا ہے؟

وکیل نے جواب میں بتایا کہ متعلقہ تھانے میں گمشدگی کا مقدمہ درج کرلیا گیا ہے تاہم اب تک کسی قسم کا سراغ نہیں مل سکا۔

عدالت نے معاملے پر متعلقہ حکام سے رپورٹ طلب کرتے ہوئے سماعت آئندہ تاریخ تک ملتوی کردی۔

اسلام آباد(بولونیوز)وفاقی آئینی عدالت نے صحافی ارشد شریف قتل کیس کو سماعت کے لیے مقرر کر دیا ہے۔

جسٹس عامر فاروق اور جسٹس روزی خان پر مشتمل دو رکنی بینچ 3 دسمبر کو کیس کی سماعت کرے گا۔

یاد رہے کہ سپریم کورٹ نے ارشد شریف کے قتل پر ازخود نوٹس لیا تھا، تاہم 27 ویں آئینی ترمیم کے بعد تمام ازخود نوٹس کیسز وفاقی آئینی عدالت کو منتقل کر دیے گئے ہیں۔

ارشد شریف کو 23 اکتوبر 2022 کو کینیا کے شہر نیروبی میں مگاڈی ہائی وے پر پولیس نے سر میں گولی مار کر قتل کیا تھا۔ بعد ازاں کینین پولیس نے واقعے کو غلط شناخت کا معاملہ قرار دیا، تاہم تحقیقات کے دوران ان کے مؤقف میں کئی تضادات سامنے آئے، جس کے باعث معاملہ مزید پیچیدہ ہوگیا۔

مردان(بولونیوز)جمعیت علمائے اسلام (ف) کے سربراہ مولانا فضل الرحمان نے کہا ہے کہ ماضی میں الزام لگایا جاتا تھا کہ عمران خان مغربی ایجنڈے پر کام کر رہے ہیں، لیکن آج مغرب کے اصل ایجنڈے پر موجودہ حکومت عملدرآمد کر رہی ہے۔

مردان میں ایک تقریب سے خطاب کرتے ہوئے انہوں نے کہا کہ “ملک کی معیشت تباہ ہو چکی ہے، پاکستان وہ نہیں رہا جس کے بارے میں عوام نے امیدیں وابستہ کی تھیں۔”
انہوں نے کہا کہ حکومت کی پالیسیاں عوامی امنگوں کے خلاف ہیں اور مہنگائی کے بوجھ نے لوگوں کا جینا مشکل بنا دیا ہے۔

افغان پالیسی ناکام، جنگ کسی مسئلے کا حل نہیں: سربراہ جے یو آئی

مولانا فضل الرحمان نے مزید کہا کہ ٹرمپ کے ہاتھ فلسطینیوں کے خون سے رنگے ہوئے ہیں لیکن پاکستان کے وزیراعظم شہباز شریف ٹرمپ کو نوبل امن انعام دلوانے کی بات کر رہے ہیں، جو ایک افسوسناک رویہ ہے۔

انہوں نے کہا کہ پاکستان اور افغانستان دونوں کو اپنے رویوں پر نظر ثانی کرنا ہوگی۔
“مسلح گروہ جنگ چھوڑ دیں، جنگ کبھی کسی مسئلے کا حل نہیں رہی۔”

سربراہ جے یو آئی نے کہا کہ پاکستان کی افغان پالیسی مکمل طور پر ناکام ہو چکی ہے، 78 برس میں ہم افغانستان کو اپنا دوست نہیں بنا سکے، جو خارجہ پالیسی کے بڑے سوالات اٹھاتا ہے۔

اسلام آباد(بولونیوز)وزیرِ مملکت برائے قانون بیرسٹر عقیل ملک نے کہا ہے کہ خیبرپختونخوا میں دہشت گردی کی تازہ لہر اور سرحدی صورتحال کے پیش نظر گورنر راج نافذ کرنے پر غور کیا جا رہا ہے۔

جیو نیوز کے پروگرام نیا پاکستان میں گفتگو کرتے ہوئے انہوں نے کہا کہ خیبرپختونخوا کی موجودہ انتظامی صورتحال کسی سے پوشیدہ نہیں، اور ضرورت اس امر کی ہے کہ صوبے میں ایسا مؤثر انتظامی ڈھانچہ ہو جو عوام کو فوری اور حقیقی ریلیف دے۔
انہوں نے کہا کہ “کب تک صوبے کے شہریوں کو بے یار و مددگار چھوڑا جائے؟” حالات اس وقت نازک ہیں اور اسی لیے گورنر راج کے نفاذ کا آپشن زیر غور ہے۔

بیرسٹر عقیل ملک نے بتایا کہ گورنر راج صرف شدید ضرورت کے تحت نافذ کیا جاتا ہے اور خیبرپختونخوا کے حالات اس کی جانب اشارہ کر رہے ہیں۔ انہوں نے یاد دلایا کہ ماضی میں پنجاب میں بھی گورنر راج لگانے کا تجربہ کیا جا چکا ہے۔

گورنر خیبرپختونخوا کی تبدیلی کا امکان

دوسری جانب گورنر خیبرپختونخوا فیصل کریم کنڈی کو تبدیل کیے جانے کے امکانات پر بھی غور جاری ہے۔

ذرائع کے مطابق نئے گورنر کے لیے 5 نام زیر غور ہیں جن میں 3 سیاسی شخصیات اور 2 سابق فوجی افسران شامل ہیں۔

زیرِ غور سیاسی ناموں میں شامل ہیں:

امیر حیدر خان ہوتی

آفتاب شیرپاؤ

پرویز خٹک

جبکہ سابق فوجی افسران میں شامل ہیں:

