Category: پاکستان

راولپنڈی(بولونیوز)فیلڈ مارشل سید عاصم منیر، نشانِ امتیاز (ملٹری) و ہلالِ جرات، چیف آف آرمی اسٹاف و چیف آف ڈیفنس فورسز کی زیرِ صدارت جنرل ہیڈکوارٹرز، راولپنڈی میں 276ویں کور کمانڈرز کانفرنس منعقد ہوئی۔

کانفرنس کے آغاز میں مسلح افواج، قانون نافذ کرنے والے اداروں اور معصوم شہریوں کے شہداء کے لیے فاتحہ خوانی کی گئی۔ فورم نے اس عزم کا اعادہ کیا کہ شہداء کی قربانیاں پاکستان کی سلامتی، اتحاد اور استحکام کی بنیاد ہیں۔ اجلاس میں مجموعی سیکیورٹی صورتحال کا جائزہ لیا گیا اور پاک افواج کی آپریشنل تیاری، پیشہ ورانہ مہارت اور جنگی صلاحیت پر اطمینان کا اظہار کیا گیا۔

فورم نے اس امر پر شدید تشویش کا اظہار کیا کہ افغان طالبان کے زیرِ کنٹرول علاقوں کو بھارت کے حمایت یافتہ دہشت گرد گروہ، جن میں فتنہ الخوارج (FAK) اور فتنہ الہندوستان (FAH) شامل ہیں، پاکستان میں دہشت گردی کی کارروائیوں کے لیے استعمال کر رہے ہیں۔ اجلاس میں واضح کیا گیا کہ خطے میں پائیدار امن افغان طالبان کے زیرِ کنٹرول علاقوں کو بھارتی دہشت گرد پراکسیز کے استعمال سے روکنے سے مشروط ہے، جس کی ذمہ داری افغان طالبان حکومت پر عائد ہوتی ہے۔ فورم نے اس بات کا اعادہ کیا کہ پاکستان کو دہشت گردی کے خلاف اپنے عوام کے دفاع کا غیر مبہم حق حاصل ہے اور مسلح افواج آپریشن غضبُ الحق کے تحت انٹیلی جنس بنیادوں پر کارروائیاں جاری رکھیں گی۔

کانفرنس میں اس امر پر بھی زور دیا گیا کہ شورش زدہ علاقوں میں مضبوط گورننس ڈھانچے قائم کرنے کی فوری ضرورت ہے تاکہ عوامی خدمت و فلاح کو فروغ دیا جا سکے اور سیاسی سرپرستی میں پنپنے والے دہشت گردی و جرائم کے گٹھ جوڑ کا خاتمہ کیا جا سکے۔

فورم نے مارکۂ حق میں دشمن کو دی جانے والی فیصلہ کن شکست کے بعد بیرونی سرپرستی میں ہائبرڈ وارفیئر اور گمراہ کن پروپیگنڈا مہمات میں اضافے کا نوٹس لیا اور ریاستی سرپرستی میں مالی معاونت، سہولت کاری یا پراکسیز کے استعمال کی شدید مذمت کی۔ اجلاس میں واضح کیا گیا کہ پاکستان کو غیر مستحکم کرنے کی ہر کوشش کا بھرپور اور دوٹوک جواب دیا جائے گا۔

علاقائی صورتحال کے جائزے کے دوران فورم نے مذاکرات، کشیدگی میں کمی اور علاقائی استحکام کے لیے پاکستان کے تعمیری کردار کو سراہا اور بین الاقوامی قوانین کی پاسداری اور علاقائی تعاون کے فروغ کے عزم کا اعادہ کیا۔

کانفرنس میں بھارت کی جانب سے سندھ طاس معاہدے سے متعلق بیانات پر قومی سلامتی کمیٹی کی 24 اپریل 2025 کی ہدایات کی توثیق کی گئی اور اس عزم کا اظہار کیا گیا کہ پاکستان اپنے آبی حقوق کے تحفظ کے لیے ہر ضروری اقدام کرے گا۔

