فیلڈ مارشل جنرل عاصم منیر کی تقرری قومی سلامتی کے لیے سنگِ میل ہے
اسلام آباد(بولونیوز) پاکستان پیپلز پارٹی کی مرکزی رہنما سینیٹر حسنہ بانو زہری نے پاکستان کے پہلے چیف آف ڈیفنس فورسز کے منصب پر تقرری اور مدتِ ملازمت میں توسیع پر فیلڈ مارشل جنرل عاصم منیر کو دلی مبارکباد پیش کی۔
اپنے جاری کردہ بیان میں انہوں نے کہا کہ جنرل عاصم منیر کی یہ اہم تقرری ملک کی دفاعی ضرورتوں، پیشہ ورانہ تسلسل اور قومی سلامتی کے استحکام کا واضح ثبوت ہے۔
سینیٹر حسنہ بانو زہری نے کہا کہ جنرل عاصم منیر کی اصولی قیادت، وسیع تجربہ اور پاک فوج کے اندر مثالی نظم و ضبط کو برقرار رکھنے میں ان کا کردار ہمیشہ قابلِ تحسین رہا ہے۔ انہوں نے امید ظاہر کی کہ چیف آف ڈیفنس فورسز کے نئے منصب پر فائز ہونے کے بعد جنرل عاصم منیر ملکی مفاد، قومی یکجہتی، اور خطے میں امن و استحکام کے لیے مزید مؤثر کردار ادا کریں گے۔
انہوں نے مزید کہا کہ دفاعی اداروں کی مضبوطی پاکستان کی سلامتی کی ضمانت ہے، اور جنرل عاصم منیر کی قیادت میں ملک مزید محفوظ، مستحکم اور ترقی کی راہ پر گامزن ہوگا۔
