لیو اِن ریلیشن شپ: باپ نے بیٹے کے ساتھ رہنے والی لڑکی کو بھیانک طریقے سے قتل کر دیا
رائے پور(بولونیوز)بھارتی ریاست چھتیس گڑھ میں ایک باپ نے اپنے بیٹے کے ساتھ رہنے والی لڑکی کو بھیانک طریقے سے قتل کر دیا، بتایا جا رہا ہے کہ وہ لیو اِن ریلیشن شپ پر ناراض تھا۔
عالمی میڈیا کی رپورٹ کے مطابق ضلع کاوردھا میں لوہارہ تھانہ کے علاقے بنداٹولا گاؤں میں جہل پٹیل نامی شخص نے ’لیو اِن ریلیشن شپ‘ پر ناراض ہونے کے سبب اپنے بیٹے کے ساتھ رہنے والی لڑکی کامنی نشاد کو قتل کر دیا۔
پولیس نے جہل پٹیل کو گرفتار کر لیا ہے، جس نے بتایا کہ اس نے 7 نومبر کو بیٹے کو کسی بہانے گھر سے باہر بھیجا، پھر خاتون کامنی کو زبردستی زہریلی دوا پلائی اور پھر اسے قتل کر دیا، اس کے بعد لاش گھر کے صحن میں سیپٹک ٹینک میں پھینک دی، اور اس کے اوپر سیمنٹ سے پلستر کر دیا۔
پولیس کے مطابق باپ لیو ان ریلیشن سپ سے سخت ناراض تھا، وہ اس بات پر بھی پریشان تھا کہ خاتون کا تعلق ایک مختلف کمیونٹی سے ہے۔ ملزم کا بیٹا جب گھر واپس آیا تو اس نے خاتون کے بارے میں دریافت کیا، والد نے بتایا کہ عورت گھر سے بھاگ گئی ہے، جب لڑکی کا کوئی سراغ نہیں ملا تو اس نے تھانہ لوہارا میں گمشدگی کی رپورٹ درج کرا دی۔
تفتیش کے دوران پولیس نے جہل پٹیل سے کئی بار پوچھ گچھ کی اور ہر بار اس نے مختلف بیانات دیے، جس سے پولیس کا شک ہوا، جب پولیس سختی اختیار کی تو ملزم نے اعتراف کر لیا۔
رپورٹ کے مطابق کامنی اور نوجوان بھوجرام پٹیل حیدرآباد میں ایک ساتھ کام کرتے تھے، جہاں ان میں محبت ہو گئی، اور کچھ مہینوں بعد وہ شادی کرنے کے ارادے سے گاؤں بنداٹولا، کاوردھا آئے۔ خاتون کا تعلق مختلف ذات سے تھا اس لیے نوجوان کے گھر والے اس شادی پر راضی نہیں تھے۔