فورم نے بھارتی غیر قانونی زیرِ قبضہ جموں و کشمیر میں انسانی حقوق کی سنگین خلاف ورزیوں اور آبادی کے تناسب میں یکطرفہ تبدیلیوں کی شدید مذمت کرتے ہوئے واضح کیا کہ کشمیر پاکستان کی شہ رگ ہے۔ اجلاس میں کشمیری عوام کے حقِ خودارادیت کی غیر متزلزل حمایت کا اعادہ کیا گیا، جو اقوام متحدہ کی سلامتی کونسل کی قراردادوں کے مطابق ہے۔

اختتامی کلمات میں فیلڈ مارشل سید عاصم منیر نے کمانڈرز کو بدلتے ہوئے جنگی تقاضوں کے مطابق کثیر الجہتی اصلاحاتی منصوبے پر تیز رفتار عملدرآمد، اعلیٰ سطح کی چوکسی، آپریشنل تیاری اور پیشہ ورانہ معیار برقرار رکھنے کی ہدایت کی، تاکہ پاکستان کی خودمختاری اور قومی مفادات کا ہر قیمت پر تحفظ یقینی بنایا جا سکے۔

کراچی(بولونیوز) شہر کے علاقے سپر ہائی وے پر براق پمپ کے قریب ڈائیوو بس اڈے کے سامنے تیز رفتار ریوو ڈالا نے کارگو بائیک کو کچل دیا، جس کے نتیجے میں 11 سالہ کمسن بچہ جاں بحق جبکہ 22 سالہ نوجوان شدید زخمی ہوگیا۔

پولیس کے مطابق حادثے میں جاں بحق ہونے والے بچے کی شناخت عبید ولد حکم (عمر 11 سال) جبکہ زخمی نوجوان کی شناخت نظام (عمر 22 سال) کے نام سے ہوئی ہے۔ زخمی کو فوری طبی امداد کے لیے عباسی شہید اسپتال منتقل کردیا گیا۔

حادثے کے بعد ڈالا کا ڈرائیور موقع سے فرار ہوگیا۔ پولیس نے واقعے کی تحقیقات شروع کرتے ہوئے گاڑی کی تفصیلات حاصل کرنے کا عمل تیز کر دیا ہے تاکہ فرار ڈرائیور کو گرفتار کیا جا سکے۔

پولیس کا کہنا ہے کہ ملزم کی تلاش جاری ہے اور واقعے کے تمام پہلوؤں سے تحقیقات کی جا رہی ہیں۔

کراچی(بولونیوز) کراچی ٹریفک پولیس کے دفتر میں ڈی آئی جی ٹریفک کراچی کی ہدایات پر ٹرانسپورٹرز سے وابستہ تنظیم (TGA) کے نمائندگان کے ساتھ ایک اہم اجلاس منعقد ہوا، جس میں ای چالان سے متعلق درپیش مسائل اور تجاویز پر تفصیلی تبادلۂ خیال کیا گیا۔

اجلاس میں ڈی ایس پی ایڈمن ٹریفک ملہیر خان، ڈی ایس پی ٹریفک لیگل محمد طفیل اور ٹی جی اے کے نمائندگان مسعود بھٹی، محمد اشرف سمیت دیگر افراد نے شرکت کی۔ اس موقع پر ٹی جی اے کے نمائندگان نے ای چالان کے نفاذ، طریقۂ کار اور اس سے جڑے عملی مسائل پر اپنے تحفظات اور تجاویز پیش کیں۔

متعلقہ افسران نے شرکاء کے مؤقف کو بغور سنا اور قانونی و انتظامی تقاضوں کے مطابق مسائل کے حل کے لیے ضروری اقدامات کرنے کی یقین دہانی کرائی۔ افسران نے کہا کہ ای چالان نظام کو مزید مؤثر، شفاف اور عوام دوست بنانے کے لیے تمام اسٹیک ہولڈرز کی آراء کو اہمیت دی جا رہی ہے۔

کراچی ٹریفک پولیس نے اس عزم کا اعادہ کیا کہ شہریوں اور ٹرانسپورٹ سے وابستہ تمام فریقین کو بہتر، شفاف اور مؤثر خدمات کی فراہمی کے لیے اپنی ذمہ داریاں پوری تندہی سے انجام دی جاتی رہیں گی۔

