Author: Nadeem Ahmed Jamal

اسلام آباد(بولونیوز) سپریم کورٹ آف پاکستان نے اپنے ایک اہم فیصلے میں قرار دیا ہے کہ مسلم فیملی لاز آرڈیننس 1961 کی دفعہ 7 کے تحت تین طلاق سمیت کسی بھی شکل میں دی گئی طلاق 90 روز کی مدت پوری ہونے سے پہلے مؤثر نہیں ہوتی۔

چیف جسٹس یحییٰ آفریدی کی سربراہی میں تین رکنی بینچ—جسٹس محمد شفیع صدیقی اور جسٹس میاں گل حسن اورنگزیب پر مشتمل—نے محمد حسن سلطان کی طلاق سے متعلق پٹیشن نمٹاتے ہوئے یہ فیصلہ سنایا۔

عدالت نے قرار دیا کہ اگر خاوند نے بیوی کو بلا شرط حقِ طلاق تفویض کیا ہو تو بیوی کو طلاق واپس لینے کا مکمل حق حاصل ہے۔

فیصلے میں بتایا گیا کہ فریقین کی شادی 2016 میں ہوئی اور نکاح نامہ کی شق 18 کے تحت خاوند نے بیوی، مورِیل شاہ، کو غیر مشروط حقِ طلاق دیا تھا۔ بیوی نے 3 جولائی 2023 کو دفعہ 7 (1) کے تحت طلاق کا نوٹس جاری کیا، تاہم 90 روز مکمل ہونے سے قبل 10 اگست 2023 کو کارروائی واپس لے لی۔

عدالتی فیصلے کے مطابق چونکہ نوٹس کے 90 دن پورے نہیں ہوئے تھے، اس لیے یونین کونسل/آربیٹریشن کونسل نے طلاق کی کارروائی درست طور پر ختم کی۔

سپریم کورٹ نے سندھ ہائیکورٹ کے 7 اکتوبر 2024 کے فیصلے کو بھی درست قرار دیتے ہوئے اپیل نمٹا دی۔

اسلام آباد(بولونیوز)وفاقی وزیر داخلہ و نارکوٹکس کنٹرول محسن نقوی نے اسلام آباد انٹرنیشنل ائیرپورٹ کا اچانک دورہ کیا جہاں انہوں نے دو گھنٹے تک امیگریشن کے عمل کا جائزہ لیا اور بیرون ملک جانے والے مسافروں سے ملاقات کی۔

وزیر داخلہ نے امیگریشن پر 7 نومبر کو عملے کی کمی کی شکایت کا سخت نوٹس لیتے ہوئے انکوائری کا حکم دیا۔ انہوں نے سی سی ٹی وی فوٹیج کے ذریعے صورتحال کا جائزہ لینے کی ہدایت کی اور کہا کہ ضروری دستاویزات رکھنے والے کسی مسافر کو سفر سے نہیں روکا جائے۔

محسن نقوی نے ویزا ایجنٹوں کے خلاف کریک ڈاؤن کا حکم دیتے ہوئے کہا کہ جعلی دستاویزات یا دھوکہ دہی سے بیرون ملک بھیجنے والے ایجنٹ ملک کی بدنامی کا باعث بن رہے ہیں۔ انہوں نے واضح کیا کہ معصوم لوگوں کو ملازمت کے جھانسے میں بیرون ملک بھیجنے والوں کے ساتھ کوئی رعایت نہیں برتی جائے گی۔

اسلام آباد(بولونیوز)ڈائریکٹر جنرل انٹر سروسز پبلک ریلیشنز (آئی ایس پی آر) لیفٹیننٹ جنرل احمد شریف چوہدری نے کہا ہے کہ افغان حکومت نہ صرف پاکستان بلکہ پورے خطے اور دنیا کے لیے خطرہ بن چکی ہے۔

انہوں نے صحافیوں کے ساتھ گفتگو میں بتایا کہ امریکی افواج کے انخلا کے دوران 7.2 ارب ڈالرز کا فوجی ساز و سامان افغانستان میں چھوڑا گیا، جس کے بعد سے دہشتگردی کی کارروائیاں بڑھ گئی ہیں۔ رواں سال پاکستان میں 67,023 انٹیلی جنس بیسڈ آپریشنز کیے گئے، جن میں 1,873 دہشتگرد ہلاک ہوئے، جن میں 136 افغانی بھی شامل ہیں۔

