انفورسمنٹ کلکٹریٹ نے 30.5 میٹرک ٹن اسمگل شدہ چھالیہ اور چار بسیں برآمد کر لیں
گڈانی(بولونیوز)انفورسمنٹ کلکٹریٹ گڈانی نے خفیہ اطلاع کی بنیاد پر ضلع حب میں اشوک پمپ کے قریب کارروائی کرتے ہوئے غیر ملکی ساختہ 30.5 میٹرک ٹن اسمگل شدہ چھالیہ اور چار مسافر بسیں ضبط کر لیں۔ ضبط شدہ سامان اور گاڑیوں کی مجموعی مالیت تقریباً 25 کروڑ 25 لاکھ روپے ہے۔
کارروائی چیف کلکٹر (انفورسمنٹ) کی طرف سے فراہم کردہ مصدقہ خفیہ معلومات کی بنیاد پر کی گئی۔ ٹیم نے فرنٹیئر کور اور مقامی پولیس کی معاونت سے کارروائی انجام دی تاکہ معلومات کی تصدیق اور عملدرآمد یقینی بنایا جا سکے۔
ابتدائی نگرانی کے دوران ممکنہ مزاحمت اور سکیورٹی خطرات کا جائزہ لیا گیا۔ کارروائی شروع ہوتے ہی ایک ہجوم جمع ہوگیا، جس سے ہنگامہ آرائی ہوئی، تاہم کسٹمز، ایف سی اور پولیس کی مشترکہ کوششوں سے صورت حال پر قابو پا لیا گیا۔ بسوں کے ڈرائیور فرار ہونے میں کامیاب ہو گئے، لیکن ضبط شدہ گاڑیاں فوری طور پر کسٹمز ویئرہاؤس گڈانی منتقل کر دی گئیں۔
بعد ازاں، گواہوں کی موجودگی میں کی جانے والی تفصیلی جانچ پڑتال کے دوران 30.5 میٹرک ٹن چھالیہ برآمد کی گئی۔ ضبط شدہ بسوں کے رجسٹریشن نمبر BSE-088، BSH-999، BSB-919 اور BSB-613 ہیں۔
ایف بی آر نے کہا ہے کہ قومی معیشت کے تحفظ، اسمگلنگ اور بدعنوانی کے خاتمے کے لیے انفورسمنٹ کی کارروائیاں جاری رکھی جائیں گی۔