کراچی(بولونیوز)ایڈووکیٹ حسنین علی چوہان نے سندھ میں آٹے کی قیمتوں میں مسلسل اضافے پر شدید تشویش کا اظہار کرتے ہوئے کہا ہے کہ زرعی صوبہ ہونے اور گندم کی بمپر فصل کے باوجود آٹے کا مہنگا ہونا حکومتی نااہلی اور ذخیرہ اندوزوں کی سرپرستی کا واضح ثبوت ہے۔ انہوں نے کہا کہ سندھ حکومت اور پرائس کنٹرول کا نظام عوام کو ریلیف فراہم کرنے میں مکمل طور پر ناکام نظر آ رہا ہے۔

انصاف لائرز فورم کراچی ڈویژن کے سینئر رہنما ایڈووکیٹ حسنین علی چوہان کا کہنا تھا کہ کراچی میں آٹا 170 روپے فی کلو تک فروخت ہو رہا ہے، جس کے باعث غریب اور متوسط طبقے کے لیے دو وقت کی روٹی کا حصول بھی مشکل ہو چکا ہے۔ آٹے کی قیمتوں میں اضافے کے ساتھ روٹی، نان اور دیگر آٹے سے تیار شدہ اشیائے خورونوش بھی مہنگی ہو گئی ہیں، جس کا براہِ راست بوجھ عام شہری پر پڑ رہا ہے۔

انہوں نے کہا کہ ایک طرف وزیراعلیٰ سندھ آٹے کی قیمتوں کے حوالے سے اجلاس پر اجلاس کر رہے ہیں، مگر دوسری جانب عملی طور پر کوئی مؤثر اقدامات نظر نہیں آ رہے۔ شہری بدستور مہنگے داموں آٹا خریدنے پر مجبور ہیں اور اگر یہی صورتحال برقرار رہی تو آنے والے دنوں میں قیمتوں میں مزید اضافے کا خدشہ ہے۔

ایڈووکیٹ حسنین علی چوہان نے تنقید کرتے ہوئے کہا کہ پاکستان پیپلز پارٹی نے “روٹی، کپڑا اور مکان” کا نعرہ لگایا تھا، مگر آج عوام سے دو وقت کی روٹی بھی چھن چکی ہے۔ ناقص معاشی پالیسیوں کے باعث مہنگائی اور بدحالی میں مسلسل اضافہ ہو رہا ہے اور شہری سستی بنیادی اشیائے خورونوش کو ترس رہے ہیں۔

انہوں نے مطالبہ کیا کہ ذخیرہ اندوزوں کے خلاف فوری اور بلاامتیاز کریک ڈاؤن کیا جائے، گندم اور آٹے کی مصنوعی قلت کا خاتمہ کیا جائے، پرائس کنٹرول نظام کو مؤثر بنایا جائے اور شہریوں کو فوری طور پر سستا اور معیاری آٹا فراہم کیا جائے تاکہ عوام کو مہنگائی کے اس طوفان سے حقیقی ریلیف مل سکے۔

کراچی(بولونیوز)تین بچیوں کے لاپتہ ہونے سے متعلق سوشل میڈیا پر گزشتہ دو سے تین روز سے گردش کرنے والی خبر غلط اور گمراہ کن ثابت ہوئی ہے۔ سوشل میڈیا پر تین بچیوں کی تصویر کے ساتھ ایک انتہائی دردناک پیغام وائرل کیا جا رہا تھا، جس میں دعویٰ کیا گیا کہ کراچی کے ایک گھر سے تین بہنیں پراسرار طور پر لاپتہ ہو گئی ہیں۔

تاہم علاقائی مصدقہ ذرائع کے مطابق اس واقعے کی اصل حقیقت مختلف ہے۔ ذرائع کا کہنا ہے کہ بچیوں کی والدہ اپنی مرضی سے گھر چھوڑ کر گئی ہیں اور جاتے ہوئے اپنی تینوں بچیوں کو بھی اپنے ساتھ لے گئیں۔ خاتون گھر سے سونے چاندی کے زیورات، نقد رقم اور دیگر سامان بھی ہمراہ لے کر گئی تھیں۔

