Author: Nadeem Ahmed Jamal

کراچی(بولونیوز) مزدور رہنما لیاقت علی ساہی نے فیڈرل آئینی عدالت کی جانب سے نسیلہ ٹاور سے متعلق حالیہ فیصلے کا خیرمقدم کرتے ہوئے اسے آئین، انصاف اور عوامی حقوق کی بالادستی کی جانب اہم پیش رفت قرار دیا ہے۔

اپنے بیان میں انہوں نے کہا کہ یہ فیصلہ متاثرہ شہریوں کے بنیادی حقوق کے تحفظ اور عدالتی نظام پر عوام کے اعتماد کی بحالی کے لیے ایک مثبت اقدام ہے۔ ان کا کہنا تھا کہ اگر کسی تعمیراتی منصوبے میں قانونی یا انتظامی بے ضابطگیاں ہوئی ہوں تو اس کی ذمہ داری متعلقہ سرکاری اداروں پر عائد ہوتی ہے، نہ کہ ان شہریوں پر جنہوں نے اپنی جائز کمائی سے رہائشی فلیٹس خریدے۔

لیاقت علی ساہی نے کہا کہ اسی اصول کو محنت کشوں کے حقوق پر بھی لاگو کیا جانا چاہیے۔ انہوں نے یاد دلایا کہ 2017 میں تھرڈ پارٹی ورکرز سے متعلق دیا گیا عدالتی فیصلہ تاحال مکمل طور پر نافذ نہیں ہو سکا، جس کے باعث لاکھوں کنٹریکٹ اور تھرڈ پارٹی ملازمین مستقل ملازمت اور دیگر قانونی حقوق سے محروم ہیں۔

انہوں نے مطالبہ کیا کہ فیڈرل آئینی عدالت آئینِ پاکستان اور ایمپلائمنٹ (اسٹینڈنگ آرڈرز) آرڈیننس 1968ء کے مطابق تمام سرکاری، نیم سرکاری، خودمختار اور نجی اداروں کو پابند کرے کہ مسلسل 90 روز ملازمت مکمل کرنے والے کارکنوں کو مستقل ملازم تصور کرتے ہوئے انہیں مستقل ملازمین کے مساوی تمام مالی، سروس اور آئینی حقوق فراہم کیے جائیں۔

مزدور رہنما نے مزید کہا کہ پارلیمنٹ اور متعلقہ ریاستی اداروں کی ذمہ داری ہے کہ وہ صرف قانون سازی تک محدود نہ رہیں بلکہ آئین، لیبر قوانین اور عدالتی فیصلوں پر مؤثر عمل درآمد بھی یقینی بنائیں تاکہ محنت کشوں کے استحصال کا خاتمہ ہو اور ملک میں قانون کی حقیقی حکمرانی قائم ہو۔

کراچی(بولونیوز) پاکستان ایوی ایشن اتھارٹی (پی اے اے) نے کہا ہے کہ بحیرۂ عرب میں گرنے والے کارگو طیارے کے عملے کی تلاش کا آپریشن بدستور جاری ہے، جبکہ طیارے کا مزید ملبہ بھی تلاش کر لیا گیا ہے۔

پی اے اے کے جاری کردہ بیان کے مطابق پاک بحریہ اور پاکستان میری ٹائم سکیورٹی ایجنسی گہرے سمندر میں مشترکہ سرچ اینڈ ریسکیو آپریشن جاری رکھے ہوئے ہیں تاکہ لاپتا عملے کو تلاش کیا جا سکے۔

حکام کے مطابق امدادی ٹیمیں مسلسل کارروائیاں کر رہی ہیں، جبکہ طیارے کے مزید ملبے کی برآمدگی کے بعد حادثے کی تحقیقات بھی جاری ہیں۔

کوئٹہ(بولونیوز) سکیورٹی حکام کے مطابق ضلع کوئٹہ کے علاقے شابان میں جاری بڑے مشترکہ آپریشن کے دوران گزشتہ 48 گھنٹوں میں مزید 39 دہشت گرد ہلاک کر دیے گئے ہیں۔

