کینسر کے مریضوں کے لیے ریڈیوتھراپی سہولت میں اضافہ،کرن ہسپتال ہیلسیون لیناک مشین کا افتتاح
کراچی(بولونیوز)کراچی انسٹیٹیوٹ آف ریڈیوتھراپی اینڈ نیوکلیئرمیڈیسن(کرن)،جو پاکستان ایٹمی توانائی کمیشن (PAEC) کے زیرِ انتظام ملک کا سب سے بڑا سرکاری کینسر ہسپتال ہے، میں جدید ترین دوسری ہیلسیون لینیئر ایکسلریٹر (Halcyon LINAC) مشین کا افتتاح کر دیا گیا ہے۔ اس اہم اضافے سے کینسر کے مریضوں کے لیے جدید ریڈیوتھراپی سہولت میں نمایاں بہتری آئی ہے۔
نئی مشین کی تنصیب کےبعد کرن ہسپتال اس وقت چارلینیئر ایکسلریٹرز آپریٹ کر رہا ہے، جن میں دو جدید ہیلسیون سسٹمز شامل ہیں۔ ہیلسیون مشین جدید آئی ایم آر ٹی (IMRT) اور وی ایم اے ٹی (VMAT) تکنیکوں کے ذریعے انتہائی درست اور مؤثر ریڈیوتھراپی فراہم کرتی ہے، جس سے علاج کے معیار اور مریضوں کی دیکھ بھال میں مزید بہتری آئے گی۔
کرن ہسپتال میں اس وقت روزانہ تقریباً 250 کینسر مریضوں کو ریڈیوتھراپی فراہم کی جا رہی ہے، جو ملک میں کسی بھی کینسر ہسپتال کے لیے سب سے زیادہ یومیہ تعداد ہے۔ دوسری ہیلسیون لیناک مشین کے آغاز کے بعد یہ صلاحیت بڑھ کر تقریباً 400 مریض یومیہ ہو جائے گی، جس سے ریڈیوتھراپی کے لیے مریضوں کا انتظار کا وقت نمایاں طور پر کم ہو جائے گا۔
دوسری ہیلسیون مشین کی شمولیت سے کراچی میں ریڈیوتھراپی کے سب سے بڑے مرکز کے طور پر کرن ہسپتال کا کردار مزید مضبوط ہو گیا ہے۔ یہ اقدام زیادہ سے زیادہ خاندانوں کو جدید اور معیاری کینسر علاج تک رسائی فراہم کرنے کے عزم کا عملی اظہار ہے۔ اسٹیک ہولڈرز کے مطابق یہ منصوبہ اس بات کی مثال ہے کہ ہسپتال، کمیونٹی ادارے اور ٹیکنالوجی پارٹنرز باہمی تعاون سے جدید کینسر کیئر کو ہر پاکستانی کے لیے، مالی حیثیت سے قطع نظر، قابلِ حصول بنا سکتے ہیں۔
یہ سہولت کرن پیشنٹس ویلفیئر سوسائٹی (KPWS) اور اسٹریٹیجک پلانز ڈویژن (SPD) کی فراخدلانہ معاونت سے ممکن ہوئی ہے، جس کے تحت مستحق کینسر مریضوں کو اس مشین پر مفت علاج فراہم کیا جائے گا۔
ہیلسیون سسٹم جدید امیج گائیڈنس ٹیکنالوجی سے لیس ہے، جو ہر علاج سیشن میں انتہائی درست ریڈیوتھراپی کی فراہمی کو یقینی بناتی ہے۔ اس سے مریض کی درست پوزیشننگ اور تمام ٹیومر سائٹس پر مؤثر علاج ممکن ہوتا ہے۔ یہ پلیٹ فارم کمپیکٹ اور مریض دوست ورک فلو کے تحت ہر قسم کے ٹیومرز کے علاج کے لیے ڈیزائن کیا گیا ہے، جبکہ طبی عملے کے لیے علاج کے سیشنز کو کم وقت میں مؤثر انداز سے مکمل کرنے میں بھی مدد دیتا ہے۔
مریضوں کے آرام کو خصوصی اہمیت دی گئی ہے۔ مشین میں ایسا کاؤچ نصب ہے جو اوپر نیچے ہو سکتا ہے تاکہ مریض کو آسانی سے درست پوزیشن میں رکھا جا سکے۔ سیٹ اپ کے دوران مشین نسبتاً کم شور کرتی ہے، جبکہ کاؤچ پر نصب کیمرہ اور انٹرکام کے ذریعے مریض اور تھیراپسٹ کے درمیان ہر وقت رابطہ برقرار رہتا ہے۔
حفاظتی فیچرز میں کولژن ڈیٹیکشن، چھ نکاتی حفاظتی طریقۂ کار اور روزانہ کی کارکردگی کی جانچ شامل ہے، جو تقریباً پانچ منٹ میں مکمل ہو جاتی ہے۔ مزید جدید اپ گریڈز کے ذریعے مریضوں کی درست پوزیشننگ اور مجموعی ورک فلو کو مزید ہموار اور مؤثر بنا دیا گیا ہے۔