واقعے کے بعد بچیوں کے والد کی جانب سے متعلقہ تھانے میں باقاعدہ مقدمہ درج کروا دیا گیا ہے اور قانونی کارروائی جاری ہے۔

ذرائع ابلاغ سے وابستہ افراد اور سوشل میڈیا پر خبروں کو پھیلانے والوں سے گزارش کی گئی ہے کہ وہ صرف مصدقہ اور حقائق پر مبنی معلومات ہی آگے پہنچائیں۔ بغیر تصدیق من پسند خبریں چلانا، حساس معاملات میں عوامی جذبات سے کھیلنا یا ایسا تاثر دینا کہ کوئی سنگین جرم رونما ہو گیا ہے، معاشرے میں بے چینی اور خوف پیدا کرنے کا سبب بنتا ہے۔

صحافتی ذمہ داری کا تقاضا ہے کہ ایسی خبروں میں احتیاط، توازن اور ذمہ داری کا مظاہرہ کیا جائے تاکہ عوام کو گمراہ ہونے سے بچایا جا سکے۔

عمرکوٹ(بولونیوز)بے نظیر انکم سپورٹ پروگرام (BISP) کی امدادی رقوم میں غیر قانونی کٹوتیوں کے خلاف عمرکوٹ پولیس نے ایک اور کامیاب کارروائی کرتے ہوئے مزید ایک ملزم کو گرفتار کر لیا ہے۔

ایس ایس پی عمرکوٹ کی خصوصی ہدایات پر مستحق خواتین سے BISP کی امدادی رقوم میں کٹوتی کرنے والے عناصر کے خلاف ضلع بھر میں بھرپور کریک ڈاؤن جاری ہے۔ اسی سلسلے میں تھانہ سامارو پولیس نے کارروائی کرتے ہوئے گوند ولد وجیو مہراج سکنہ محمد اسماعیل بھرگڑی، تعلقہ سامارو کو گرفتار کر لیا۔

پولیس کے مطابق گرفتار ملزم کے خلاف کرائم نمبر 67/2026 بجرم دفعات 406، 420 تعزیراتِ پاکستان کے تحت مقدمہ درج کر لیا گیا ہے۔

برآمدگی
ایک عدد جاز کیش ڈیوائس

ابتدائی تحقیقات میں انکشاف ہوا ہے کہ ملزم مستحق خواتین کو BISP کے تحت ملنے والی امدادی رقم میں سے 2,500 روپے فی کس غیر قانونی طور پر کٹوتی کرتا تھا، جو دھوکہ دہی اور خیانتِ مجرمانہ کے زمرے میں آتا ہے۔ اس بنیاد پر سرکاری مدعیت میں مقدمہ درج کر کے ملزم کو گرفتار کیا گیا، جبکہ مزید تفتیش جاری ہے۔

ایس ایس پی عمرکوٹ نے واضح الفاظ میں کہا ہے کہ مستحق خواتین کی امدادی رقوم میں کسی قسم کی غیر قانونی کٹوتی ہرگز برداشت نہیں کی جائے گی۔ عوام کے حقوق پر ڈاکہ ڈالنے والے عناصر کے خلاف بلاامتیاز قانونی کارروائیاں جاری رہیں گی اور ملوث افراد کو قانون کے مطابق قرار واقعی سزا دلوائی جائے گی۔

کراچی(بولونیوز)چیئرمین فراز حسیب کی متحرک قیادت، مؤثر پالیسیوں اور تعلیم دوست وژن کے تحت محکمۂ تعلیم لیاقت آباد ٹاؤن نے مالی سال 2025–2026 کے دوران تعلیمی شعبے میں نمایاں اصلاحات اور ترقیاتی اقدامات کامیابی سے مکمل کیے۔