لیفٹیننٹ جنرل (ر) خالد ربانی (سابق کور کمانڈر پشاور)

لیفٹیننٹ جنرل (ر) غیور محمود (سابق آئی جی ایف سی)

ذرائع کا کہنا ہے کہ جلد ہی اس حوالے سے حتمی فیصلہ متوقع ہے۔

پشاور(بولونیوز) وزیراعلیٰ خیبرپختونخوا سہیل آفریدی نے انکشاف کیا ہے کہ پاکستان تحریکِ انصاف کے بانی عمران خان کو 4 نومبر سے اڈیالہ جیل میں آئسولیشن میں رکھا گیا ہے جبکہ بین الاقوامی میڈیا میں اُن کی صورتِ حال سے متعلق تشویشناک رپورٹس سامنے آرہی ہیں۔

پشاور میں پریس کانفرنس کرتے ہوئے ان کا کہنا تھا کہ “ہم اڈیالہ جیل گئے مگر ہمیں دو منٹ کی ملاقات کی اجازت بھی نہیں دی گئی، اسلام آباد ہائیکورٹ بھی گئے لیکن وہاں بھی ملاقات نہ ہوسکی۔” وزیراعلیٰ نے کہا کہ عمران خان کی صحت اور سکیورٹی کے حوالے سے سنگین خدشات پیدا ہوگئے ہیں۔

سہیل آفریدی نے مزید کہا کہ پارلیمانی پارٹی اجلاس میں فیصلہ کیا گیا ہے کہ این ایف سی ایوارڈ میں بھرپور شرکت کی جائے گی تاکہ ضم اضلاع اور صوبے کے حقوق کے لیے مؤثر آواز بلند کی جاسکے۔ ان کے مطابق 2018 سے اب تک خیبرپختونخوا کو این ایف سی میں اس کا حق نہیں دیا گیا، جس کے باعث ضم اضلاع مسلسل محرومی کا شکار ہیں۔

انہوں نے دعویٰ کیا کہ وفاق کے ذمے صوبے کے 7 سالوں کے 1 ہزار 350 ارب روپے واجب الادا ہیں۔ اسی حوالے سے صوبے میں مختلف جامعات میں سیمینار منعقد کیے جارہے ہیں جب کہ تمام سیاسی جماعتوں سے بھی مشاورت کا سلسلہ جاری ہے۔

وزیراعلیٰ نے کہا کہ صوبے کے حقوق کے لیے سب کو متحد ہو کر لڑنا ہوگا۔ “ہمیں تصادم کی طرف دھکیلنے کی کوشش کی جارہی ہے لیکن ہم اس راستے پر نہیں جائیں گے۔ میں بطور وزیراعلیٰ بھی ذمہ داری نبھا رہا ہوں اور بطور پارٹی کارکن بھی۔”

سہیل آفریدی نے یہ بھی کہا کہ صوبے کے وزیراعلیٰ کا نام اسٹاپ لسٹ میں شامل کیا جانا امتیازی سلوک ہے، جس کی جمہوری نظام میں کوئی مثال نہیں ملتی۔

بلوچستان(بولونیوز)سیکورٹی فورسز نے ایف سی ہیڈکوارٹر پر دہشتگردوں کے حملے کی کوشش بروقت کارروائی کرتے ہوئے ناکام بنا دی۔ فائرنگ کے تبادلے اور مؤثر جوابی کارروائی میں خودکش بمبار خاتون سمیت چار دہشتگرد مارے گئے۔

ترجمان کے مطابق ہلاک ہونے والی خاتون خودکش بمبار کی شناخت زرینہ رفیق عرف ترانگ ماھو کے نام سے ہوئی ہے۔ دہشتگرد بھاری اسلحے سے لیس تھے اور اہم سیکیورٹی تنصیبات کو نشانہ بنانے کی کوشش کر رہے تھے۔

سیکورٹی فورسز نے علاقے کو گھیرے میں لے کر کلیئرنس آپریشن مکمل کر لیا ہے، جبکہ مزید تحقیقات جاری ہیں۔
فورسز کے مؤثر ردِعمل سے ایک بڑا سانحہ ٹل گیا، جس پر عسکری حکام نے جوانوں کی بہادری کو سراہا ہے۔

راولپنڈی(بولونیوز)عرب جمہوریہ مصر کے وزیرِ خارجہ ڈاکٹر بدر احمد محمد عبدالعاتی نے آج راولپنڈی میں پاک فوج کے سربراہ فیلڈ مارشل سید عاصم منیر، NI(M), HJ سے ملاقات کی۔

ملاقات میں پاکستان اور مصر کے درمیان دو طرفہ تعلقات کا تفصیلی جائزہ لیا گیا، خصوصاً دفاع اور سیکیورٹی تعاون، دونوں افواج کے درمیان رابطوں، تربیتی تعاون اور خطے میں امن و استحکام کے حوالے سے گفتگو ہوئی۔

دونوں رہنماؤں نے دفاع سمیت وسیع تر اسٹریٹجک شعبوں میں دیرینہ تعلقات کو مزید مضبوط بنانے اور ہم آہنگی بڑھانے کے عزم کا اظہار کیا۔

مصری وزیرِ خارجہ نے مصر کی قیادت کی جانب سے گرمجوش پیغام بھی پہنچایا اور پاکستان کے ساتھ ہر سطح پر تعاون کو مزید وسعت دینے میں گہری دلچسپی ظاہر کی۔

دونوں ممالک نے بدلتی ہوئی علاقائی صورتحال کے تناظر میں درپیش چیلنجز سے نمٹنے کے لیے مسلسل اعلیٰ سطحی روابط برقرار رکھنے کی اہمیت پر بھی زور دیا۔