عمران خان کو 4 نومبر سے آئسولیشن میں رکھا گیا ہے،تشویشناک رپورٹس سامنے آرہی ہیں
پشاور(بولونیوز) وزیراعلیٰ خیبرپختونخوا سہیل آفریدی نے انکشاف کیا ہے کہ پاکستان تحریکِ انصاف کے بانی عمران خان کو 4 نومبر سے اڈیالہ جیل میں آئسولیشن میں رکھا گیا ہے جبکہ بین الاقوامی میڈیا میں اُن کی صورتِ حال سے متعلق تشویشناک رپورٹس سامنے آرہی ہیں۔
پشاور میں پریس کانفرنس کرتے ہوئے ان کا کہنا تھا کہ “ہم اڈیالہ جیل گئے مگر ہمیں دو منٹ کی ملاقات کی اجازت بھی نہیں دی گئی، اسلام آباد ہائیکورٹ بھی گئے لیکن وہاں بھی ملاقات نہ ہوسکی۔” وزیراعلیٰ نے کہا کہ عمران خان کی صحت اور سکیورٹی کے حوالے سے سنگین خدشات پیدا ہوگئے ہیں۔
سہیل آفریدی نے مزید کہا کہ پارلیمانی پارٹی اجلاس میں فیصلہ کیا گیا ہے کہ این ایف سی ایوارڈ میں بھرپور شرکت کی جائے گی تاکہ ضم اضلاع اور صوبے کے حقوق کے لیے مؤثر آواز بلند کی جاسکے۔ ان کے مطابق 2018 سے اب تک خیبرپختونخوا کو این ایف سی میں اس کا حق نہیں دیا گیا، جس کے باعث ضم اضلاع مسلسل محرومی کا شکار ہیں۔
انہوں نے دعویٰ کیا کہ وفاق کے ذمے صوبے کے 7 سالوں کے 1 ہزار 350 ارب روپے واجب الادا ہیں۔ اسی حوالے سے صوبے میں مختلف جامعات میں سیمینار منعقد کیے جارہے ہیں جب کہ تمام سیاسی جماعتوں سے بھی مشاورت کا سلسلہ جاری ہے۔
وزیراعلیٰ نے کہا کہ صوبے کے حقوق کے لیے سب کو متحد ہو کر لڑنا ہوگا۔ “ہمیں تصادم کی طرف دھکیلنے کی کوشش کی جارہی ہے لیکن ہم اس راستے پر نہیں جائیں گے۔ میں بطور وزیراعلیٰ بھی ذمہ داری نبھا رہا ہوں اور بطور پارٹی کارکن بھی۔”
سہیل آفریدی نے یہ بھی کہا کہ صوبے کے وزیراعلیٰ کا نام اسٹاپ لسٹ میں شامل کیا جانا امتیازی سلوک ہے، جس کی جمہوری نظام میں کوئی مثال نہیں ملتی۔
