دبئی(بولونیوز)بگ 5 گلوبل نمائش 2025ء میں پہلی بار پاکستانی تعمیراتی کمپنیوں نے شرکت کی ہے، جس میں دبئی ورلڈ ٹریڈ سینٹر میں پاکستانی پویلین کا افتتاح قونصل جنرل پاکستان حسین محمد نے کیا۔
نمائش میں ‘مقتدرہ ترقی تجارت پاکستان’ کے زیر انتظام 9 پاکستانی کمپنیاں شامل ہیں۔ اس عالمی نمائش میں مختلف ممالک سے 85 ہزار سے زائد شرکاء اور 2800 نمائش کنندگان شریک ہیں۔ یہ قدم پاکستانی تعمیراتی شعبے کے بین الاقوامی سطح پر متعارف ہونے کا اہم موقع سمجھا جا رہا ہے۔
نیویارک(بولونیوز)عالمی مالیاتی ادارے (آئی ایم ایف) نے اپنی سالانہ رپورٹ میں بھارت کی معیشت کو سی گریڈ دے کر دوسرے کم ترین درجے پر رکھا ہے۔
رپورٹ کے مطابق بھارت کا معاشی ڈیٹا پرانا اور ناقص ہونے کی وجہ سے اسے مسلسل دوسرے سال سی گریڈ دیا گیا ہے۔ آئی ایم ایف کا کہنا ہے کہ 2011-12 کا بھارتی معاشی ڈیٹا انتہائی پرانا ہے اور اس میں خامیاں معاشی نگرانی کے عمل میں رکاوٹ بنتی ہیں۔
عالمی ادارے نے بھارتی حکومت کے آمدنی کی بنیاد پر جی ڈی پی کے طریقہ کار پر بھی سوال اٹھائے ہیں، جو پہلے بھی ماہرین معاشیات کی تنقید کا نشانہ بن چکا ہے۔
بھارت(بولونیوز)اترپردیش کے ضلع مظفر نگر میں جہیز کے خلاف دولہے کے دلیرانہ موقف نے سوشل میڈیا صارفین کے دل جیت لیے۔دولہے نے باراتیوں سے بھرے مجمعے کے سامنے جہیز کی رقم لینے سے انکار کرکے سماجی برائی کو چیلنج کیا۔
اودھیش رانا نے گورا تلک کی تقریب کے دوران دلہن کے اہلخانہ کو 31 لاکھ روپے واپس کردیے اور ہاتھ جوڑ کر رقم لینے سے انکار کردیا۔
دولہے نے کہا کہ میں ناگوا کا رہنے والا ہوں، میری شادی مظفر نگر کے شہاب الدین پور میں ہوئی تھی اور وہ مجھے جہیز کے طور پر 31 لاکھ روپے دے رہے تھے، ہم نے اسے واپس کر دیا کیونکہ ہم جہیز کے نظام کے خلاف ہیں۔ یہ بالکل غلط ہے۔ جہیز کا نظام مکمل طور پر بند ہونا چاہیے –
ماسکو(بولونیوز) روس نے عالمی سطح پر مقبول میسجنگ ایپ واٹس ایپ کو مکمل طور پر بلاک کرنے کی دھمکی دے دی ہے۔
روس کے مواصلاتی نگران ادارے روسکومنیڈزو کے مطابق، اگر واٹس ایپ روسی قوانین کی پاسداری نہ کر سکا تو اسے ملک بھر میں مکمل طور پر بلاک کر دیا جائے گا۔
غیر ملکی میڈیا رپورٹس کے مطابق، روسی حکام نے ایک بار پھر واٹس ایپ پر جرائم کو روکنے میں ناکامی کا الزام عائد کیا ہے اور شہریوں سے مقامی متبادل ایپس استعمال کرنے کی اپیل کی ہے۔
یہ دھمکی اس وقت سامنے آئی ہے جب روس نے گزشتہ اگست میں واٹس ایپ کالز پر پابندی عائد کی تھی، جو اب مکمل بلاک کی طرف ممکنہ پیشرفت قرار دی جا رہی ہے۔
تہران(بولونیوز)ایران نے امریکہ میں ہونے والی فیفا ورلڈ کپ 2026 کی ڈرا تقریب کے بائیکاٹ کا فیصلہ کیا ہے۔
