کراچی(بولونیوز)عمران خان سے ملاقاتوں کی اجازت نہ ملنے پر پی ٹی آئی کے کارکنان کے کراچی پریس کلب کے باہر احتجاج کے دوران حلیم عادل شیخ سمیت 20 سے زائد خواتین و مرد کارکنان کو پولیس نے حراست میں لے لیا۔
پولیس نے احتجاجی مظاہرہ روکنے کے بعد تمام رہنماؤں اور کارکنان کو مختلف تھانوں میں منتقل کر دیا۔ واقعے کے بعد علاقے میں سیکیورٹی کے سخت انتظامات کر دیے گئے ہیں۔
کراچی(بولونیوز)متحدہ عرب امارات کے قونصل جنرل بخیت عتیق الرومیتی نے پاکستانیوں کو ویزے جاری نہ کرنے کی اطلاعات کو غلط قرار دے دیا ہے۔ انہوں نے بتایا کہ قونصلیٹ میں ویزوں کے لیے اتنا رش ہے کہ گزشتہ تین سالوں میں ایسا نہیں دیکھا گیا۔
قونصل جنرل کے مطابق ویزہ سیکشن میں تمام قسم کے ویزوں کے لیے بہت زیادہ رش ہے اور بعض ویزوں کے لیے پیشگی تاریخ ایک مہینے سے بھی زیادہ ہو چکی ہے۔ یہ تردید اس وقت سامنے آئی ہے جب ایڈیشنل سیکرٹری داخلہ سلمان چوہدری نے سینیٹ کمیٹی میں کہا تھا کہ متحدہ عرب امارات پاکستانیوں کو ویزے جاری نہیں کر رہا ہے۔
کراچی(بولونیوز) سیف سٹی پراجیکٹ کے تحت ایڈیشنل انسپکٹر جنرل جاوید عالم اوڈھو نے نارتھ ناظم آباد اور قصبہ کالونی میں کٹی پہاڑی کے مقام پر نئے نصب سی سی ٹی وی کیمروں کا افتتاح کیا۔ ایس ایس پی سینٹرل ذیشان شفیق صدیقی نے اس موقع پر بتایا کہ یہ جدید سی سی ٹی وی کیمرے کٹی پہاڑی اور اس کے اطراف کی جامع نگرانی کریں گے، جس سے علاقے میں عوام کی حفاظت کو یقینی بنانے اور جرائم کی روک تھام کو بہتر بنانے میں مدد ملے گی۔ پولیس کے مطابق، یہ کیمرے نارتھ ناظم آباد کے مختلف بلاکس کی ریئل ٹائم نگرانی کو ممکن بنائیں گے اور اسٹریٹ کرائمز پر قابو پانے کے لیے اہم ثابت ہوں گے۔
اسلام آباد (بولونیوز) اقوام متحدہ کے ادارہ برائے پناہ گزین (یو این ایچ سی آر) نے تصدیق کی ہے کہ سال 2025 میں دس لاکھ سے زائد افغان شہری پاکستان سے افغانستان واپس آ چکے ہیں۔
اہم نکات:
سردیوں کے آغاز کے باوجود ہزاروں افغان پناہ گزین واپس جا رہے ہیں
واپس آنے والوں میں خواتین اور بچے نمایاں ہیں جو سخت حالات کا شکار ہیں
افغانستان میں غربت اور بے روزگاری کی شرح انتہائی بلند ہے
یو این ایچ سی آر نے مدد کے لیے 35 ملین ڈالر کی اپیل جاری کی ہے
ادارے کے پاکستان میں نمائندہ فلپا کینڈلر کا کہنا تھا کہ “موجودہ حالات میں یہ واپسی تشویش کا باعث ہے۔”
یو این ایچ سی آر نے پاکستان کی حکومت سے اپیل کی ہے کہ خاص حفاظتی ضروریات رکھنے والے افغان شہریوں کو واپس بھیجنے کے منصوبے سے مستثنیٰ رکھا جائے۔
کراچی(بولونیوز)کراچی واٹر اینڈ سیوریج کارپوریشن نے بی آر ٹی کوریڈور میں واقع پرانے 60 انچ قطر کے بوسیدہ وال کو جدید پائپ لائن سے تبدیل کرنے کا فیصلہ کرلیا۔ ترجمان واٹر کارپوریشن کے مطابق پیپلز سیکریٹریٹ کے قریب بی آر ٹی کوریڈور کے تحت موجود اس خستہ حال وال کو نئی پائپ لائن سے تبدیل کیا جائے گا، جس کا مقصد پانی کی ترسیل کے نظام کو مزید محفوظ، مستحکم اور مؤثر بنانا ہے۔ ترجمان نے بتایا کہ مرمتی کام 29 نومبر سے 1 دسمبر تک ہفتہ اور اتوار کے روز انجام دیا جائے گا، جس دوران متاثرہ لائن کی بندش ناگزیر ہوگی۔ انہوں نے مزید کہا کہ مرمتی سرگرمی کے باعث صدر ٹاؤن، جمشید روڈ، پی آئی بی اور لائنز ایریا میں پانی کی فراہمی عارضی طور پر معطل رہے گی۔ ترجمان نے متاثرہ علاقوں کے رہائشیوں سے اپیل کی ہے کہ وہ پانی کے استعمال میں احتیاط برتیں اور ضرورت کے مطابق پیشگی ذخیرہ کرلیں۔