حکام کا کہنا ہے کہ پاکستان آرمی، فرنٹیئر کور (ایف سی) اور پولیس پر مشتمل سکیورٹی فورسز 5 جولائی سے شابان کے علاقے میں مشترکہ آپریشن کر رہی ہیں۔ حکام کے مطابق یہ کارروائی ان دہشت گردوں کے خلاف کی جا رہی ہے جو مانگی ڈیم پمپنگ اسٹیشن پر قائم پولیس چوکی پر حملے میں 27 پولیس اہلکاروں کی ہلاکت میں مبینہ طور پر ملوث تھے۔

سکیورٹی ذرائع کے مطابق علاقے میں سرچ اور کلیئرنس آپریشن تاحال جاری ہے، جبکہ دہشت گردوں کے خلاف مزید کارروائیاں بھی کی جا رہی ہیں۔ ان دعوؤں کی آزاد ذرائع سے تاحال تصدیق سامنے نہیں آئی ہے۔

کوئٹہ(بولونیوز)سکیورٹی ذرائع کے حوالے سے دعویٰ کیا ہے کہ بلوچستان میں جاری آپریشن کے دوران مزید 11 دہشت گرد ہلاک کر دیے گئے ہیں، جس کے بعد 5 جولائی سے اب تک مارے جانے والے دہشت گردوں کی مجموعی تعداد 90 ہو گئی ہے۔

رپورٹ کے مطابق سکیورٹی فورسز نے صوبے میں این-25 کراسنگ کے قریب انٹیلی جنس بنیاد پر کارروائی (آئی بی او) کرتے ہوئے مبینہ طور پر فتنہ الہندوستان سے تعلق رکھنے والے مزید دو دہشت گردوں کو ہلاک کیا۔

سرکاری ذرائع کے مطابق علاقے میں دہشت گردوں کے خلاف کارروائیاں جاری ہیں اور سکیورٹی فورسز امن و امان کی بحالی کے لیے آپریشنز جاری رکھے ہوئے ہیں۔ اس دعوے کی آزاد ذرائع سے تصدیق سامنے نہیں آئی ہے۔

کراچی(بولونیوز) بنگلہ دیش سے آئے ہوئے سینئر صحافی اور یونیورسٹی کے پروفیسرز پر مشتمل معزز وفد نے کراچی یونین آف جرنلسٹس دستور کی دعوت پر کراچی پریس کلب کا دورہ کیا،اس موقع پر وفد کے اعزاز میں عصرانے کا اہتمام کیا گیا، جس میں کراچی یونین آف جرنلسٹس دستور کے عہدیداروں اور سینئر صحافیوں نے شرکت کی۔ کراچی یونین آف جرنلسٹس دستور کے صدر نصراللہ چودھری اور سیکرٹری ریحان چشتی نے وفد کو خوش آمدید کہا اور ان کے دورے کو دونوں ملکوں کی صحافی برادری کے درمیان تعلقات کو خوش آئند قراردیا، تقریب کے دوران دونوں ممالک کے صحافیوں اور ماہرینِ تعلیم نے پاکستان اور بنگلہ دیش کے درمیان صحافتی، تعلیمی اور ثقافتی تعلقات کو مزید فروغ دینے کی ضرورت پر زور دیا۔ مقررین نے اس بات پر اتفاق کیا کہ باہمی روابط، علمی تبادلوں اور پیشہ ورانہ تعاون سے دونوں ممالک کے عوام ایک دوسرے کے مزید قریب آسکتے ہیں۔بنگلہ دیشی وفد نے کراچی یونین آف جرنلسٹس دستور کی مہمان نوازی پر شکریہ ادا کرتے ہوئے امید ظاہر کی کہ اس نوعیت کے تبادلہ جاتی دورے مستقبل میں بھی جاری رہیں گے، جس سے دونوں ممالک کے صحافیوں اور تعلیمی اداروں کے درمیان تعلقات مزید مستحکم ہوں گے۔تقریب میں کراچی پریس کلب کے جوائنٹ سیکرٹری فاروق سمیع ، ممبر گورننگ باڈی شیما صدیقی، سینئر صحافیوں احمد حسن ، عامر لطیف، طارق ابوالحسن، امجد ارشاد، جسارت کے چیف آپریٹنگ آفیسر طاہر اکبر، جاوید باسط، ریاض ساگر، عامر اشرف،محمد منصف ، وکیل الرحمان اور دیگر بھی موجود تھے

