میرانشاہ روڈ پر دہشت گردوں کا حملہ، اسسٹنٹ کمشنر شمالی وزیرستان سمیت 4 افراد شہید
بنوں(بولونیوز)بنوں کے علاقے میرانشاہ روڈ پر فلور ملز کے قریب نامعلوم دہشت گردوں نے اسسٹنٹ کمشنر شمالی وزیرستان کی گاڑی پر حملہ کردیا، جس کے نتیجے میں اسسٹنٹ کمشنر شاہ ولی اللہ سمیت 4 افراد شہید ہو گئے۔
پولیس کے مطابق حملہ اس وقت ہوا جب اسسٹنٹ کمشنر شاہ ولی اللہ میرانشاہ سے بنوں کی جانب آ رہے تھے۔ دہشت گردوں نے فائرنگ کے بعد گاڑی کو آگ بھی لگا دی۔ واقعے میں 2 پولیس اہلکار بھی شہید ہوئے جبکہ 2 اہلکار زخمی ہوئے، جنہیں فوری طور پر اسپتال منتقل کردیا گیا۔
اسسٹنٹ کمشنر بنوں نے واقعے کی تصدیق کرتے ہوئے بتایا کہ حملہ آور فائرنگ کے بعد زخمی پولیس اہلکاروں کا اسلحہ بھی ساتھ لے گئے۔ ابتدائی اطلاعات کے مطابق دہشت گردوں نے گاڑی کو گھیرے میں لے کر اندھا دھند فائرنگ کی۔
سیکیورٹی فورسز نے علاقے کو گھیرے میں لے کر سرچ آپریشن شروع کر دیا ہے جبکہ شہدا کی میتیں ضابطے کی کارروائی کے بعد ورثا کے حوالے کی جا رہی ہیں۔
