کراچی میں کل شدید گرمی ہوگی، پارہ43 ڈگری کا امکان

کراچی(بولونیوز)محکمہ موسمیات نے کراچی میں کل درجہ حرارت 43 ڈگری سینٹی گریڈ تک پہنچے کا امکان ظاہر کیا ہے۔محکمہ موسمیات کے مطابق کراچی میں آئندہ 2 روز میں موسم شدید گرم اور خشک رہے گا۔محکمہ موسمیات کے حکام نے بتایا کہ کراچی میں جمعرات کے روز درجہ حرارت 43 ڈگری سینٹی گریڈ تک پہنچے کا امکان ہے جب کہ جمعہ کے روز کراچی کا درجہ حرارت 42 ڈگری تک جا سکتا ہے۔تفصیلات کے مطابق محکمہ موسمیات کے حکام کا کہنا ہے کہ کراچی میں کل ہوا میں نمی کا تناسب صبح کے اوقات میں 65 سے 75 فیصد جب کہ شام کے وقت 25 سے 35 فیصد کے درمیان رہنے کا امکان ہے۔یاد رہے کہ محکمہ موسمیات کے مطابق ہفتہ سے کراچی کے موسم کا دوبارہ معمول کے مطابق آنے کے امکانات ہیں۔اگرہوا نہ ہوتوشہری لو لگنے، ہیٹ اسٹروک اور پانی کی کمی کا شکار ہوسکتے ہیں۔ہیٹ اسٹروک اُس وقت ہوتا ہے جب انسانی جسم اندرونی درجہ حرارت کو کم رکھنے کے لیے تیزی سے پسینہ خارج کرتا ہے تاکہ جسم کو باہر سے ٹھنڈک پہنچائی جاسکے۔لیکن پسینے کے اخراج کی صورت میں پیدا ہونے والی پانی کی اندرونی کمی کو فوراً پورا نہ کیا جائے تو پانی اور نمکیات کی کمی کے باعث جسم کا قدرتی کولنگ سسٹم ناکارہ ہوجاتا ہے اور انسان تھکاوٹ، سرسام یا لو لگ جانے جیسے جان لیوا امراض کا شکار ہوسکتا ہے۔