کوئٹہ(بولونیوز) حکومت بلوچستان نے ضلع کوئٹہ کو دو الگ اضلاع میں تقسیم کرنے کا باضابطہ نوٹیفکیشن جاری کر دیا ہے، جس کے تحت کوئٹہ ڈویژن اب تین اضلاع پر مشتمل ہوگا۔

نوٹیفکیشن کے مطابق سابقہ ضلع کوئٹہ کو ضلع کوئٹہ ایسٹ اور ضلع کوئٹہ ویسٹ میں تقسیم کر دیا گیا ہے۔ ضلع کوئٹہ ایسٹ میں سریاب، صدر اور سٹی سب ڈویژنز شامل ہوں گی، جبکہ ضلع کوئٹہ ویسٹ میں کچلاک، بروری اور پنجپائی سب ڈویژنز کو شامل کیا گیا ہے۔

حکومتی نوٹیفکیشن کے مطابق ضلع مستونگ کو بھی قلات ڈویژن سے علیحدہ کر کے کوئٹہ ڈویژن میں شامل کر دیا گیا ہے، جس کے بعد کوئٹہ ڈویژن میں کوئٹہ ایسٹ، کوئٹہ ویسٹ اور مستونگ تین اضلاع شامل ہوں گے۔

حکام کے مطابق اس انتظامی اقدام کا مقصد عوامی خدمات کی فراہمی کو مزید مؤثر، تیز اور بہتر بنانا ہے۔

اسلام آباد(بولونیوز) جیٹ فیول کی قیمت میں 13 روپے 23 پیسے فی لٹر اضافہ کردیا گیا ، جس کے بعد فضائی سفر کے کرایوں میں مزید اضافے کا خدشہ پیدا ہو گیا ہے۔

تفصیلات کے مطابق وفاقی حکومت نے پیٹرولیم مصنوعات کے بعد ہوائی جہازوں کے ایندھن کی قیمتوں میں بھی یکمشت بھاری اضافہ کر دیا ہے، جس کے بعد ملک میں فضائی سفر کے کرایوں میں مزید اضافے کا خدشہ پیدا ہو گیا ہے۔

حکومتی نوٹیفیکیشن میں کہا گیا کہ جیٹ فیول کی قیمت میں 13 روپے 23 پیسے فی لٹر اضافہ کیا گیا، جس کے بعد نئی قیمت 251 روپے 02 پیسے فی لٹر کی سطح پر پہنچ گئی ہے۔

ایوی ایشن ماہرین کا کہنا ہے کہ جیٹ فیول کی قیمتوں میں اس اضافے کے بعد پاکستان انٹرنیشنل ائیرلائنز سمیت تمام نجی ایئر لائنز کی آپریٹنگ لاگت بڑھ جائے گی۔

جس کا براہِ راست بوجھ فضائی مسافروں پر ٹکٹوں کی قیمتوں میں اضافے کی صورت میں منتقل ہونے کا قوی امکان ہے۔

تہران(بولونیوز)ایرانی سپریم لیڈر مجتبیٰ خامنہ ای کا والد کے قتل کا بدلہ لینے کا اعلان کرتے ہوئے اسے انتقام کو قوم کی خواہش قرار دے دیا۔ایرانی سپریم لیڈر مجتبیٰ خامنہ ای نے سماجی رابطوں کی ویب سائٹ ‘ایکس’ پر اپنے ایک اہم پیغام میں شہید علی خامنہ ای کے جنازے میں عوام کی کثیر اور تاریخی شرکت پر لاکھوں شہریوں کا شکریہ ادا کیا ہے۔ والد کے جنازے کے بعد اپنے پہلے پیغام میں انہوں نے خون کا بدلہ لینے کے پختہ عزم کا اظہار کیا ہے۔