ڈی جی آئی ایس پی آر نے افغان طالبان پر الزام لگایا کہ وہ دہشتگردوں کی سہولت کاری کر رہے ہیں اور بارڈر پر غیر قانونی سرگرمیاں جاری ہیں۔ انہوں نے پاکستان کے موقف کو دہرایا کہ افغان حکومت کو دہشتگردی کے خلاف قابل تصدیق اقدامات کرنے چاہئیں۔

کراچی(بولونیوز) آرٹس کونسل آف پاکستان کراچی میں جاری 39 روزہ ورلڈ کلچر فیسٹیول اپنے 30ویں روز میں داخل ہو گیا، جہاں مالی کے معروف فنکار لاسینہ کون نے “ایک سولفل ڈانس جرنی” کے عنوان سے اپنی پرفارمنس پیش کی۔

اس موقع پر لاسینہ کون نے مالی کے رقاصوں پر بنائی گئی ایک دستاویزی فلم بھی پیش کی، جسے تیار کرنے میں بچوں کو سات ماہ لگے، جن میں چار ماہ تربیت اور تین ماہ عمل میں لانے کا وقت شامل تھا۔ تقریب میں طلباء کی کثیر تعداد نے شرکت کی۔

لاسینہ کون نے اپنے خیالات کا اظہار کرتے ہوئے کہا کہ “آرٹ اور کلچر کو پاکستان ہی نہیں پوری دنیا میں متعارف ہونا چاہیے۔” انہوں نے فیسٹیول کے انتظام اور مقامی لوگوں کی hospitality کو سراہا، نیز یہ بھی بتایا کہ ڈرم ہر ملک میں آسانی سے دستیاب ہونے کی وجہ سے انہوں نے یہ عنوان چنا۔

یہ فیسٹیول ثقافتی تبادلے اور فنون کے فروغ کے لیے ایک اہم پلیٹ فارم ثابت ہو رہا ہے، جس میں دنیا بھر کے فنکار شرکت کر رہے ہیں۔

کراچی(بولونیوز)ڈی آئی جی ٹریفک کراچی سید پیر محمد شاہ نے واضح کیا ہے کہ ای چالان ادا نہ کرنے والوں کے ڈرائیونگ لائسنس منسوخ کر دیے جائیں گے۔

انہوں نے بتایا کہ اگر کوئی شہری تین ماہ تک ای چالان ادا نہیں کرتا تو اس کا ڈرائیونگ لائسنس منسوخ ہو جائے گا، جس کے بعد اسے نئے سرے سے لائسنس کے لیے درخواست دینی ہوگی۔ یہ اقدام ٹریفف قوانین کی خلاف ورزیوں پر قابو پانے کے لیے اٹھایا گیا ہے۔

کراچی(بولونیوز)پیپلز پارٹی کے رہنما شرجیل انعام میمن نے اعلان کیا ہے کہ چیئرمین بلاول بھٹو زرداری کا خطاب ملک بھر میں اسکرینوں کے ذریعے براہِ راست نشر کیا جائے گا۔ انہوں نے پارٹی کی خدمات کو سراہتے ہوئے کہا کہ شہید ذوالفقار علی بھٹو نے پاکستان کو ایٹمی طاقت بنایا، جبکہ شہید بینظیر بھٹو نے میزائل ٹیکنالوجی دی۔

میمن نے وزیر خارجہ بلاول بھٹو کے بھارت میں کشمیر کا مقدمہ پیش کرنے کی تعریف کی اور کہا کہ پیپلز پارٹی نے جمہوریت کے لیے قربانیاں دی ہیں۔ انہوں نے مخالفین پر تنقید کرتے ہوئے کہا کہ عمران خان جیل میں سہولیات حاصل کر رہے ہیں، جبکہ کراچی کی ترقی کے منصوبوں پر کام جاری ہے۔

لاہور(بولونیوز)معروف ٹی وی اینکر فرح اقرار نے ایک ٹی وی پروگرام میں انکشاف کیا کہ اگر ان کے شوہر اقرار الحسن کبھی وزیر اعظم بنے تو وہ ‘خاتون اول’ نہیں بلکہ ‘خاتون دوم’ بننا پسند کریں گی۔