ایرانی فٹبال فیڈریشن کے ترجمان نے سرکاری ٹیلی ویژن پر اعلان کیا کہ امریکہ نے ایرانی وفد کے کئی اراکین کو ویزے جاری کرنے سے انکار کر دیا ہے، جس کے بعد یہ فیصلہ کیا گیا ہے۔ ان کا کہنا تھا کہ “امریکا کا ایرانی وفد کو ویزے جاری کرنے سے انکار کا فیصلہ کھیل سے ہٹ کر سیاسی نوعیت کا ہے، اس لیے ہمارے نمائندے ڈرا تقریب میں شرکت نہیں کریں گے۔”
غیر ملکی میڈیا رپورٹس کے مطابق امریکی حکام نے ایرانی فٹبال فیڈریشن کے صدر مہدی تاج سمیت کئی اہم شخصیات کو ویزے دینے سے انکار کر دیا ہے۔ تاہم قومی ٹیم کے کوچ امیر قلنویی سمیت چار افراد کو 5 دسمبر کی تقریب کے لیے ویزے جاری کر دیے گئے ہیں۔
متحدہ عرب امارات(بولونیوز)متحدہ عرب امارات (یو اے ای) نے عام پاکستانی پاسپورٹ ہولڈرز کے لیے ویزا جاری کرنے کی سروسز عارضی طور پر معطل کردی ہیں۔
ایڈیشنل سیکریٹری داخلہ سلمان چوہدری نے اس اقدام کی تصدیق کرتے ہوئے بتایا کہ یہ فیصلہ یو اے ای میں کچھ پاکستانی شہریوں کی مجرمانہ سرگرمیوں سے متعلق خدشات کے بعد کیا گیا ہے۔ تاہم نیلے پاسپورٹ، سرکاری اور سفارتی پاسپورٹ رکھنے والوں کی ویزا درخواستیں بدستور قبول کی جارہی ہیں۔
حکام کا کہنا ہے کہ اگر صورتحال میں بہتری نہ آئی تو یہ عارضی پابندی مکمل پابندی میں بدل سکتی ہے، جو پاکستان کے لیے سنگین معاشی نتائج کا باعث بن سکتی ہے۔ یو اے ای پاکستانی ورکرز کا اہم مرکز ہونے کے ساتھ ساتھ ملک کے لیے زرمبادلہ کے حصول کا بڑا ذریعہ بھی ہے۔
اس اقدام سے پاکستانی شہریوں کے سفر اور روزگار پر ممکنہ منفی اثرات کے حوالے سے تشنگیاں پیدا ہوئی ہیں۔
نیپال(بولونیوز)مرکزی بینک، نیپال راسٹرا بینک (این آر بی)، نے 100 روپے کے نئے کرنسی نوٹ جاری کردیے ہیں، جن میں ملک کا نیا نقشہ شامل کیا گیا ہے۔ اس نقشے میں کالاپانی، لیپولیکھ اور لمپیادھورا جیسے متنازع علاقے دکھائے گئے ہیں، جو بھارت کے ساتھ سرحدی تنازع کا باعث بنے ہوئے ہیں۔ اس اقدام سے بھارت میں کھلبلی مچ گئی ہے اور دونوں ممالک کے درمیان تعلقات میں نئی کشیدگی پیدا ہوگئی ہے۔
نئے نوٹوں پر سابق گورنر مہا پرساد ادھیکاری کے دستخط ہیں، اور ان کی اجراء تاریخ 2081 BS (جو 2024 عیسوی کے مطابق ہے) درج ہے۔ یہ نوٹس دراصل گزشتہ برس منظور کیے گئے ڈیزائن کے مطابق ہیں، جسے سابق وزیر اعظم پشپا کمال ڈھال کی منظوری کے بعد باضابطہ شکل دی گئی تھی۔ نوٹوں کی پچھلی جانب پرانا نقشہ ہٹا کر نیا نقشہ شامل کیا گیا ہے، جو نیپال کے پارلیمانی طور پر منظور شدہ ترمیمی نقشے پر مبنی ہے۔
واضح رہے کہ 2020ء میں نیپال کے سابق وزیر اعظم کے پی شرما اولی کی حکومت نے ملک کا ترمیمی نقشہ جاری کیا تھا، جس میں لیپولیکھ، لیمپیادھورا اور کالاپانی کو آئینی طور پر نیپال کا حصہ قرار دیا گیا تھا۔ اس نقشے کی پارلیمنٹ نے توثیق کی تھی، اور اب اسے کرنسی نوٹوں پر شائع کرکے نیپال نے اپنے موقف کو مزید مضبوط کرنے کی کوشش کی ہے۔
