روسی صدر ولادیمیر پیوٹن دو روزہ دورے پر بھارت پہنچ گئے
نئی دہلی(بولونیوز) روس کے صدر ولادیمیر پیوٹن دو روزہ سرکاری دورے پر بھارت پہنچ گئے۔ صدر کی آمد سے قبل مختلف بھارتی علاقوں میں منعقد کی گئی پوجا اور روایتی رسومات کی ویڈیوز نے سوشل میڈیا صارفین کی توجہ اپنی جانب مبذول کر لی۔
عالمی میڈیا رپورٹس کے مطابق بھارت سمیت دنیا بھر میں سوشل میڈیا صارفین ان ویڈیوز پر تبصرے کرتے نظر آئے، جن میں صدر پیوٹن کی تصاویر کے سامنے روایتی ہندو رسومات ادا کی جا رہی تھیں۔
ریاست اتر پردیش میں ایک خصوصی پوجا کی تقریب کا ویڈیو سامنے آیا، جس میں روسی صدر کی فریم شدہ تصویر میز پر سجی ہوئی تھی، جبکہ خواتین بھجن گاتی اور تصویر کی آرتی اتارتی دکھائی دیں۔ کچھ صارفین نے اس غیر معمولی منظر پر طنزیہ یا دلچسپ تبصرے بھی کیے۔
اسی طرح وارانسی میں بھی ایک تقریب میں دیے جلائے گئے اور وہاں “ویلکم پیوٹن” کے پیغامات آویزاں کیے گئے۔ مذہبی رسومات انجام دینے والے کچھ افراد مخصوص برتن تھامے روسی صدر کی تصویر کے سامنے پوجا کرتے دکھائی دیے۔
صدر پیوٹن کے دورۂ بھارت کے دوران دونوں ممالک کے درمیان دفاع، توانائی اور اقتصادی تعاون سے متعلق کئی اہم ملاقاتیں متوقع ہیں۔
