امریکا کا پاکستان پر انگلی اٹھانا درست نہیں، چین

بیجنگ(بولونیوز) چین نے پاکستان پر امریکی تنقید کو مسترد کرتے ہوئے کہا ہے کہ پاکستان پر انگلی اٹھانا درست نہیں دہشت گردی کو کچلنے کی ذمہ داری کسی خاص ملک پر عائد نہیں کی جاسکتی۔تفصیلات کے مطابق بیجنگ میں پریس بریفنگ کے دوران چینی وزارت خارجہ کے ترجمان لوکانگ نے کہا کہ امریکا کی جانب سے پاکستان پر انگلی اٹھانے اور اسے دہشت گردی سے منسلک کرنے کے مخالف ہیں، دہشت گرد تنظیموں کے خلاف کریک ڈاؤن کی ذمہ داری تنہا پاکستان پر عائد نہیں ہوتی۔ایک نجی ٹی وی کی رپورٹ کے مطابق ترجمان نے کہا کہ ہم نے کئی بار یہ بات زور دے کر کہی ہے کہ عالمی دہشت گردی کی اس جنگ میں پاکستان نے اہم کردار ادا کیا اور بڑی قربانیاں دیں، دنیا بھر کے ممالک کو باہمی اعتماد کا مظاہرہ کرتے ہوئے دہشت گردی کے خلاف اپنے اتحاد کو مزید مضبوط کرنا ہوگا نہ کہ ایک دوسرے پرانگلی اٹھائی جائے، یہ عمل عالمی دہشت گردی کے خلاف کی گئی کوششوں کے لیے موزوں نہیں۔واضح رہے لوکانگ نے کہا کہ دہشت گردی عالمی برادری کے لیے ایک مشترکہ مسئلہ ہے اس لیے دہشت گردی کے خلاف کارروائیاں بھی مشترکہ طورپرہونی چاہئیں، چین ایسے ممالک کا دفاع کرتا ہے جنہوں نے دہشت گردی کے خلاف درست اقدامات کیے، چین دہشت گردی کے خلاف ایسی تمام مشترکہ کوششوں کا خیر مقدم کرتا ہے جو باہمی اعتماد اور باہمی احترام کی بنیاد پر کی جائیں۔