متحدہ عرب امارات: گرد و غبار کے طوفان کی پیش گوئی، شہریوں اور ڈرائیورز کے لیے ہدایات جاری
متحدہ عرب امارات(بولونیوز)نیشنل سینٹر آف میٹرولوجی (این سی ایم) نے گرد و غبار کے طوفان کے خدشے کے پیش نظر عوام اور خاص طور پر گاڑی چلانے والوں کے لیے اہم ہدایات جاری کر دی ہیں۔
این سی ایم نے الرٹ جاری کرتے ہوئے کہا ہے کہ آنے والے دنوں میں تیز ہوائیں حدِ نگاہ کو متاثر کر سکتی ہیں، جس کے باعث ڈرائیونگ کے دوران خطرناک صورتحال پیدا ہونے کا امکان ہے۔
محکمہ موسمیات نے شہریوں کو ہدایت کی ہے کہ وہ گرد آلود موسم میں غیر ضروری طور پر باہر نہ نکلیں اور گھروں اور عمارتوں کے دروازے و کھڑکیاں بند رکھیں۔ مزید کہا گیا ہے کہ موسم سے متعلق تازہ ترین معلومات صرف سرکاری ذرائع سے حاصل کی جائیں۔
رپورٹس کے مطابق این سی ایم نے سمندر کے کنارے جانے والوں کو بھی خبردار کیا ہے کہ تیز ہواؤں کے باعث سمندر میں شدید طغیانی کا خدشہ ہے، خاص طور پر بحیرہ عمان میں حالات زیادہ خراب ہو سکتے ہیں۔
شہریوں اور ڈرائیورز سے اپیل کی گئی ہے کہ وہ حفاظتی اقدامات پر عمل کریں اور موسم کی صورتحال پر مسلسل نظر رکھیں۔