مجتبیٰ خامنہ ای نے کہا کہ شہید رہنما اور گزشتہ دو جنگوں کے شہدا کے خون کا بدلہ قاتلوں سے لیا جائے گا۔ انہوں نے واضح کیا کہ ایرانی عوام کے دشمنوں سے شہدا کے خون کا یہ انتقام لینا بالکل یقینی ہے اور انتقام کا یہ مطالبہ پوری قوم کا ہے جسے ہر صورت پورا کیا جائے گا۔ایرانی سپریم لیڈر کا مزید کہنا تھا کہ ہمارے پاس ان تمام مجرموں کی فہرست موجود ہے جنہوں نے دو جنگوں میں ہمارے لوگوں کو قتل کیا۔

انہوں نے سخت لہجے میں خبردار کیا کہ ان مجرموں اور قاتلوں کی طبعی موت نہیں ہوگی اور مجرموں کا سکون سے مرنے کا خواب کبھی پورا نہیں ہوگا، بلکہ انہیں ہر صورت کیفرِ کردار تک پہنچایا جائے گا۔ انہوں نے عزم ظاہر کیا کہ ہم رہیں یا نہ رہیں، یہ انتقامی مشن جلد یا بدیر ضرور مکمل ہوگا۔

واشنگٹن (بولونیوز) امریکا نے ایران پر مزید نئی اقتصادی پابندیاں عائد کردیں، جن میں کاروباری شخصیت، کرنسی ایکسچینج ہاؤسز اور متعدد کمپنیاں شامل ہیں جبکہ غیر ملکی زرِمبادلہ تک رسائی محدود کرنے کا اعلان بھی کیا گیا ہے۔امریکی محکمہ خزانہ نے ایران کی ایک ممتاز کاروباری شخصیت، متعدد کرنسی ایکسچینج ہاؤسز اور ان سے منسلک کمپنیوں کو پابندیوں کی فہرست میں شامل کردیا ہے۔

امریکی محکمہ خزانہ کے دفتر برائے غیر ملکی اثاثہ جات کنٹرول کے مطابق پابندیوں کا ہدف دبئی میں مقیم ایرانی کاروباری شخصیت علی انصاری ہیں، جن پر الزام ہے کہ وہ ایران کے سپریم لیڈر آیت اللہ علی خامنہ ای کے صاحبزادے مجتبیٰ خامنہ ای اور دیگر اعلیٰ حکومتی شخصیات کے لیے عالمی مالیاتی نیٹ ورک چلا رہے تھے۔

امریکی محکمہ خزانہ کا کہنا ہے کہ علی انصاری نے سرکاری دولت کو بیرونِ ملک جائیدادوں اور تجارتی اثاثوں میں منتقل کیا۔

امریکی حکام کے مطابق علی انصاری نے جرمنی، برطانیہ، اسپین، قبرص، متحدہ عرب امارات اور دیگر ممالک میں جائیدادوں اور کاروباری اثاثوں کا وسیع نیٹ ورک قائم کیا، جسے ایرانی حکمران اشرافیہ اور اسلامی انقلابی گارڈ کور کے مالی مفادات کے لیے استعمال کیا جاتا رہا۔

امریکا نے اس کے ساتھ ایران کے تین کرنسی ایکسچینج ہاؤسز، محمد دربانی اینڈ پارٹنرز، لواسانی اینڈ پارٹنرز اور محسن خندان اینڈ پارٹنرز، ان کے منتظمین اور ان سے وابستہ متعدد فرنٹ کمپنیوں پر بھی پابندیاں عائد کردی ہیں۔

امریکی حکام کا الزام ہے کہ ان اداروں نے پابندیوں کا شکار ایرانی بینکوں کے لیے کروڑوں ڈالر کے غیر ملکی زرِمبادلہ کا انتظام کیا اور ہانگ کانگ، متحدہ عرب امارات سمیت مختلف ممالک میں قائم شیل کمپنیوں کے ذریعے بین الاقوامی مالیاتی لین دین کو خفیہ رکھا۔