فرح اقرار نے اپنے شوہر کے ممکنہ سیاسی مستقبل پر بات کرتے ہوئے کہا، “ممکن ہے کہ میں مستقبل کی سیکنڈ لیڈی بن جاؤں کیونکہ اقرار کی بیویاں زیادہ ہیں۔” انہوں نے واضح کیا کہ اقرار الحسن کا فی الحال وزیر اعظم بننے کا کوئی پلان نہیں ہے۔

یاد رہے کہ فرح اقرار الحسن کی دوسری اہلیہ ہیں، جبکہ اقرار الحسن کی تین شادیاں ہو چکی ہیں۔ فرح نے بتایا کہ وہ اقرار کی سیاسی سوچ پر تنقیدی نظر رکھتی ہیں اور ان پر اعتماد کرتی ہیں کہ وہ اقتدار کے بجائے نوجوانوں کے لیے راستے کھولنا چاہتے ہیں۔

لاہور(بولونیوز)ضلع کچہری لاہور میں جوا ایپس کی غیر قانونی پروموشن کے مقدمے میں یوٹیوبر سعد الرحمان عرف ڈکی بھائی اور ان کی اہلیہ عروب جتوئی عدالت میں پیش ہوئے۔ جج نعیم وٹو نے ملزم سبحان کی بریت کی درخواست خارج کر دی اور سماعت 17 دسمبر تک ملتوی کر دی۔

ڈکی بھائی نے عدالت میں کہا کہ سبحان ان کا ملازم ہے اور اس کا مقدمے سے کوئی تعلق نہیں۔ عدالت نے عروب جتوئی کی ضمانت کی تصدیق کی، جبکہ ڈکی بھائی کے وکیل نے ضبط شدہ الیکٹرانک ڈیوائسز اور رقم کی واپسی کی درخواست کی۔ ڈکی بھائی دو روز قبل ضمانت پر رہا ہوئے ہیں اور ان کے خلاف این سی سی آئی اے مقدمہ درج ہے۔

اسلام آباد(بولونیوز)اقوام متحدہ کے ہائی کمشنر برائے انسانی حقوق والکر ترک نے پاکستان کی 27ویں آئینی ترمیم پر شدید تشویش کا اظہار کرتے ہوئے کہا ہے کہ صدر اور اعلیٰ عسکری قیادت کو تاحیات استثنیٰ دینے سے احتساب کی بنیاد متزلزل ہو گی اور قانون کی حکمرانی خطرے میں پڑ جائے گی۔

انہوں نے نشاندہی کی کہ یہ ترمیم بغیر کسی وسیع مشاورت یا سول سوسائٹی اور قانونی برادری کی شرکت کے جلد بازی میں منظور کی گئی، جو عدلیہ کی آزادی اور جمہوری اداروں کے توازن کے اصولوں کے خلاف ہے۔ ترک نے کہا کہ “استثنیٰ کی یہ شق انتہائی وسیع ہیں، جس سے احتساب کمزور ہو گا، جو انسانی حقوق کے تحفظ اور مسلح افواج کے جمہوری کنٹرول کا بنیادی ستون ہے۔”

والکر ترک نے خبردار کیا کہ یہ تبدیلیاں جمہوری عمل اور انسانی حقوق کے تحفظ پر دور رس اثرات ڈال سکتی ہیں، جس سے قانون کے تحت برابر انصاف فراہم کرنا مشکل ہو جائے گا۔ بین الاقوامی برادری کی یہ تنقید پاکستان میں آئینی تبدیلیوں پر ایک اہم ردعمل سمجھی جا رہی ہے۔

دبئی(بولونیوز)بگ 5 گلوبل نمائش 2025ء میں پہلی بار پاکستانی تعمیراتی کمپنیوں نے شرکت کی ہے، جس میں دبئی ورلڈ ٹریڈ سینٹر میں پاکستانی پویلین کا افتتاح قونصل جنرل پاکستان حسین محمد نے کیا۔

نمائش میں ‘مقتدرہ ترقی تجارت پاکستان’ کے زیر انتظام 9 پاکستانی کمپنیاں شامل ہیں۔ اس عالمی نمائش میں مختلف ممالک سے 85 ہزار سے زائد شرکاء اور 2800 نمائش کنندگان شریک ہیں۔ یہ قدم پاکستانی تعمیراتی شعبے کے بین الاقوامی سطح پر متعارف ہونے کا اہم موقع سمجھا جا رہا ہے۔