چیئرمین نیو کراچی ٹاؤن محمد یوسف نے ٹاؤن کے مختلف سیکٹرز کا تفصیلی دورہ

کراچی(بولونیوز)چیئرمین نیو کراچی ٹاؤن محمد یوسف نے ٹاؤن کے مختلف سیکٹرز کا تفصیلی دورہ کیا اور 600 گلیوں کے پروجیکٹ کےتحت جاری ترقیاتی کاموں کا بغور معائنہ کیا۔ انہوں نے سیکٹر 11-J,11-E,11-L ا ور دیگر علاقوں میں پیور بلاک کی تنصیب کے عمل کی رفتار،معیاراورمجموعی پیشرفت کےحوالےسےمتعلقہ افسران سےبریفنگ لی۔اس موقع پریوسی چیئرمینز،وائس چیئرمینز، کونسلرز اور مقامی مکین بھی بڑی تعداد میں موجود تھے جنہوں نے چیئرمین کو اپنے علاقوں کے مسائل سے آگاہ کیا۔چیئرمین محمد یوسف نے اس موقع پر بات کرتے ہوئے کہا کہ نیو کراچی ٹاؤن میں جاری 600 گلیوں کا منصوبہ ٹاؤن کی تاریخ کا سب سے بڑا اور اہم ترقیاتی منصوبہ ہے، جس کا مقصد شہریوں کو پائیدار، مضبوط اور جدید انفراسٹرکچر فراہم کرنا ہے۔ انہوں نے کہا کہ پیور بلاک کی تنصیب کے ذریعے نہ صرف گلیوں کی خوبصورتی میں اضافہ ہوگا بلکہ بارشوں کے دوران نکاسی آب کے مسائل بھی مؤثر انداز میں کم ہوں گے۔ ان کا کہنا تھا کہ ہم اپنے ٹاؤن کو چمکتا دمکتا اور مکمل ماڈل ٹاؤن کی شکل میں دیکھنا چاہتے ہیں، اس کے لیے تمام ترقیاتی کام معیار کے اعلیٰ ترین تقاضوں کے مطابق مکمل کیے جا رہے ہیں کسی بھی قسم کی غفلت یا جلد بازی ناقابلِ قبول ہے۔انہوں نے مزید کہا کہ 600 گلیوں میں ترقیاتی کام تیزی سے جاری ہیں اور کوشش ہے کہ عوام کو بہترین سہولیات جلد از جلد فراہم کی جائیں۔ چیئرمین نے مختلف گلیوں میں جا کر پیور بلاک کے لیول، کورنگ، نکاسی آب کے نظام اور صفائی انتظامات کا بھی جائزہ لیا۔ انہوں نے افسران کو ہدایت دی کہ جہاں کہیں بھی کمی محسوس ہو اسے فوری طور پر دور کیا جائے اور شہریوں کو درپیش مسائل کو ترجیحی بنیادوں پر حل کیا جائے۔دورے کے دوران چیئرمین محمد یوسف نے کراچی میں گٹر میں گر کر جاں بحق ہونے والے معصوم بچے کے افسوسناک واقعے پر والدین سے گہرے دکھ اور ہمدردی کا اظہار بھی کیا۔ انہوں نے کہا کہ ایک معصوم بچے کا یوں ضائع ہو جانا پورے شہر کے لیے دل خراش سانحہ ہے۔ والدین جس اذیت سے گزر رہے ہیں، ہم ان کے دکھ میں برابر کے شریک ہیں۔ انہوں نے متعلقہ اداروں کو ہدایت کی کہ مین ہول کورز کی نگرانی کو سخت بنایا جائے، ٹوٹے ہوئے کورز فوری تبدیل کیے جائیں اور سیوریج لائنوں کی باقاعدہ مانیٹرنگ کی جائے تاکہ مستقبل میں ایسے واقعات کی روک تھام ممکن ہو سکے۔ ان کا کہنا تھا کہ ترقیاتی منصوبوں کے ساتھ عوام کی جان و مال کا تحفظ اولین ترجیح ہے اور کسی بھی ادارے کی کوتاہی ناقابلِ برداشت ہے-