محکمہ خزانہ کے مطابق علی انصاری نے اپنی دولت کا بڑا حصہ آیندہ بینک کے ذریعے حاصل کیا، جو 2025 میں اربوں ڈالر کے قرضوں کے باعث منہدم ہو گیا تھا۔ ان سے منسلک بعض اثاثے اسمارٹ گلوبل لمیٹڈ نامی ہولڈنگ کمپنی کے ذریعے رکھے گئے تھے، تاہم امریکی حکام نے اس کمپنی سے متعلق بعض لین دین کو سمیٹنے کے لیے محدود اجازت بھی جاری کی ہے۔

امریکی محکمہ خارجہ کے ترجمان ٹومی پگوٹ نے کہا کہ نئی پابندیوں کا مقصد ایران کی حکمران اشرافیہ کی مالی شہ رگ کاٹنا، غیر ملکی زرِمبادلہ تک اس کی رسائی محدود کرنا اور عالمی مالیاتی نظام میں اس کی سرگرمیوں کو روکنا ہے۔

انہوں نے کہا کہ امریکا ایران کے لیے غیر قانونی مالی اور تجارتی سرگرمیوں میں معاونت کرنے والے افراد، کمپنیوں اور مالیاتی اداروں، بشمول غیر ملکی اداروں، کے خلاف کارروائیاں جاری رکھے گا۔

یہ پابندیاں ایسے وقت میں سامنے آئی ہیں جب چند روز قبل ٹرمپ انتظامیہ نے جنگ بندی سے متعلق گزشتہ ماہ جاری کیے گئے ایک عمومی لائسنس کو بھی منسوخ کر دیا تھا، جس کے تحت ایران کو محدود پیمانے پر خام تیل، پیٹرولیم مصنوعات اور پیٹروکیمیکل مصنوعات فروخت کرنے کی عارضی اجازت دی گئی تھی۔

کراچی(بولونیوز) سندھ بلڈنگ کنٹرول اتھارٹی (ایس بی سی اے) نے ممکنہ مون سون بارشوں کے پیشِ نظر شہر بھر میں خطرناک اور مخدوش عمارتوں سے متعلق عوامی آگاہی مہم تیز کر دی ہے۔ مختلف اضلاع میں خطرناک قرار دی گئی عمارتوں پر وارننگ بینرز آویزاں کر دیے گئے ہیں، جبکہ مکینوں کو لاؤڈ اسپیکر کے ذریعے عمارتیں فوری خالی کرنے کی ہدایت کی جا رہی ہے۔

ایس بی سی اے کے مطابق صوبائی وزیر بلدیات سید ناصر حسین شاہ اور ڈی جی ایس بی سی اے ڈاکٹر وسیم شمشاد کی ہدایت پر خصوصی مہم شروع کی گئی ہے تاکہ شہریوں کی قیمتی جانوں کو ممکنہ حادثات سے محفوظ بنایا جا سکے۔

ادارے نے خبردار کیا ہے کہ مون سون بارشوں کے دوران مخدوش عمارتوں کے اچانک گرنے اور آتشزدگی جیسے خطرات میں اضافہ ہو جاتا ہے، لہٰذا شہری ایسی عمارتوں میں رہائش اختیار کرنے یا ان کے قریب کھڑے ہونے سے گریز کریں۔

ایس بی سی اے کے مطابق کراچی کے ضلع جنوبی، ضلع وسطی، ضلع شرقی سمیت دیگر علاقوں میں خطرناک عمارتوں پر انتباہی بینرز نصب کیے جا رہے ہیں۔ یہ مہم ڈائریکٹر ڈیمالیشن عبدالسجاد خان کی سربراہی میں جاری ہے، جبکہ خطرناک عمارتوں کی فہرستیں اخبارات میں بھی شائع کی جا رہی ہیں۔

ادارے نے شہریوں سے اپیل کی ہے کہ وہ کسی بھی مخدوش یا غیرمعیاری تعمیر شدہ عمارت کی اطلاع فوری طور پر ایس بی سی اے کے دفتر یا سرکاری ویب سائٹ پر درج کرائیں تاکہ بروقت کارروائی عمل میں لائی جا سکے۔