گورنر سندھ کامران ٹیسوری کی سیہون آمد، مزارِ قلندر پر حاضری اور زائرین میں لنگر تقسیم
سیہون شریف(بولونیوز)گورنر سندھ کامران ٹیسوری پیر کے روز سیہون پہنچے، جہاں انہوں نے حضرت لعل شہباز قلندرؒ کے مزار پر حاضری دی، پہول چڑھائے اور ملک کی سلامتی، خوشحالی اور امن کے لیے خصوصی دعائیں کیں۔ اس موقع پر گورنر کے ہمراہ ان کی فیملی بھی موجود تھی۔
گورنر سندھ نے مزار پر حاضری کے بعد زائرین میں لنگر بھی تقسیم کیا۔ مزار پر حاضری کے بعد انہوں نے میڈیا سے گفتگو سے معذرت کرلی۔
اس سے قبل گورنر سندھ نے وزیراعلیٰ سندھ کے سینیئر پرائیویٹ سیکریٹری محمد سلیم باجاری کی رہائشگاہ پر ناشتے میں شرکت کی، جس کے بعد وہ مزارِ قلندر کی جانب روانہ ہوئے۔
گورنر کی سیہون آمد کے موقع پر سیکیورٹی کے انتہائی سخت انتظامات کیے گئے تھے۔ ایڈیشنل ڈپٹی کمشنر جامشورو بابر خان نظامانی، اسسٹنٹ کمشنر سیہون محمد وقاص ملوک، ڈی ایس پی فراز علی میتلو سمیت دیگر ضلعی افسران بھی موجود رہے۔