دوسری جانب، بھارت نے اس اقدام کو یکطرفہ قرار دیتے ہوئے سخت ردعمل کا اظہار کیا ہے۔ بھارتی حکومت کا کہنا ہے کہ یہ علاقے تاریخی طور پر بھارت کے ہیں، اور نیپال کاشدہ نقشے کو کرنسی نوٹ کا حصہ بنانا غیر قانونی اور ناقابل قبول ہے۔ بھارت کے مطابق، اس قسم کے مصنوعی توسیع پر مبنی علاقائی دعوے بین الاقوامی اصولوں کے خلاف ہیں اور اس خطے میں امن و استحکام کے لیے خطرہ ہیں۔
اس تنازع کے باوجود، نیپال راسٹرا بینک نے نئے 100 روپے کے نوٹوں کو گردش میں لانے کی تصدیق کی ہے، اور یہ نوٹ اب عوام کے استعمال کے لیے دستیاب ہیں۔ ماہرین کے مطابق، یہ قدم دونوں ممالک کے درمیان موجودہ سفارتی تعلقات کو مزید کمزور کرسکتا ہے، جس کے حل کے لیے دونوں فریقوں کے درمیان مذاکرات کی ضرورت ہوگی۔
ڈھاکا(بولونیوز)بنگلادیش کی سابق وزیراعظم اور بنگلادیش نیشنلسٹ پارٹی کی چیئرپرسن خالدہ ضیاء کی حالت تشویشناک ہوگئی ہے، انہیں پھیپھڑوں اور دل کے انفیکشن کے باعث ڈھاکا کے ایورکیئر اسپتال کے سی سی یو میں منتقل کر دیا گیا ہے۔
79 سالہ خالدہ ضیاء پہلے ہی دل، جگر، گردوں، ذیابیطس اور پھیپھڑوں کی بیماریوں سمیت متعدد امراض میں مبتلا ہیں۔ ان کے دل میں پیس میکر نصب ہے اور وہ مئی میں لندن سے علاج کروا کر واپس آئی تھیں۔
بی این پی نے قوم سے ان کی صحتیابی کے لیے دعاؤں کی اپیل کی ہے۔
نئی دہلی(بولونیوز)بھارت کی ریاست آسام کی اسمبلی نے ‘پروہیبیشن آف پولیگمی بل 2025’ منظور کر لیا ہے جس کے تحت پہلی شادی کو ختم کیے بغیر دوسری شادی کرنے پر 10 سال قید کی سزا مقرر کی گئی ہے۔
بل کی خصوصیات:
دوسری شادی کرنے والوں کے لیے 10 سال قید
بار بار جرم پر دوگنی سزا
شادی کرانے والوں پر 1.5 لاکھ روپے جرمانہ
معلومات چھپانے پر 2 سال قید اور 1 لاکھ روپے جرمانہ
یہ قانون سکسٹ شیڈول کے علاقوں اور قبائلی برادریوں پر لاگو نہیں ہوگا۔ اسمبلی میں طویل مباحثے کے بعد یہ بل منظور کیا گیا۔
دمشق(بولونیوز) اسرائیلی فوج نے شامی دارالحکومت دمشق کے نواحی علاقے بیت جن پر زمینی حملہ اور بمباری کی، جس کے نتیجے میں 13 شہری ہلاک اور 25 زخمی ہوگئے۔
شامی سرکاری میڈیا کے مطابق ہلاکتوں میں دو بچے بھی شامل ہیں، جبکہ اسرائیلی فوج نے اعتراف کیا ہے کہ جوابی کارروائی میں اس کے چھ فوجی زخمی ہوئے ہیں۔
مقامی ذرائع کے مطابق اسرائیلی ڈرون اب بھی علاقے پر اڑان بھر رہے ہیں اور اسرائیلی فوج نے نقل و حرکت کو نشانہ بنانا جاری رکھا ہوا ہے۔ یہ حملہ اسرائیل کی جانب سے شامی سرزمین پر بڑھتے ہوئے فوجی عمل کا تازہ واقعہ ہے۔