خیبرپختونخوا(بولونیوز)سابق وزیراعلیٰ خیبرپختونخوا علی امین گنڈاپور کا کہنا ہے کہ بھارتی میڈیا کی جانب سے عمران خان سے متعلق جھوٹی خبریں پھیلانا سنگین پروپیگنڈا ہے،منفی مہم کا مقصد عوام کو اشتعال دلانا اور نفرت پھیلانا ہے،یہ پروپیگنڈا ملک کو عدم استحکام کی طرف دھکیلنے کی کھلی سازش ہے۔ ڈیرہ اسماعیل خان میں میڈیا سے گفتگو کرتے ہوئے انہوں نے کہا کہ عمران خان اور بشریٰ بی بی مکمل طور پر صحت مند ہیں اور ایسی تمام خبریں بے بنیاد ہیں،ان کے خلاف قائم جھوٹے مقدمات اور انسانی حقوق کی پامالیوں کی سخت مذمت کرتا ہوں۔ عمران خان کے خلاف ناانصافیوں کو ہر فورم پر اٹھایا گیا ہے،عمران خان پاکستان ہی نہیں بلکہ عالمی سطح کے لیڈر کے طورپر جانے و مانے جاتے ہیں،قوم اپنے قائد کے ساتھ کھڑی ہے اور ان کی جلد رہائی کے لیے جدوجہد جاری رکھے گی۔ جھوٹے پروپیگنڈے کو مکمل طور پر ناکام بنانے کا فیصلہ پوری قوت کے ساتھ کیا گیا ہے۔
شکارپور(بولونیوز)پولیس نے پولیس مقابلہ، قتل اور ڈکیتی کی کوشش کے مقدمات میں مطلوب خطرناک ملزم دھنی بخش جتوئی کو شَر لاڑو سے گرفتار کر لیا۔
ایس ایس پی شکارپور شاہزیب چاچڑ کی ہدایت پر تھانہ اسٹورٹ گنج پولیس نے کارروائی کرتے ہوئے ملزم سے غیر قانونی اسلحہ، ایمونیشن اور موٹر سائیکل برآمد کی۔
گرفتار ملزم کے خلاف تھانہ اسٹورٹ گنج میں قتل، ڈکیتی اور پولیس مقابلے کے دو مقدمات درج تھے۔ ڈی ایس پی سٹی پارس بھکرانی کی سربراہی میں ہونے والی اس کارروائی کے بعد ملزم کے خلاف سندھ اسلحہ ایکٹ کے تحت نیا مقدمہ درج کر لیا گیا ہے۔
اسلام آباد(بولونیوز)چیف جسٹس اسلام آباد ہائیکورٹ جسٹس سردار رضا نے وزیراعلیٰ خیبر پختونخوا سہیل آفریدی سے ملاقات سے انکار کر دیا۔
ذرائع کے مطابق وزیراعلیٰ رات بھر اڈیالہ جیل کے باہر دھرنے کے بعد چیف جسٹس سے ملنے ہائیکورٹ پہنچے، لیکن ان کی ملاقات نہ ہو سکی۔ چیف جسٹس کے سیکرٹری کے آفس سے ناامید ہو کر وزیراعلیٰ اور ان کے ساتھی واپس چلے گئے۔
بلوچستان(بولونیوز)پاکستان کے 20 سب سے پسماندہ اضلاع میں سے 17 بلوچستان میں واقع ہیں، جہاں تقریباً 64 لاکھ افراد صحت، تعلیم اور معاشی مواقع جیسے بنیادی سہولیات سے محروم ہیں۔
صوبائی تقسیم کے مطابق:
بلوچستان: 17 اضلاع
خیبر پختونخوا: 2 اضلاع
سندھ: 1 ضلع
پنجاب: کوئی ضلع شامل نہیں
یہ اعداد و شمار صوبوں کے درمیان ترقیاتی خلیج کو واضح کرتے ہیں، جہاں بلوچستان کے عوام بنیادی انسانی حقوق سے محروم ہیں۔
کراچی(بولونیوز) شہری انتظامیہ نے دودھ کی قیمتوں کے حوالے سے نوٹیفکیشن جاری کرتے ہوئے ریٹیل سطح پر دودھ کی فی لیٹر قیمت 220 روپے مقرر کی ہے۔
نئے نوٹیفکیشن کے مطابق کراچی میں دودھ کی یہ قیمت برقرار رکھی گئی ہے، جس سے عوام کو ریلیف ملنے کی امید ہے۔ حکام کا کہنا ہے کہ مقررہ قیمت سے زیادہ پر دودھ فروخت کرنے والوں کے خلاف قانونی کارروائی کی جائے گی۔