کراچی میں دل خراش واقعہ،سندھ اسمبلی کے ارکان آبدیدہ، ذمہ داران کے خلاف کارروائی کا مطالبہ
کراچی(بولونیوز)تین سالہ ننھے ابراہیم کی المناک ہلاکت پر سندھ اسمبلی کے ارکان جذبات پر قابو نہ رکھ سکے اور اجلاس کے دوران آبدیدہ ہو گئے۔ ارکانِ اسمبلی نے واقعے کی شدید مذمت کرتے ہوئے کہا کہ معصوم بچے کی موت نے پورے شہر کو جھنجھوڑ کر رکھ دیا ہے۔
اجلاس میں مختلف ارکان نے مطالبہ کیا کہ واقعے کے ذمہ داروں کے خلاف سخت قانونی کارروائی کی جائے، غفلت برتنے والے افسران اور عملے کو نہ صرف نوکریوں سے برطرف کیا جائے بلکہ ان کے خلاف فوجداری مقدمات بھی درج کیے جائیں۔
ارکانِ اسمبلی کا کہنا تھا کہ چاہے کوئی شہری ڈکیتی کے دوران جان سے جائے یا کھلے مین ہول میں گر کر، اصل میں ہم سب اس کے ذمہ دار ہیں کیونکہ سڑکوں، نکاسی آب اور شہری انتظامیہ کے مسائل کی ذمہ داری ریاست اور عوامی نمائندوں پر عائد ہوتی ہے۔
اجلاس کے دوران متعدد ارکان نے ننھے ابراہیم کی تصاویر اٹھا کر انصاف کا مطالبہ کیا اور کہا کہ کراچی میں ایسے دل خراش واقعات معمول بن چکے ہیں، جنہیں روکنے کے لیے ایمرجنسی بنیادوں پر اقدامات کیے جانے ضروری ہیں۔
