وزیراعظم کے معاونِ خصوصی ہارون اختر کی مقامی آٹو سیکٹر کو یقین دہانی

اسلام آباد(بولونیوز) وزیراعظم کے معاونِ خصوصی برائے صنعت و پیداوار ہارون اختر نے مقامی آٹو اسمبلرز کو یقین دلایا ہے کہ ملک میں درآمد کی جانے والی تمام گاڑیاں وہی حفاظتی اور کوالٹی معیار پورا کریں گی جو حکومت نے مقامی طور پر تیار کی جانے والی گاڑیوں کے لیے مقرر کر رکھے ہیں۔

جمعرات کے روز اسلام آباد میں مقامی گاڑی ساز کمپنیوں کے نمائندوں سے ملاقات کے دوران ہارون اختر نے بتایا کہ کم مالیت ظاہر کر کے کسٹمز سے کلیئرنس حاصل کرنے کے مسائل کو فیڈرل بورڈ آف ریونیو (FBR) اور کسٹمز ویلیوایشن حکام کے سامنے اٹھایا جائے گا۔

انہوں نے کہا کہ حکومت آٹو انڈسٹری کے لیے ایک منصفانہ اور مسابقتی ماحول فراہم کرنے کے لیے پرعزم ہے۔
ہارون اختر نے کہا:
“استعمال شدہ گاڑیوں کے لیے مقرر کردہ ویلیوایشن اور امپورٹ ٹریڈ پرائسز (ITPs) کو اپ ڈیٹ کرنا اور سالانہ بنیادوں پر نظرِ ثانی ضروری ہے۔ وزارتِ صنعت و پیداوار مقامی مینوفیکچرنگ، روزگار کے مواقع اور ایک ترقی پسند آٹو پالیسی کو ترجیح دیتی رہے گی تاکہ مسابقت بڑھے اور آخرکار پاکستانی صارفین کو فائدہ پہنچے۔”