جسٹس باقر نجفی کا نوٹ اسلامی معاشرے کی صحیح عکاسی کرتا ہے، صاحبزادہ ابوالخیر محمد زبیر
کراچی(بولونیوز)جمعیت علماء پاکستان اور ملی یکجہتی کونسل کے سربراہ ڈاکٹر صاحبزادہ ابوالخیر محمد زبیر نے کہا ہے کہ نور مقدم کیس میں جسٹس باقر نجفی کا نوٹ اسلامی معاشرے کی درست ترجمانی کرتا ہے۔ ان کے مطابق جسٹس باقر نجفی نے جس معاشرتی برائی کی نشاندہی کی ہے، وہ اپنی ذمہ داری پوری کرنے کے مترادف ہے اور وہ پوری قوم کی جانب سے مبارکباد کے مستحق ہیں۔
صاحبزادہ ابوالخیر محمد زبیر نے کہا کہ ملک میں معاشرتی برائیوں اور جرائم کے بڑھنے کی واحد وجہ اسلامی تعلیمات و احکامات سے روگردانی ہے۔ جسٹس نجفی نے اسی بنیادی حقیقت کی طرف قوم اور حکمرانوں کی توجہ مبذول کرائی ہے۔
انہوں نے مزید کہا کہ بعض سیکولر عناصر کو جسٹس باقر نجفی کا نوٹ ناگوار گزرا ہے، کیونکہ اسلامی احکام کے مخالف طبقات ایسے مؤقف کو پسند نہیں کرتے۔ تاہم، اسلام کے نام پر حاصل کردہ ملک میں اسلامی اصولوں کی نشاندہی اور ترویج ضروری ہے، اور جسٹس صاحب نے ایک اہم فریضہ ادا کیا ہے۔