چیئرمین فراز حسیب کی خصوصی ہدایات کے مطابق سرکاری تعلیمی اداروں کی بہتری، تعلیمی معیار میں اضافہ، جدید سہولیات کی فراہمی، اسکولوں کے انفراسٹرکچر کی بحالی اور طلبہ کے لیے سازگار تعلیمی ماحول کی تشکیل کو اولین ترجیح دی گئی۔ اسی وژن کے تحت محکمۂ تعلیم نے متعدد ترقیاتی منصوبے پایۂ تکمیل تک پہنچائے، جن کے مثبت اثرات تعلیمی اداروں، اساتذہ، طلبہ اور والدین کی سطح پر نمایاں طور پر دیکھنے میں آئے۔

محکمۂ تعلیم لیاقت آباد ٹاؤن کی جانب سے جاری کی گئی سالانہ کارکردگی رپورٹ میں بتایا گیا ہے کہ سال بھر کے دوران سرکاری اسکولوں کی عمارتوں کی تزئین و آرائش، کلاس رومز کی بہتری، صاف پانی کی فراہمی، جدید فرنیچر، واش رومز کی بحالی، بجلی اور دیگر بنیادی سہولیات کو یقینی بنایا گیا۔

رپورٹ کے مطابق طلبہ کو بہتر تعلیمی ماحول فراہم کرنے کے لیے جدید تدریسی سہولیات، آئی ٹی اور اے آئی لیبز کے قیام، کمپیوٹر لیبارٹریوں کی اپ گریڈیشن اور ڈیجیٹل تعلیم کے فروغ پر خصوصی توجہ دی گئی۔ تعلیمی معیار کو مزید بہتر بنانے کے لیے اساتذہ کی پیشہ ورانہ تربیت، نصابی و ہم نصابی سرگرمیوں، کھیلوں، تقریری و تحریری مقابلوں اور سائنسی و تخلیقی پروگراموں کا باقاعدہ انعقاد کیا گیا۔

طلبہ کی حاضری اور تعلیمی کارکردگی میں بہتری کے لیے مؤثر نگرانی کا نظام بھی متعارف کرایا گیا، جس کے باعث مجموعی تعلیمی نتائج میں بہتری دیکھنے میں آئی۔

محکمۂ تعلیم لیاقت آباد ٹاؤن نے اس عزم کا اعادہ کیا ہے کہ ہر بچے کی معیاری تعلیم تک رسائی، جدید تعلیمی سہولیات کی فراہمی اور تعلیمی اداروں کی مسلسل بہتری کے لیے اپنی کاوشیں آئندہ بھی جاری رکھی جائیں گی، تاکہ ایک روشن، باصلاحیت اور تعلیم یافتہ معاشرے کی تشکیل کو یقینی بنایا جا سکے۔

کراچی(بولونیوز)ڈسٹرکٹ سٹی پولیس نے گزشتہ ہفتے کے دوران شہر کے مختلف علاقوں میں ٹارگٹڈ کارروائیاں کرتے ہوئے مجموعی طور پر 65 ملزمان کو گرفتار کر لیا۔

پولیس کے مطابق ڈکیتی اور اسٹریٹ کرائمز کی متعدد وارداتوں میں ملوث 3 ملزمان کو گرفتار کیا گیا، جن کے قبضے سے 3 عدد پستول بمعہ راؤنڈز برآمد ہوئے۔ اسی طرح منشیات کی سپلائی میں ملوث 13 ملزمان کو گرفتار کر کے بھاری مقدار میں منشیات برآمد کی گئی۔

گٹکا اور ماوا کی غیر قانونی سپلائی کے خلاف کارروائیوں میں 10 ملزمان کو گرفتار کیا گیا، جن کے قبضے سے گٹکا/ماوا برآمد ہوا۔ اشتہاری اور مفرور ملزمان کے خلاف جاری کریک ڈاؤن کے دوران 8 مفرور ملزمان کو بھی گرفتار کیا گیا۔

موٹر سائیکل لفٹنگ کی وارداتوں میں ملوث 2 ملزمان کو گرفتار کیا گیا، جبکہ دیگر مختلف جرائم میں ملوث 29 ملزمان کو بھی حراست میں لیا گیا ہے۔

