کراچی اور سندھ کی عوام کو ہم نے ماسٹر پلان دیا، مگر عملدرآمد تاحال نہیں ہوا، علی خورشیدی
کراچی(بولونیوز) پاکستان تحریک انصاف کے رہنما علی خورشیدی نے کہا ہے کہ کراچی اور سندھ کی عوام کو ایک جامع ماسٹر پلان دیا گیا جسے سندھ حکومت پہلے ہی انڈورس کرچکی ہے، مگر بدقسمتی سے اس پر تاحال کوئی پیش رفت نہیں ہوسکی۔ انہوں نے کہا کہ ایک ایسا پلان جو پہلے ہی گزٹ ہو چکا ہے، اسے مسلسل نظر انداز کیا جارہا ہے جو حکومت کی نیت پر سوال اٹھاتا ہے۔
علی خورشیدی کا کہنا تھا کہ ماسٹر پلان پر عملدرآمد نہ کرنا سندھ حکومت کی غیر سنجیدگی اور ترجیحات کے بدلتے ہوئے رجحان کی عکاسی کرتا ہے۔ ’’یہ شہریوں کو اُن کے بنیادی حقوق سے دور رکھنے کے مترادف ہے۔ اگر حکومت واقعی عوام کا بھلا چاہتی ہے تو منظور شدہ ماسٹر پلان پر فوری عمل درآمد کرے،‘‘ انہوں نے زور دیا۔
انہوں نے کہا کہ کراچی کا مقدمہ ہم لڑ رہے ہیں اور لڑتے رہیں گے۔ ’’بدقسمتی سے اسمبلی میں عددی اکثریت رکھنے والے افراد کو کراچی کی کوئی فکر نہیں،‘‘ علی خورشیدی نے کہا۔ انہوں نے مزید کہا کہ شہر کی تعمیر و ترقی صرف باتوں سے نہیں بلکہ عملی اقدامات سے ہوگی۔
علی خورشیدی نے حکومت سندھ سے مطالبہ کیا کہ ماسٹر پلان پر فوری عمل کیا جائے تاکہ کراچی سمیت پورے صوبے میں دیرپا ترقی کی راہ ہموار ہوسکے۔