پولیس حکام کا کہنا ہے کہ گرفتار ملزمان کے خلاف متعلقہ قوانین کے تحت مقدمات درج کر لیے گئے ہیں اور مزید تفتیش جاری ہے۔ انہوں نے اس عزم کا اظہار کیا کہ شہر میں جرائم پیشہ عناصر کے خلاف کارروائیاں مزید تیز کی جائیں گی تاکہ شہریوں کے جان و مال کا تحفظ یقینی بنایا جا سکے۔

کراچی(بولونیوز)انسدادِ پولیو مہم کے آغاز کے موقع پر ڈسٹرکٹ سٹی پولیس کی جانب سے سیکیورٹی کے سخت انتظامات کیے گئے ہیں۔ پولیس حکام کے مطابق بذریعہ رول کال تمام افسران و جوانان کو سیکیورٹی سے متعلق خصوصی ہدایات جاری کی گئی ہیں تاکہ مہم کو پُرامن اور مؤثر بنایا جا سکے۔

پولیس کا کہنا ہے کہ پولیو ٹیمز کے ہمراہ پولیس جوانان اور لیڈی کانسٹیبلان تعینات ہیں، جو گھر گھر جا کر بچوں کو پولیو سے بچاؤ کے قطرے پلانے والی ٹیموں کو مکمل تحفظ فراہم کر رہے ہیں۔

مزید بتایا گیا ہے کہ ایس ایچ اوز اور ہیڈ محررز وقتاً فوقتاً اپنے اپنے علاقوں کا دورہ کر رہے ہیں تاکہ سیکیورٹی انتظامات کا جائزہ لیا جا سکے، جبکہ شاہین فورس کے ذریعے تمام ہاٹ اسپاٹ مقامات کی کڑی نگرانی کی جا رہی ہے۔

پولیس حکام نے عوام سے اپیل کی ہے کہ وہ انسدادِ پولیو مہم میں تعاون کریں اور کسی بھی مشکوک سرگرمی کی فوری اطلاع پولیس کو دیں تاکہ بچوں کے محفوظ مستقبل کو یقینی بنایا جا سکے۔

اسلام آباد(بولونیوز)ملکی سیاست میں جاری کانفرنسوں کے دوران ہر روز نئے انکشافات سامنے آ رہے ہیں۔ ذرائع اور سیاسی حلقوں میں گردش کرنے والے بیانیے کے مطابق ن لیگ نے صرف مبینہ لندن پلان ہی نہیں بلکہ ایم کیو ایم کے ساتھ بھی معاہدہ کر رکھا ہے۔

ایم کیو ایم سے منسلک حلقوں کا دعویٰ ہے کہ ہمیشہ کی طرح بلیک میلنگ کے ذریعے سیاسی فائدے حاصل کرنے کی کوششیں کی جا رہی ہیں، جبکہ مختلف جماعتیں اپنے اپنے مفادات، پیسوں، عہدوں اور کرسی کی جنگ میں مصروف دکھائی دیتی ہیں۔ سیاسی مبصرین کے مطابق ان بیانات اور جوابی دعوؤں سے ملکی سیاست میں کشیدگی مزید بڑھنے کا امکان ہے۔

اس تمام صورتحال میں عمران خان کی رائے کا حوالہ بھی دیا جا رہا ہے، جس میں صحت کو قوم کی اولین ترجیح قرار دیا گیا ہے۔ ناقدین کا کہنا ہے کہ سیاسی رسہ کشی اور الزام تراشی کے بجائے عوامی فلاح، بالخصوص صحت اور بنیادی سہولیات پر توجہ دینا وقت کی اہم ضرورت ہے۔

سیاسی حلقوں میں یہ سوال بھی اٹھایا جا رہا ہے کہ آیا ان کانفرنسوں اور بیانات کا مقصد واقعی حقائق کو عوام کے سامنے لانا ہے یا محض دباؤ بڑھا کر سیاسی سودے بازی کرنا۔ آنے والے دنوں میں مزید انکشافات اور ردِعمل متوقع ہیں۔